Matarung nga Impluwensya sa Usa ka Amahan

Ang atong Amahan sa Langit dili mausab. Mabasa nato nga Siya “sama kagahapon, karon, ug sa kahangturan” (Mormon 9:9). Nakaobserbar ko nga ang halangdong yutan-ong mga amahan mosunod sa ehemplo sa Langitnong Amahan nga dili maduhaduhaon. Ang usa ka halangdong amahan matinud-anon sa iyang pulong sa tanang mga butang. Nakasabut siya nga ang pagkamakanunayon makatabang sa iyang mga anak nga mobati nga luwas ug gihigugma, ug anaa siya sa mga panahon sa krisis ug kalipay.

Ang atong Langitnong Amahan nakasabut usab sa matang sa paningkamot nga himoon aron mahimong takus nga mopuyo uban Kaniya sa kahangturan. Nakaila Siya sa atong ngalan, ug mitugot Siya nga kita adunay mga hagit aron sa paghashas kanato. Ang usa ka halangdong amahan nagtugot usab sa iyang mga anak sa pagpakigbisog usahay tungod kay nasayud siya nga ang mga hagit makahatag og mga oportunidad sa pagtubo.

Ang akong bana usa ka maayo nga martial artist. Gitudloan siya sa iyang amahan ug sa kasagaran moistorya nga ang iyang papa mas estrikto kaniya kay sa ubang mga estudyante. Ang pagdisiplina sa iyang amahan kaniya nakapalig-on ug nakatabang kaniya nga mas daling makakat-on. Sama sa atong Langitnong Amahan, ang halangdong yutan-ong mga amahan nag-awhag sa ilang mga anak sa pagbuhat sa ilang labing maayo samtang nagtanyag og kalig-on, gugma ug suporta.

Ang buhat sa atong Langitnong Amahan mahangturon ug walay katapusan (tan-awa sa Alma 12:25–33). Sa susamang paagi, ang buhat sa usa ka halangdong yutan-ong amahan dili usab matapos. Ang halangdong mga amahan kanunay nga mobuhat og maayong mga buhat ug maningkamot nga magmatarung. Matinuoron ug matinud-anon sila sa ilang pagsunod sa mga sugo sa Dios. Gipadaplin nila ang hinakog nga mga ambisyon alang sa kaayohan sa ilang pamilya. Sa “Ang Pamilya: Usa ka Pamahayag ngadto sa Kalibutan,” ang buhi nga mga propeta mitudlo nga “pinaagi sa balaan nga plano, ang mga amahan mao ang mangulo sa ilang mga pamilya diha sa gugma ug sa pagkamatarung ug may kapangakohan sa pagsangkap sa mga kinahanglanon sa kinabuhi ug sa pagpanalipod sa ilang mga pamilya.”² Naglakip kini dili lang sa pisikal nga panalipod apan usab sa espirituhanon nga panalipod. Halangdong mga amahan mogiya pinaagi sa ehemplo ug motanyag og gugma ug tambag ngadto sa ilang mga anak. Mopasidaan usab sila batok sa espirituhanong kakuyaw kon gikinahanglan.

Sa iyang artikulo sa New York Times “The Stories That Bind Us,” si Bruce Feiler mihatag og kinatibuk-ang pagpasabut sa mga pagtuon kabahin sa pagkadunot sa pamilya. Niini nga mga pagtuon, ang mga psychologist nakakita nga ang mga bata nga nagpakita nga labing mauyunon naapil sa pagpalig-on sa estraktura sa pamilya, nga nakatabang nila nga mobati nga sila nahilakip sa butang nga mas dako pa. “Kon ikaw gusto og mas malipayon nga pamilya,” miingon si Feiler, “paghimo, palamboa ug i-istorya pag-usab ang istorya sa positibo nga mga higayon sa imong pamilya ug sa imong abilidad nga makabangon gikan sa maliusd nga kahimtang. Kana nga buhat lang mahimong makapadugang sa mga kahigayunan sa imong pamilya nga mouswag sulod sa daghang mga henerasyon nga moabut.”³

Usa ka ehemplo niini makita sa Moises 1. Si Moises nalig-on tungod sa iyang kahibalo sa plano sa Dios ug sa iyang kaugalingong balaan nga pagkatawo. Sa dihang si Satanas miabut nga nagtintal kaniya, si Moises matugtanong mitubag, “Kinsa ikaw? Kay tan-awa, ako mao ang usa ka anak sa Dios, nga may pagkasama sa iyang Bugtong Anak; ug hain ang imong himaya, nga ako magsimba kanimo?” (Moises 1:13). Gani si Moises adunay kaisug nga mimando ni Satanas sa pagbiya.

Ang halangdong yutan-ong mga amahan mopalig-on sa ilang mga anak pinaagi sa pagpahinumdom nila sa ilang balaan nga pagkatawo isip esipritu nga mga anak sa Dios. Nagtabang sila sa paghimo og lig-on nga pamilya pinaagi sa ilang maayong mga ehemplo ug nagsiguro nga ang ilang mga anak moapil niini. Makahatag kini sa ilang mga anak og dakong kahibalo sa katuyoan ug sa pagsalig nga magmalampuson.

Sa dihang nakig-date ko, nangita ko og mahangturong kompanyon kinsa mahimong usa ka halangdong amahan. Tungod kay ako nagdako nga wala kana nga ehemplo sa akong pagkabata, mas lisud alang nako nga makahibalo sa tanang mga kinaiya nga kinahanglang anaa sa usa ka halangdon nga yutan-ong amahan. Nahigawad ko nga ang akong patriyarkal nga panalangin wala mohatag og mas detalyado nga direksyon mahitungod sa tawo nga gusto sa Langitnong Amahan nga akong minyoan. Miingon lang kini nga ako kinahanglang mangita og tawo nga modala nako ngadto sa templo. Apan bisan kining ingon og yanong instruksyon gihagit. Bisan og ako adunay positibo nga mga kasinatian sa pagpakig-date, sa kasagaran nabalaka ko nga ang maong tawo wala diha o ako kinahanglang mag-antus og walay katapusan nga mga pagsulay sa kasingkasing.

Bisan pa sa akong kakulba tungod sa kasinatian, nag-ampo alang sa usa ka bana nga usa ka matarung nga amahan sa akong mga anak, kinsa mahigugma kanila ug mahimong kabahin kanunay sa ilang kinabuhi. Sama sa akong matinud-anong inahan, nasayud ko nga bisan unsa pay mahitabo, makasalig ko sa akong Mahangturong Amahan alang sa suporta.

Sa akong kasurprisa ug kahimuot, ang akong mga pag-ampo natubag sa tukmang panahon sa Langitnong Amahan. Nakaayo nako ang pag-obserbar sa mahigugmaong ehemplo sa akong bana sa unsay angay sa usa ka amahan. Mapasalamaton ko nga iyang gisunod ang mga ehemplo nga gipakita sa mga propeta ug mga apostoles ug nga siya mipili nga ako iyang mahalon ug higugmaon sa walay paghinakog. Ang iyang ehemplo isip usa ka bana nakapanalangin usab sa among mga anak. Ang akong kasingkasing napuno sa pasalamat sa iyang pagkamatinud-anon bisan sa mga pagsulay, ang iyang ehemplo sa kakugi, ang iyang katakus sa paggamit sa priesthood, ug ang lunsay, makanunayon nga gugma nga iyang gipakita isip usa ka batan-ong amahan.

Imahe

watercolor painting

Walay kinutuban sa impluwensya sa usa ka tawo nga nakasabut, sama ni Moises, kinsa siya. Si Sister Sheri Dew, kanhi Ikaduhang Magtatambag sa Kinatibuk-ang Kapangulohan sa Relief Society, mitudlo nga ang tanang mga babaye kinsa maamumahon, nakatuman sa tahas sa pagkainahan, bisan og dili pa sila mga inahan. “Kitang tanan mga inahan sa Israel,” mipamatuod siya, “ug ang atong calling mao ang paghigugma ug pagtabang sa nagtubo nga henerasyon subay sa makuyaw nga mga dalan sa pagka-mortal.”⁴ Ang mga lalaki nga matarung nga mga ehemplo makatuman sa tahas sa pagkaamahan sa Israel, ug ang ilang mahiyason nga mga ehemplo molugway pa lapas sa ilang kaugalingong pamilya.

Human sa mga hagit sa akong pagkabata, masaligon ko nga ang Langitnong Amahan nasayud gayud unsay akong gikinahanglan aron ako makasalig sa akong mahangturong kompanyon. Iyang gipakita nako ang daghang makanunayong mga ehemplo sa pagkaamahan sa akong kinabuhi. Naglakip kini sa akong matarung nga apohan, kinsa nahigugma sa Ginoo, ug usa ka kugihan nga home teacher kinsa—nakasabut sa pinansyal nga limitasyon sa pamilya—mipasulod nako isip usa ka estudyante sa iyang art studio ug midasig nako sa pagsunod sa iyang mga lakang sa propesyunal nga paagi. Sa akong pagka-young adult, ang langitnong pagkaayo gihatag usab pinaagi sa wala paabuta nga panalangin nga makaangkon og matarung nga ama-ama, kinsa mapailubon sa akong pagduha-duha sa pagsalig sa imahe sa amahan figure ug kanunay nagpakita nako og kaayo.

Pinaagi sa matarung nga impluwensya niining mga father figure, nakakita ko og paglaum, pagkaayo, ug hingpit nga kalipay. Mapasalamaton ko sa tanang mga lalaki nga misunod sa ehemplo nga gipakita sa atong Amahan sa Langit ug naningkamot nga mahimong mga ehemplo sa halangdong pagkaamahan.