Ang Matag Pahina Nag-ingon nga Kita Nagtuo
Sa dihang ang akong kauban sa klase miingon nga ang mga Mormon wala motuo ni Kristo, nakahukom ko nga mobasa sa Basahon ni Mormon sa bag-ong paagi.
“Ang mga Mormon dili mga Kristiyano.”
Ang pamahayag sa usa sa akong kauban sa klase sa high school nakapasurprisa nako.
“Dayag nga kita Kristiyano,” miingon ko.
“Nan nganong mobasa ka sa Basahon ni Mormon?” miingon siya samtang milakaw palayo, wala ko hatagi og kahigayunan nga makatubag.
Kadaghan ko naghunahuna niini nga pangutana. Ang tubag mao, dayag lang, nga ang mga Mormon mga Kristiyano ug ang Basahon ni Mormon mao ang lain nga tugon ni Jesukristo. Mobasa kita niini uban sa Biblia aron makat-on og dugang mahitungod sa Manluluwas.
Nakabasa na ko sa Basahon ni Mormon kaniadto. Nasayud ko nga kini tinuod. Apan tungod sa pangutana sa akong kauban sa klase, gibati nako nga naaghat sa pagtuon niini sa bag-ong paagi, nagtimaan kon makapila kini naghisgot ni Jesukristo. Sa pagbuhat nako sa ingon, natingala ko.
Wala pa gani ko makaabli sa basahon sa dihang nabasa nako sa ulohan nga pahina nga ang Basahon ni Mormon nga gisulat aron sa pagkumbinser sa mga magbabasa “nga si Jesus mao ang Kristo, ang Dios sa Kahangturan, nagpaila sa iyang kaugalingon ngadto sa tanan nga mga nasud.”
Sa pasiuna sa Basahon ni Mormon, mabasa nako, “Ang labing madaugon nga hitabo nga nahisulat diha sa Basahon ni Mormon mao ang kinaugalingon nga pagpangalagad ni Ginoong Jesukristo taliwala sa mga Nephite human dayon sa iyang pagkabanhaw.” Ginaingon nga kadtong nakaangkon og saksi gikan sa Espiritu Santo nga ang rekord tinuod “makahibalo usab pinaagi sa samang gahum nga si Jesukristo mao ang Manluluwas sa kalibutan.”
Mipakli ko ngadto sa “Ang Pagpamatuod sa Tulo ka mga Saksi,” kinsa miingon nga ang usa ka anghel mipakita nila sa mga palid diin gihubad ang Basahon ni Mormon, ug nga “kami nasayud nga kini pinaagi sa grasya sa Dios nga Amahan, ug sa atong Ginoong Jesukristo, nga kami nakasud-ong ug nakapamatuod nga kini nga mga butang tinuod.”
Sunod, “Ang Pagpamatuod ni Propeta Joseph Smith” mihisgot sa pagbisita ni anghel Moroni, kinsa miingon nga ang Basahon ni Mormon naglangkob sa kahingpitan sa walay katapusang ebanghelyo “ingon nga gitugyan sa Manluluwas ngadto sa karaan nga mga lumulupyo” sa Amerika.
Ang Makapakabig nga Gahum sa Basahon ni Mormon, ni Ben Sowards
Wala pa gani ko makahuman sa 1 Nephi, ug daghan nako og nakit-an!
Nagpadayon ang akong pagsiksik. Sa 1 Nephi, nahibaloan nako nga si Lehi nasayud mahitungod sa pag-anhi sa Mesiyas (tan-awa sa 1 Nephi 1:19). Gibasa nako ang iyang mga panagna mahitungod sa Manunubos, “kinsa mokuha sa mga sala sa kalibutan” (1 Nephi 10:10; tan-awa sa mga bersikulo 4–10). Gibasa nako ang deskripsyon ni Nephi sa pagkahimugso ni Jesukristo, ang Iyang pangalagad, kamatayon, Pagkabanhaw, ug umaabut nga pagbisita ngadto sa karaang Amerika (tan-awa sa 1 Nephi 10–12).
Nakabasa ko sa mga panagna sa Basahon ni Mormon nga nagmatuod sa mga kamatuoran sa Biblia nga “ang Kordero sa Dios mao ang Anak sa Amahan sa Kahangturan, ug ang Manluluwas sa kalibutan; ug nga ang tanan nga mga tawo kinahanglan gayud nga moduol ngadto kaniya” (1 Nephi 13:40). Ug nabasa nako ang pagpamatuod ni Nephi nga ang “tanan nga mga kanasuran, mga kaliwatan, mga pinulongan, ug mga katawhan magpuyo nga luwas diha sa Usa nga Balaan sa Israel kon kini mao nga sila maghinulsol.” (1 Nephi 22:28).
Human sa usa ka adlaw, diha ko sa pahina 76. Nakahuman ra ko og usa sa mga basahon sa Basahon ni Mormon, apan nakadawat na ko og gamhanang pagsaksi!
Sa mga semana nga misunod, kada pahina nakakita ko sa mga pagpamatuod bahin ni Jesukristo, mga panan-awon diin siya nagpakita ngadto sa mga propeta, ug ang detalyado nga deskripsyon sa Iyang pangalagad taliwala sa karaang mga Amerikano. Gitapos nako ang akong pagbasa uban sa gamhanang pagpamatuod ni Moroni kang Jesukristo (tan-awa sa Moroni 9); ang iyang hagit mao ang, “pagpangutana sa Dios, ang Amahan sa Kahangturan, sa ngalan ni Kristo, kon ang [Basahon ni Mormon] tinuod ba” (Moroni 10:4); ug, sa katapusang pahina, ang iyang malumo ug madasigong imbitasyon nga “moduol ngadto ni Kristo” (Moroni 10:30, 32).
Akong nakita nga ang Basahon ni Mormon hingpit nga misupak sa pamahayag sa akong kauban sa klase. Kon ang usa ka Kristiyano mao ang tawo nga mituo ni Jesukristo, nan kada pahina sa Basahon ni Mormon nag-ingon, “Kita nagtuo!”
Sa katapusan, nakita nako pag-usab ang akong higala. Gisultihan nako siya sa akong kasinatian ug midapit kaniya sa pagbasa sa Basahon ni Mormon. Matinahuron siyang mibalibad apan miingon nga nalipay siya nga akong gidawat si Jesukristo isip akong Manluluwas. Human sa among panag-istorya, sa akong pagtuo mas nakasabut siya unsay akong gipasabut sa dihang miingon ko nga, “Dayag lang kita mga Kristiyano.”