Bulahan sa Matag Posible nga Paagi
Ni Elder Edward Dube
Sa Seventy
Si Elder Edward Dube natawo sa Zimbabwe, ug siya ug ang iyang asawa, si Naume, adunay upat ka anak.
Sa unsang paagi ang pagpadayag nakatabang nako, sa akong pamilya, ug sa Simbahan sa Africa.
Sa unang higayon nga nakadungog ko mahitungod sa restriksyon sa itom nga mga lalaki nga maghupot sa priesthood, didto ko sa akong misyon. Nabunyagan ko niadtong 1984, human gihunong ang restriksyon. Paglabay sa duha ka tuig gitawag ko sa pagserbisyo sa South Africa Johannesburg Mission.
Samtang na-assign sa Bulawayo, Zimbabwe, ang akong kompanyon, si Elder Francis Jack, ug ako mibisita sa usa ka dili kaayo aktibo nga sister. Ang iyang bana usa ka propesor sa teyolohiya sa laing simbahan. Nangutana siya namo nganong gipugngan man ang priesthood gikan sa mga itom nga lalaki nga kaliwat og African. Miingon siya og daghang mga butang nga nakasamok nako—mga butang nga wala nako madunggi sukad. Sa dihang migawas ko niana nga kwarto, gibati nako ang kaubos ug walay kadasig.
Si Elder Jack ug ako misakay sa among biseklita pauli sa among apartment nga walay sulti-sulti. Sa dihang miabut na mi, mitan-aw siya nako ug miingon, “Elder Dube, unsay nahitabo nimo? Ingon og nadisturbo ka pag-ayo.”
“Wala ka ba makadungog unsay iyang gisulti?” Mitubag ko. “Nganong nahitabo man kini?”
“Elder, mituo ba ikaw nga ang Langitnong Amahan ug si Jesukristo nagpakita ngadto sa batan-on nga si Joseph?”
“Oo,” miingon ko. “Apan unsa may labut niana niini?”
“May kalabutan ni sa tanan,” mitubag si Elder Jack. “Nagtuo kita sa pagpadayag, di ba?”
Naghunahuna ko sa iyang mga pulong ug unsay gisulti sa propesor. Nianang gabhiona nakamata ko sa tunga-tunga sa kagabhion. Gibati nako ang kalipay ug kalinaw.
Ang tubag sa matag pangutana sa ebanghelyo may kalabutan sa unsay nahitabo niadtong 1820. Nakahibalo nga ang Langitnong Amahan ug si Jesukristo nagpakita ngadto ni Joseph Smith nagpasabut nga siya usa ka propeta ug nga kini mao ang Simbahan sa Ginoo. Kon ang Langitnong Amahan ug si Jesukristo nagpakita ngadto sa batan-ong si Joseph, nan ang tanang mga baruganan sa ebanghelyo ug mga pangutana mapahimutang sa iyang lugar. Kini usa ka simbahan sa pagpadayag, ug ang Ginoo mipadayag og piho nga proseso sa piho nga mga panahon ngadto sa Iyang mga sulugoon, ang mga propeta, ug kana mao ang nakahatag nako og kalinaw.
Nagsugod ko sa paglukso-lukso ug gipukaw ang akong kompanyon nga nagsinggit, “Oo, oo! Sakto ka, Elder Jack! Ang Langitnong Amahan ug si Jesukristo nagpakita kang Joseph Smith! Mao kini ang Simbahan sa Ginoo!”
Ang paghunong niini nga restriksyon nahimong panalangin sa mga miyembro sa tibuok Africa. Ang priesthood nakapanalangin kanako ug sa akong pamilya sa matag paagi nga posible. Nahimo kini nga akong kalig-on nga makaangkon sa mga panalangin sa templo, ang panalangin nga makahibalo nga kita magpuyo isip mga pamilya sa kahangturan.
Ang paghupot sa priesthood nakapanalangin sa Africa. Ang mga tawo dinhi malipayon ug positibo na, apan ang ebanghelyo nakadugang ngadto niini. Ang mga pamilya importante kaayo sa Africa. Mao nga ang templo nakita nga usa ka dakong panalangin. Ang Simbahan dali kaayong mitubo didto.
Ang mga miyembro dinhi naminaw sa kabubut-on sa Dios ug kami moadto ug mobuhat niini. Nakapanalangin kini sa mga miyembro. Dihay higayon nga sa ubang mga dapit sa Africa adunay 90 porsyento ang walay trabaho, ang atong mga miyembro ingon og maayo ra tungod kay sila mapaningkamuton sa kaugalingon. Ang priesthood ug ang direksyon gikan sa mga lider sa priesthood nakapanalangin kanato.
Mapasalamaton ko sa Langitnong Amahan ug ni Jesukristo sa oportunidad nga naghupot sa priesthood, kay nakapanalangin kini sa akong kinabuhi, ug nga kini nakapanalangin sa mga miyembro sa tibuok kayutaan sa Africa.