Ang Akong Unang Adlaw sa Elders Quorum

Ang elders quorum lahi gayud sa priests quorum. Imbis pundok sa mga tawo nga imong kaedad, sa kalit naapil ka na sa mga hamtong. Ang unang duha ka higayon nga miapil ko, wala ra koy gisulti. Nabalaka ko nga batan-on ra kaayo ko nga wala kaayoy nahibaloan aron makatampo.

Apan sa pagsige nako og tambong, mas nakomportable ko, ug mas nakaamgo ko nga bisan pila pay imong edad, ang tanan aduna gayuy ikatampo. Ang tanan adunay lain-laing mga kasinatian sa ebanghelyo ug ang tanan adunay lain-laing level sa pagsabut sa lain-laing mga baruganan.

Usa ka higayon naghisgot mi sa Pag-ula sa Manluluwas, ug mipataas ko sa akong kamot. Gisulti ra nako nga ang pagpasalamat sa Iyang Pag-ula, dili lamang maluwas ta ni Jesukristo apan makatabang usab nato nga mas mahiduol ngadto Kaniya ug ngadto sa Dios. Naghisgot ko sa akong relasyon sa Langitnong Amahan ug ni Jesukristo ug sa unsa nga paagi kini napalig-on samtang ang akong pagsabut sa Pag-ula nadugangan. Human sa klase, usa ka tawo miduol nako ug nagpasalamat nako sa akong mga komentaryo. Miingon siya nako nga wala gayud siya maghunahuna sa mga butang sama sa akong gisulti kanila ug nagpasalamat gayud sa akong pagpasabut.

Sa elders quorum, dili lang ka makat-on gikan sa usa ka magtutudlo; makat-on usab ka gikan sa Espiritu ug sa tanan diha sa korum. Kanang tanan nga panglantaw makatabang ninyo nga makaangkon og mas dako nga pagsabut sa mga butang nga imong gitudlo. Ug kana makatabang nimo nga mahimong mas maayo nga sulugoon sa Ginoo. Pananglitan, sukad nga nahimo kong elder, nagsugod ko nga maganahan pag-ayo sa home teaching! Sa akong hunahuna giseryuso nako tungod kay nasayud ko nga mahimo nakong misyonaryo sa pipila ka bulan, mobisita ko og mga tawo ug mopakigbahin sa mga mensahe sa ebanghelyo uban kanila sama sa akong gibuhat kon ako mag-home teach. Imbis maglingkod lang ug pasagdan ang akong kompanyon nga mao ray motudlo, nagsugod ko sa pagpangandam sa among mga pagbisita. Maniguro ko nga makasulti. Nasayud ko nga maayo kini nga pagpangandam alang sa akong misyon, apan nakahimo usab kini sa home teaching nga mas makahuluganon ngari nako. Mas mapasalamaton na ako karon sa mga tawo diin ako naka-home teaching ug sa mga tawo sa akong ward.

Dili kinahanglang mahadlok ka sa elders quorum, apan makapaabut gyud ka nga makadungog og mas daghang kaalam mahitungod sa mga hilisgutan nga imong gitun-an. Makapaabut ka nga mahimong mas maayong magtutudlo, lider, ug sulugoon sa Ginoo. Ug nindot kaayo kana!