Pagpangandam sa Kinabuhi
Ang Relief Society Laay Ba?
Gikulbaan ko pag-ayo nga moapil sa Relief Society, apan tungod sa ilang pag-abi-abi nako, giganahan ko niini.
Sa dihang nag-18 na ko, malipayon kaayo ko niini. Unsay dili ikalipay sa tin-edyer? Sigurado, sa high school pa, naa pa koy tawomtom, ug kinahanglan gihapon nga mohimo sa mga buluhaton sa balay sa California, USA, apan usa ko ka hamtong. Misulod ko sa bag-o kaayong hugna sa kinabuhi, ug nalipay kaayo ko niini. Unsay wala makalipay nako mao ang ideya nga ikauban ang tanang “tigulang nga mga babaye” sa Relief Society. Duna silay mga bata ug mga trabaho ug electric nga mga kaldero ug tingali ganahan magluto og puto nga magsul-ob lang og tsinelas sa balay. Duna koy homework ug lumba sa langoy ug blue nail polish ug gusto kong molikay sa pagpanglimpyo sa akong kwarto kutob sa mahimo. Unsaon kaha nako nga mobagay ko ni bisan kinsa didto? Nakasiguro ko nga kini kiwaw, mingaw, ug laay. Ug dayon ako miadto.
Una sa tanan, ang Relief Society dili diay laay. Dihay daghang pahiyom ug katawa. Mipakigbahin sila og nindot ug kinasingkasing nga mga komentaryo, apan wala usab sila mahadlok sa pagkatawa. Ikaduha sa tanan, dili diay sila lahi nako. Tinuod, mas tigulang sila nako, apan nagkomidyahay sila sa usag usa pareha sa gibuhat sa akong mga higala ug nako. Labaw sa kausa, dunay nangutana sa parehang pangutana nga akong gikalibgan. Ug sa dihang ilang gipahibalo ang enrichment meeting nianang semanaha, nakugang ko. Magkat-on sila og self-defense! Mao nay gusto nakong buhaton!
Gikulbaan ko pag-ayo sa dihang si Sister Larsen, ang presidente sa Relief Society, mihangyo nako sa pagbarug ug pagpaila sa akong kaugalingon, apan dili sab kadto dautan. Ang tanan nalipay nako. Si Sister Edwards, ang akong sophomore nga magtutudlo sa seminary, mihatag nako og thumbs-up, ug si Sister Richards, nga nakahinumdom nako sa Primary, miingon nga dili siya makatuo nga ako “dako na.” Ug gitagad ko nila nga ingon og ako “dako na.” Gibati nako nga usa ka gamay nga bata nga nagdula sa pagsinina, apan sa kadaghanan sa mga babaye nianang adlawa, ako usa ka bag-o nga sister.
Sukad niadto, ganahan na ko sa Relief Society, bisan asa pa ko nga ward. Inig sulod gyud nako sa kwarto sa Relief Society, mabati nako kini: ang talikala sa panag-inigsoonay ug ang pagbati nga nahisakop. Ganahan ko nga mohimo sa akong labing maayo sa pagbayaw sa akong mga sister sa Relief Society ug pagkat-on kutob sa mahimo gikan nila.
Ug ang resulta, maayo na kaayo ko moluto og puto.