Ang Katapusang Pulong
Ang Kahayag Anaa Kanunay
Ni Elder Dieter F. Uchtdorf
Sa Korum sa Napulog Duha ka mga Apostoles
Gikan sa usa ka pakigpulong sa Oktubre 2017 nga kinatibuk-ang komperensya, sa dihang si Elder Uchtdorf nahimong Ikaduhang Magtatambag diha sa Unang Kapangulohan.
Atol sa akong pagpiloto isip airline captain libut sa atong planeta, matingala ko kanunay sa katahum ug kahingpit sa minugna sa Dios. Akong nakita ilabi na ang pagkakita sa relasyon tali sa yuta ug sa adlaw. Gikonsiderar ko kini nga dako nga leksyon nga maggamit og butang kon sa unsang paagi ang kahayag ug kangingit mitumaw.
Sa nahibaloan natong tanan, sa matag 24 oras ang gabii mahimong adlaw ug ang adlaw mogabii.
Nan, unsa diay ang gabii?
Ang gabii walay lain kondili anino ra gayud.
Bisan sa pinakangiub nga kagabhion, wala mohunong sa pagsilaw ang adlaw. Padayon kining naghayag ingon nga kahayag nga sanag sukad. Apan ang katunga sa kalibutan anaa sa kangitngit.
Kon walay kahayag motumaw ang kangitngit.
Kon moabut na ang kangingit sa kagabhion, dili kita masubo o mabalaka nga nawala ang adlaw. Dili kita maghunahuna nga wala na diha ang adlaw o napalong. Nakasabut kitang nasalipdan ra kita, nga padayong motuyok ang kalibutan, ug sa katapusan ang kasilaw sa adlaw moabut na usab kanato.
Wala magpasabut nga kon mongitngit wala nay kahayag. Sa kasagaran, nagpasabut kini nga wala kita sa saktong dapit nga makadawat sa kahayag.
Ang espirituhanong kahayag padayong mosanag sa tanang linalang sa Dios.
Naa ra nato kon mopundo kita sa saktong dapit aron makita ang balaanong kahayag ug kamatuoran sa ebanghelyo ni Jesukristo. Bisan og moabut na ang kagabhion ug mongitngit ang kalibutan, makapili ra kita sa paglakaw sa kahayag ni Kristo, motuman sa Iyang mga sugo, ug maisugong mopamatuod sa Iyang pagkatinuod ug Iyang kabantugan.
Matag higayon nga ibalik ninyo ang inyong kasingkasing sa Dios sa mapaubsanong pag-ampo, masinati ninyo ang Iyang kahayag. Matag higayon nga tinguhaon ninyo ang Iyang pulong ug kabubut-on diha sa kasulatan, molambo ang kahayag ngadto sa kasanag. Matag higayon nga makabantay mo nga dunay nanginahanglan ug mosakripisyo sa inyong kaugalingon aron makatabang uban sa gugma, modako ug mosanag ang kahayag. Matag higayon nga isalikway ninyo ang tintasyon ug pilion ang kaputli, matag higayon nga mopasaylo kamo, maisugong mopamatuod sa kamatuoran, ang kahayag mopuli sa kangitngit ug modani usab sa uban nga nangita og kahayag ug kamatuoran.