Ang Pagbalanse nga Buhat sa Paglahutay

Lahi sa unsay inyong gibati usahay, mopahayag ko nga ang atong Langitnong Amahan motubag sa atong mga pag-ampo sa Iyang paagi. Ikonsiderar ang mosunod nga mga kasulatan:

“Kay ang matag usa nga mangayo, makadawat; ug siya nga mangita, makakaplag; ug ngadto kaniya nga motuktok, pagaablihan” (3 Nephi 14:8).

“Kon aduna kaninyo’y kulang sa kaalam, papangayoa siya sa Dios, nga naghatag ngadto sa tanan nga mga tawo sa walay pagdumili, ug sa walay pagkasuko; ug kini ihatag ngadto kaniya (Santiago 1:5).

“Tan-awa, Ako mosulti kanimo diha sa imong hunahuna ug sa imong kasingkasing, pinaagi sa Espiritu Santo, nga moabut diha kanimo ug nga mopuyo diha sa imong kasingkasing” (D&P 8:2).

Sa unsa nga paagi nga kita makadawat og mga tubag ug pagpadayag? Unsaon nato sa pagkahibalo nga kini sa Espiritu Santo ug dili lang sa atong kaugalingong hunahuna? Mopakigbahin ko og duha ka kasinatian sa akong kinabuhi nga nahimong mga sumbanan.

Human si Sister Teh ug ako nag-date og taud-taod, naklaro nga ako gusto nga mogahin sa akong kahangturan uban kaniya. Natural lang, sinsero akong nag-ampo ug nagpuasa bahin niini. Wala akoy pihong gibati nga kausaban human ako nag-ampo ug nagpuasa. Wala akoy gibati nga kainit sa dughan. Hinoon, nagpadayon ko sa pagbati og nindot mahitungod sa akong desisyon, mao nga mipadayon ko. Si Sister Teh nakadawat sa samang tubag, mao nga ania kami. Sukad niana nga kasinatian, nakahimo ko og daghan sa akong mga desisyon sa susama nga paagi (tan-awa sa D&P 6:22–23).

Itandi kana sa akong mga kasinatian karon kabahin sa piho nga mga assignment gikan sa Korum sa Napulog Duha ka mga Apostoles sa pagtawag og bag-ong presidente sa stake. Sa akong paghimo niini nga assignment pinaagi sa espiritu sa pag-ampo ug pagpuasa, napanalanginan ako og talagsaong impresyon nga nagtabang nako kinsa ang tawagon. Ang mga impresyon moabut usahay sa dili pa, usahay atol sa, o usahay bisan human sa proseso sa pag-interbyu. Kanunay nakong bation ang kainit sa dughan. Sukad akong nahibaloan nga kini paagi sa Espiritu Santo sa paggiya nako sa maong mga assignment.

Nganong lahi man ang paagi sa Espiritu Santo sa pagpakigsulti nako? Wala ko kahibalo. Ang importante nga butang mao nga ako nakat-on sa pag-ila niini nga mga sumbanan isip mga paagi nga ako makadawat og personal nga pagpadayag. Magkuha ko og kahupayan ug pagsalig sa mosunod nga pasidaan: “Magpaubos ka; ug ang Ginoo nga imong Dios moagak kanimo pinaagi sa kamot, ug mohatag kanimo og tubag sa imong mga pag-ampo” (D&P 112:10).

Ang pipila ka tawo naghunahuna nga mas magkalisud ug magkalisud ang pag-ila sa sakto gikan sa sayop. Dunay panahon nga mas nagkalisud ang pag-ila sa sakto gikan sa sayop. Daghan sa dili sakto apan inila nga mga opinyon sa atong panahon ingon og sakto kon tan-awon nato sa gamay lang nga lente. Apan ang daang basura nga gisulod sa bag-ong putos ug gipaluyohan sa maanindot nga pahinumdom basura gihapon.

Ang pag-ila tali sa matarung og sayop dili kinahanglan nga komplikado. Bisan dili pa kita makadawat sa gasa sa Espiritu Santo, gipanalanginan kita sa Kahayag ni Kristo:

“Kay tan-awa, ang Espiritu ni Kristo gihatag ngadto sa matag tawo, siya masayud sa maayo gikan sa dautan; busa, ako mopakita nganha kaninyo sa paagi sa paghukom; kay ang matag butang nga modapit sa paghimo sa maayo, ug sa pagdani sa pagtuo diha kang Kristo, gipadala pinaagi sa gahum ug gasa ni Kristo; busa kamo mahimo nga masayud uban sa usa ka hingpit nga kasayuran nga kini gikan sa Dios.

“Apan bisan unsa nga butang nga modani sa mga tawo sa pagbuhat sa dautan, ug sa dili pagtuo kang Kristo, ug sa paglimud kaniya, ug sa dili pag-alagad sa Dios, niana kamo masayud uban sa usa ka hingpit nga kasayuran nga kini gikan sa yawa; kay sa ingon niini nga paagi ang yawa mobuhat, kay siya dili modani sa tawo sa pagbuhat og matarung, dili, bisan og usa, ni ang iyang mga anghel; ni sila kinsa nagpaulipon sa ilang mga kaugalingon ngadto kaniya” (Moroni 7:16–17).

Usa sa labing dako nga mga pagsulay sa atong panahon mao ang pagpaluyo sa buhi nga propeta. Kadaghanan kanato moingon, “Oh, sayon ra kana. Mipaluyo na ko sa buhi nga proepta. Nahimo na.”

Apan makapatingala nga makakita kon sa unsa nga paagi ang uban nga moingon nga nagpaluyo sa buhi nga propeta mosunod sa pipila ka inila nga mga opinyon karon. Kon mag-atubang og peer pressure, ang pipila kanato molihok ingon og o mohimo og mga opinyon nga nagsugyot nga kita wala makahibalo nga dunay buhi nga propeta.

Daghan ba kaayo kamog gibuhat nga mobati kamo nga gibitad sa lahi nga direksyon? Tag-ana kon unsa? Mograbe hinoon kini. Mao nga ang pangutana mao: Unsaon ninyo sa pagpangita sa sakto nga balanse?

I-establisar isip inyong giya ang mahangturong matang sa atong mga espiritu ug ang inyong pagkatawo isip mga anak sa Dios. Itutok ang inyong kalagsik niana nga kamatuoran ug unsay gipasabut niini. Ang tanang ubang butang mawala sa inyong kinabuhi o mapahimutang kini sa iyang sakto nga lugar.¹ Duha ka kasulatan magsilbi nga giya nga mga baruganan:

“Apan pangita una kamo sa gingharian sa Dios ug sa iyang pagkamatarung, ug kining tanan nga mga butang idugang nganha kaninyo” (3 Nephi 13:33).

“Hinonoa pagtigum kamog mga bahandi alang kaninyo didto sa langit diin walay tangkob ni taya nga magakutkot ug diin walay mga kawatan nga magapanagsaka ug magapangawat:

“Kay hain gani ang imong bahandi, tua usab ang imong kasingkasing” (Mateo 6:20–21).

Sa motuo mog sa dili, diha na ko sa una. Dihay panahon sa akong kinabuhi sa dihang nagtrabaho ko og full-time, mieskwela sa gabii, ug dunay ikaduhang trabaho human sa pag-eskwela sa sayong mga takna sa kabuntagon—samtang si Sister Teh ug ako nagpadako sa among gamay nga pamilya. Duna lang koy duha ka oras sa pagkatulog pipila ka adlaw sa usa ka semana sulod sa duha ka bulan. Ibabaw nianang tanan, nagserbisyo ko sa ward bishopric.

Imahe

feeding a baby

Mao kadto ang labing mabungahon nga panahon sa akong kinabuhi. Sa akong hunahuna wala nako magamit pag-ayo ang 24 ka oras sa usa ka adlaw sama sa akong nabuhat nianang panahona.

Si Presidente Gordon B. Hinckley (1910–2008) mipahinumdom nato nga kita adunay responsibilidad sa atong pamilya, sa atong employer, sa Ginoo, ug sa atong kaugalingon.

Unsaon nato sa pagbalanse kadto nga mga responsibilidad? Si Presidente Hinckley miingon: “Sa akong pagtuo dili kana lisud. Nagsebisyo ko sa daghang mga kapasidad niini nga Simbahan. Amahan ko sa lima ka anak, nga mga gagmay pa ug nagtubo samtang nagserbisyo ko niadtong lain-laing mga kapasidad. … Nalingaw mi sa kinabuhi. Duna mi mga family home evening. Gibuhat namo unsay gipaabut sa Simbahan nga among buhaton.”²

Ang paglahutay hangtud sa katapusan dili mahitungod sa pagkompleto sa listahan sa ebanghelyo ug dayon moingon: “Maayo na ko. Ang buhaton ra nako karon mao ra ang pagpadayon nga walay paningkamot.” Hinoon, mahitungod kini sa pagpadayon sa pagkat-on ug pagtubo. Ang ebanghelyo ni Jesukristo mahitungod sa kanunay nga paghinulsol ug pag-usab—nagkinahanglan kini og padayon nga paningkamot ug dili sayon.

Miingon si Haring Benjamin, “Ug tan-awa ang tanan niini nga mga butang mahimo diha sa kaalam ug kahusay; kay kini dili panginahanglan nga ang usa ka tawo kinahanglan modagan nga labaw pa kay sa iyang kusog” (Mosiah 4:27).

Ang pipila ka mga Santos sa Ulahing mga Adlaw migamit niini nga tudling isip paghatag og katarungan sa ilang pagkadili andam sa pagsulay pa o pagbuhat sa ilang labing maayo. Ang problema mao nga sila nagtutok lamang sa unang katunga sa tudling.

Ania ang ikaduhang tunga: “Kini angay nga siya kinahanglan magkugi, nga sa ingon niana siya unta makadaug sa ganti; busa, ang tanan nga mga butang kinahanglan gayud nga mabuhat diha sa kahusay.” Ang duha ka katunga nagklaro unsa gayuy gipasabut sa pagbuhat sa mga butang pinaagi sa kaalam ug kahusay.

Imahe

trophy

Usa ka batan-ong atleta nga higala mipaila nako sa butang nga talagsaon nga gitawag og second wind, nga mao ang pagbati sa nabag-o nga kalagsik nga naghatag nimo og kusog sa pagpadayon bisan kon ikaw gikapoy.

Sa pagpangita sa second wind sa ubang aspeto sa iyang kinabuhi, ang akong higala miingon: “Isip usa ka estudyante sa kolehiyo, sayon ra kaayo nga mopauli nga gabii na kaayo ug moingon nga kapoy na kaayo sa pag-ampo o pagbasa sa mga kasulatan o bisan sa paghimo og kanunay nga pagbisita sa templo. Adunay daghang ikapamalibad sa pagbuhat niining mga butanga, ilabi na sa mga estudyante sa kolehiyo. Apan sa katapusan, kinahanglan natong pangitaon ang atong second wind ug buhaton kadtong gagmay nga mga butang.”

Tingali imbis sa paglahutay hangtud sa katapusan, makaplagan nato ang atong second wind—ang atong spiritual wind—ug maglipay hangtud sa katapusan. Mopamatuod ko nga kita makahimo kon sundon nato ang mga pag-aghat sa Espiritu Santo, mopili sa maayo gikan sa dautan, ug balansehon ang atong mga responsibilidad.