Ang Priesthood Gitahud Pag-ayo
Ang tagsulat nagpuyo sa Central Region, Ghana.
Sa unsa nga paagi nga ang 1978 nga pagpadayag nakapanalangin kanako ug sa akong pamilya.
Una kong nakadungog mahitungod sa Simbahan sa dihang ang akong inahan miapil sa grupo ni Brother Joseph W. B. Johnson niadtong 1968.1 Mga 10 anyos pa ako niadto. Ang negosyo sa akong amahan mihinay tungod sa 1966 coup d’état, ug ang pamilya nagkalisud gyud pag-ayo. Mao nga ang akong inahan naghunahuna nga mangayo og espirituhanon nga tabang.
Sa wala pa ang pagpadayag niadtong 1978, ang Simbahan dili pa pormal tungod kay ang priesthood wala pa ihatag ngadto sa mga itom. Human sa pagpadayag, ang Simbahan mahimo nang maestablisar uban sa awtoridad sa priesthood. Nabunyagan ko niadtong ika-24 sa Pebrero 1979.2
Naabtan ang akong bana og duha ka tuig sa pagtuon—ug gamay nga panaglalis—sa pag-apil sa Simbahan. Sa katapusan nabunyagan siya niadtong 1980, ug dayon nakadawat siya sa priesthood. Nahimo siyang kalmado nga tawo, mao nga ang mga sakop sa iyang pamilya dili makatuo sa iyang kausaban. Mabinantayon siya sa priesthood nga iyang gihuptan ug naniguro usab nga nagbuhat siya kanunay sa sakto nga butang sa atubangan sa Ginoo. Kon wala ang priesthood, miingon siya nga naningkamot unta siya sa mga dungog ug mga himaya sa mga tawo. Apan uban sa priesthood, iyang nakaplagan nga ang labing importante nga mga butang mao ang inyong kaminyoon, inyong panimalay, ug pagserbisyo sa uban.
Sa among bahin sa kalibutan, kon ikaw ang amahan, unsa imong isulti mao ang matuman. Apan dili nato gamiton ang priesthood nianang paagiha. Maglingkod kita diha sa konseho sa pamilya. Ang mga amahan motabang sa ilang mga asawa ug mga anak nga makasabut nga unsay iyang gitudlo kanila sakto.
Ang mga lalaki nga mga miyembro sa Simbahan moserbisyo sa ilang mga asawa imbis ang ilang mga asawa moserbisyo kanila. Kana makahatag nila sa gugma ug kalinaw sa usag usa.
Ang unang higayon nga nakita nako siya nga mipanalangin sa sakrament mao ang panahon “sa freeze” [gipapahawa ang mga misyonaryo gikan sa Ghana] tungod kay among gihimo ang among sakrament miting sa among kaugalingong balay.3 Nindot kaayo among gibati sa dihang naghupot siya sa priesthood nianang higayuna. Wala kinahanglana nga dunay moanha sa among balay aron sa pagpanalangin sa sakrament alang namo; siya ang mihimo niini. Espesyal kadto ug kami giganahan kaayo.
Ang unang higayon nga akong gibasa ang bisan unsa nga literatura kabahin sa mga itom nga wala tuguti nga maghupot sa priesthood mao ang panahon sa freeze, sa dihang ang literatura sa anti-Mormon nagsugod sa paggawas diha sa publiko. Wala kaayo ko mahasol niini tungod kay nasayud ko nga ang Simbahan tinuod. Gitudloan kita nga dili magsalig ni bisan kinsa apan sa pagtutok sa atong kinabuhi kang Jesukristo ug sa Iyang maulaong sakripisyo. Mao kana ang gitutukan sa akong pagtuo.
Niadtong ika-17 sa Disyembre 1996, nakaadto kami sa Johannesburg South Africa Temple. Gibati nako ang kadasig, ilabi na sa dihang nakadungog ko nga ang among unang anak, nga usa ka batang lalaki kina namatay pipila lang ka adlaw, ma-seal ngari kanamo. Abi nako patay na siya ug wala na, bisan og nasayud ko nga siya inosente. Apan kon siya ma-seal ngari namo kini usa ka espirituhanon nga kasinatian nga dili gayud nako makalimtan.
Mao nga kon ang mga tawo mangutana nako pila ka buok ang among anak, sultihan nako sila nga kami dunay walo ka anak. Mangutana sila, “Sa unsa nga paagi?” Moingon ko, “Oo, ang una naghulat namo, mao nga anaa ra namo ang pagsunod sa mga sugo sa Dios ug magpuyo niini aron nga kami makabalik ug magkahiusa isip usa ka pamilya.”
Ang priesthood mao ang gahum sa Dios. Daghan kaayo ko og mga panalangin gikan sa priesthood. Kanunay akong malipay ug mabayaw kon ang mga anak mangayo og panalangin sa priesthood gikan sa ilang amahan. Dayon masayud ko nga sila misalig kaniya ug sila misalig nga ang Langitnong Amahan naglihok pinaagi sa ilang amahan, kinsa naghupot sa priesthood. Among gitahud pag-ayo ang priesthood sa among panimalay. Karon tulo sa among mga anak nga lalaki minyo na, ug ilang gigamit ang ilang priesthood sa ilang mga pamilya.
Nasayud ko nga ang priesthood tinuod tungod kay mao kini ang gahum sa Dios, ug kini usa ka buhi nga gahum tungod kay ang Langitnong Amahan buhi. Mihatag Siya og porsyon niana nga gahum ngadto sa Iyang mga anak nga lalaki dinhi sa yuta. Kitang mga babaye adunay bahin sa priesthood. Gitahud ko kini pag-ayo. Ang priesthood nakatabang sa among pamilya ug nagpadayon sa pagbuhat sa ingon.