Tortillas ug Amigas

Si Adriana gilaayan. Gusto siyang makigdula sa iyang kaluha, nga si Diana. Apan si Diana milakaw aron mamalit og pagkaon didto sa merkado uban ni Mamá. Nanghupaw si Adriana. Haw-ang kaayo ang balay. Naghunahuna siya nga mas maayo unta nga mikuyog na lang siya kanila.

Nakahukom si Adriana nga mobisita sa iyang silingan nga si Margarita. Ang mga anak ni Margarita mga dagko na, ug si Margarita ingon og lola ngadto ni Adriana. Kanunay silang maglingaw-lingaw.

Migawas si Adriana. Giinitan siya samtang naglakaw padulong sa balay ni Margarita. Gipalusot niya ang iyang ulo sa pultahan. “Margarita, naa ra ka?”

“Oo dia ko sa kusina,” tubag ni Margarita. Nakita ni Adriana nga naglingkod siya sa may lamesa nga giduko ang ulo. Mitan-aw siya sa dihang misulod si Adriana.

“Hello, Adriana,” miingon si Margarita. Mipahiyom siya og gamay. Apan ingon og masulub-on.

“Duna bay problema?” pangutana ni Adriana.

Nanghupaw si Margarita. “Wala kay angay nga kabalak-an.”

“Unsaon nako siya sa pagtabang nga mobati og mas maayo?” Naghunahuna si Adriana. Kanunay nga malipayon si Margarita kon sila magluto. “Makatabang ba ko nimo sa pagluto og tortillas?”

“Bag-o lang gyud kong nakahuman og luto,” miingon si Margarita. Iyang gikuha ang panapton nga tabon aron makita ang pundok sa tortillas.

“Nan makatabang ba ko nimo sa pagkaon og tortillas?” Pangutana ni Adriana nga nagpahiyom.

Mikatawa si Margarita. “Siyempre. Mag-init sa ko og mga batong nga ipares niini.”

Nagbarug si Adriana tupad ni Margarita sa may stove ug giukay ang gimantikaan pag-usab nga mga batong sa kaldero. Sa dihang nahuman na, gidala niya kini sa lamesa. Gidala ni Margarita ang tortillas ug cheese.

Mikuha si Adriana sa init-init nga tortilla ug gibutangan kini og batong. Dayon iyang gibutang ang cheese sa ibabaw. Lami kaayo tan-awon! Dili na makahulat si Adriana nga mokaon niini. Apan duna siyay gusto nga buhaton pag-una.

“Mahimo ba kong mag-ampo?” Nangutana si Adriana ni Margarita.

“Sigurado.”

Gipiyong ni Adriana ang iyang mga mata ug mikyugpos sa iyang mga bukton. “Langitnong Amahan, nagpasalamat kami Kanimo niini nga pagkaon. Palihug panalangini kini aron kami mahimsog ug malig-on. Ug palihug tabangi si Margarita bisan unsay iyang kinahanglan. Nalipay ko nga siya akong higala. Sa pangalan ni Jesukristo, amen.”

Gibuka ni Adriana ang iyang mga mata. Dako ang pahiyom ni Margarita—tinuod nga pahiyom niining higayuna. Samtang nangaon sila, nag-istorya sila mahitungod sa eskwalahan ug mga sport ug mga libro. Si Adriana ganahan nga makig-istorya ni Margarita.

Sa dihang nahuman na sila sa pagpangaon, gigakus ni Adriana si Margarita. “Salamat kaayo sa snack. Nalingaw kaayo ko!”

Gigakus usab ni Margarita si Adriana. “Salamat kanimo, Adriana. Nagkinahanglan ko og higala karon.”

Nalipay kaayo si Adriana. “Nalipay ko nga kita amigas.”

“Nalipay sab ko nga kita managhigala,” miingon si Margarita. “Dad-a hinoon kining sobra nga tortillas sa inyo? Busog kaayo ko.”

Naglukso-lukso si Adriana pauli sa ilang balay. Gibati usab siya og kabusog—ug dili lang sa tortillas! Puno sa panaghigalaay ang iyang tibuok paminaw.

Tortillas sa Panaghigalaay

Kining sayon nga lutoon nga corn tortillas eksakto kaayo para makighigala ug ipakigbahin sa mga higala! Siguroha nga dunay hamtong nga motabang.

2 ka baso nga masa farina (corn flour)

1 1/2 ka baso nga init nga tubig

1. Sagula ang masa farina ug init nga tubig. Masaha ang libadura hangtud mohumok.

2. Himoang bola-bola ang libadura. Ibutang ang usa ka bola-bola sa tunga sa duha ka palid nga waxed paper.

3. Gamit ang plato o kaserola, iduot ang bola-bola sa makadaghan nga higayon.

4. Lutoa ang tortilla sa kaha nga hinay-hinay lang ang kayo. Kon moitom-itom na ang ibabaw baliha aron maluto ang pikas bahin.

5. Butangi og batong ug cheese, ug tagamtama!