Ang Atong Santuwaryo sa Igpapahulay

Imahe

church building

Ang miting sa sakrament usa ka talagsaon ug mahimayaon nga panahon. Kon mosulod na kita sa chapel ug mangandam sa pagdawat sa sakrament, kinahanglang hunahunaon nato ang atong kaugalingon nga anaa sa santuwaryo, usa ka sagrado ug espesyal nga dapit diin kita makapamalandong ni Kristo ug sa Iyang importante ug mahimayaon nga misyon. Ipadaplin nato ang mga butang sa kalibutan ug hunahunaon unsay mahangturon. Kinahanglan natong hipuson ang atong mga cell phone ug mamalandong mahitungod ni Jesukristo, ang Anak sa Buhing Dios.

Duna lang tay 70 ka minuto matag semana sa pagtutok sa atong gugma alang sa Manluluwas. Kon makasugod kita sa paghunahuna sa chapel isip santuwaryo sa hugot nga pagtuo ug debosyon alang sa miting sa sakrament, kitang tanan mapanalanginan.

Samtang magtukod kita sa gingharian sa Dios, dili ko makahunahuna og lain nga mas importante kay sa maayo nga pagkaandam nga miting sa sakrament diin ang mga mamumulong maghisgot ni Kristo, magpamatuod ni Kristo, ug mopakigbahin og mga pagpamatuod gikan sa mga apostoles ug mga propeta diha sa mga kasulatan ug sa ubang mga tinubdan.

Isip usa ka Simbahan nagtutok kita sa adlaw nga Igpapahulay. Nakahimo kita og kauswagan, apan wala pa kita makaabut diha. Magpadayon kita sa atong mga paningkamot hangtud ang matag miyembro ug misyonaryo espirituhanon na kaayong madasig panahon sa ilang pagsimba sa adlaw nga Igpapahulay nga ang matag usa moingon ngadto sa iyang mga silingan, mga investigator, ug mga kabanay, “Dali ug tan-awa. Dali ug simba uban namo.” Mao kini ang dapit nga atong gusto.

Kon kitang tanan makabuhat niini isip usa ka Simbahan, kadtong modawat sa atong imbitasyon nga “dali ug tan-awa” mobati sa gahum sa mensahe sa gipahiuli nga Simbahan ni Jesukristo. Samtang mosimba sila uban nato sa atong mga miting sa sakrament, ang ilang mga kasingkasing matandog ug ang kahayag sa ebanghelyo moimpluwensya sa ilang kasingkasing ug mga hunahuna.