“Paghatag sa mga Panalangin sa Priesthood,” Liahona, Hunyo 2018
Pagsaulog sa 1978 nga Pagpadayag
Paghatag sa mga Panalangin sa Priesthood
Ang Dios nahigugma sa Iyang tanang mga anak ug mihatag og paagi sa matag usa kanato nga makabalik ngadto Kaniya.
Usa ka pamilya naglakaw sa nataran sa Templo sa Accra Ghana, usa sa walo ka mga templo nga gipahibalo, gitukod pa, o gigamit na sa Africa.
Ang Basahon ni Mormon nagtudlo nga “ang tanan managsama ngadto sa Dios,” lakip ang ‘itum ug puti, ulipon ug gawasnon, lalaki ug babaye’ (2 Nephi 26:33). Tungod kay ang Dios nahigugma natong tanan, mihatag Siya og paagi alang sa matag usa nato nga makabalik ngadto Kaniya (tan-awa sa Moises 5:9; Mga Artikulo sa Hugot nga Pagtuo 1:3). Sa tibuok kasaysayan sa Simbahan, ang mga tawo sa matag kaliwat ug kagikan nabunyagan tungod niana nga katuyoan ug nagpuyo isip matinud-anong mga Santos sa Ulahing mga Adlaw.
Gikan sa tunga-tunga sa 1800, ang Simbahan wala mo-orden og mga lalaki nga kaliwat og itom nga African ngadto sa priesthood o mitugot sa itom nga mga lalaki o babaye nga moapil sa mga ordinansa sa endowment o sealing sa templo.1 Sulod sa mga katuigan, nagkadaiyang mga teyoriya ang mitumaw aron sa paghatag og kapasikaran sa restriksyon. Si Elder Jeffrey R. Holland sa Korum sa Napulog Duha ka mga Apostoles mihatag og gibug-aton nga ang bisan unsa nga mga teyoriya nga gihatag sa pagsulay sa pagpasabut sa mga restriksyon mga “istorya-istorya” nga kinahanglan dili na ipadayon: “Bisan unsa pa ka maayog tuyo ang mga pagpasabut, nagtuo ko nga hapit tanan niini dili igo ug/o sayop. … Wala lang gyud ta makahibalo ngano nga ang maong praktis … ingon niadto.”2
Daghang mga propeta ug mga Presidente sa Simbahan, lakip ni Brigham Young, misaad nga moabut ang adlaw nga ang tanang mga lalaki kinsa takus makadawat sa priesthood. Nakahibalo niini nga mga saad ug nakasaksi sa pagkamatinud-anon sa itom nga mga Santos sa Ulahing mga Adlaw, ang mga lider sa Simbahan sa tunga-tunga sa ika-20 nga siglo “naghangyo sa dugay ug dako nga tinguha … nangamuyo sa Ginoo alang sa langitnon nga paggiya.”3
Pagpadayag gikan sa Dios
Kana nga giya miabut ngadto ni Presidente Spencer W. Kimball (1895–1985) “human sa dugay nga pagpamalandong ug pag-ampo didto sa sagrado nga mga lawak sa balaan nga templo.” Niadtong Hunyo 1, 1978, ang Ginoo mipadayag ngadto sa Iyang propeta ug sa mga sakop sa Unang Kapangulohan ug sa Korum sa Napulog Duha ka mga Apostoles nga “ang dugay na nga gisaad nga adlaw miabut na nga ang matag matinud-anon, takus nga tawo sa Simbahan mahimong modawat sa balaan nga pagkapari uban sa gahum sa paggamit niining langitnon nga pagtugot, ug maglipay uban sa iyang mga hinigugma sa matag panalangin nga nagagikan niini, lakip ang mga panalangin sa templo.”4
Sa pagpahibalo sa pagpadayag, ang Unang Kapangulohan mipahayag, “Kami mopahayag uban sa kaligdong nga ang Ginoo karon mipadayag sa iyang kabubut-on alang sa panalangin sa iyang tanan nga mga anak ngadto sa tibuok bahin sa yuta.”5
Atol sa misunod nga kinatibuk-ang komperensya ang Unang Kapangulohan mipresentar sa pagpadayag ngadto sa mga miyembro sa Simbahan, kinsa midawat niini nga “ang pulong ug kabubut-on sa Ginoo” ug ang tanan mipaluyo sa Opisyal nga Pamahayag 2 isip kabahin sa sumbanan nga kasulatan.
Ang Resulta sa Pagpadayag
Usa ka batan-ong lalaki nagtudlo atol sa miting sa korum didto sa Paris, France, diin ang kadaghanan sa mga ward adunay mga miyembro gikan sa nagkalain-lain nga mga nasud sa tibuok kalibutan.
Ang epekto sa pagpadayag hilabihan. Dili lang kay gihatag sa Dios ang mga panalangin sa priesthood ug sa templo ngadto sa tanang takus nga mga miyembro bisan pa sa unsang kaliwatan, apan ang mga ordinansa sa templo mahimong ipahigayon alang sa tanan nga sukad nagpakabuhi.
Uban sa pagpadayag miabut ang mga oportunidad sa pagpalapad sa misyonaryo nga buhat, ug ang mga miyembro midaghan diha sa daghang mga nasud, mga kaliwatan, mga pinulongan, ug mga katawhan.
Mga Pagtulun-an sa Simbahan
Samtang ang buhat sa Ginoo nagpadayon sa pagkatap sa tibuok kalibutan, ang mga miyembro sa Simbahan nakatagamtan og panahon sa dakong panaghiusa. Samtang nagkadugang ang inter-aksyon sa mga miyembro sa Simbahan sa uban nga gikan sa daghang mga nasyonalidad ug mga kultura, ang mga lider sa Simbahan mihatag og gibug-aton sa kaimportante sa paghigugma ug paglig-on sa usag usa ug pagsalikway sa pagkamahukmanon ug diskriminasyon sa kaliwatan sa bisan unsa nga matang.
“Kinahanglan natong gakson ang mga anak sa Dios pinaagi sa kalooy ug wagtangon ang pagkamahukmanon, lakip sa kaliwatan, sa sekso, ug nasyonalismo,” mitudlo si Presidente M. Russell Ballard, Akting nga Presidente sa Korum sa Napulog Duha ka mga Apostoles. “Ginaingon nga tinud-anay kitang nagtuo sa mga panalangin sa gipahiuli nga ebanghelyo ni Jesukristo alang sa matag anak sa Dios.”6 Naghisgot sa mahangturong pamilya sa Dios, si Presidente Russell M. Nelson mitudlo: “Ang pagsabut lamang sa tinuod nga Pagkaamahan sa Dios ang makahatag og hingpit nga pagpasalamat sa tinuod nga pagka-inigsoonay sa tawo. Kana nga pagsabut makapadasig og tinguha sa pagtukod og mga taytayan sa kooperasyon imbis mga paril sa pagpalain.”7
Magpadayon sa Pag-uswag nga Magkahiusa
Samtang wala kita makahibalo sa tanan, adunay pipila ka butang nga mahibaloan sa matag usa kanato. Makahibalo kita nga ang Dios nahigugma kanato ug adunay plano alang natong tanan aron mahimong magkahiusa, mahangturong pamilya. Makahibalo kita nga kini mao ang gipahiuli nga Simbahan sa Ginoo ug nga Siya naggiya niini pinaagi sa Iyang mga propeta. Ang pagbaton og personal nga saksi niini nga mga kamatuoran makatabang samtang kita magpadayon sa pag-uswag nga magkahiusa pinaagi sa mga oportunidad ug mga hagit nga atong giatubang diha sa dalan nga mahimong sama Kaniya (tan-awa sa Moroni 7:48).