Ang Tabang sa Ginoo pinaagi sa Duha ka Operasyon sa Utok
Bryn Booker, Idaho, USA
PAGHULAGWAY PINAAGI NI BONNIE HOFKIN
Atol sa physical therapy tungod sa sakit sa likod, namatikdan nako ang wala nga bahin sa akong lawas nga naluya ug naminhod. Sa dihang akong gipasabut kini nga mga simtoma sa akong physical therapist, nabalaka siya ug miawhag nako nga makigkita og doktor.
Ang MRI nagpakita nga ang akong utok mitubo sa ubos sa akong bagulbagol ug naalihan ang spinal fluid sa akong li-og sulod na sa daghang mga tuig. Mao kini ang hinungdan sa grabe ug kanunay nga paglabad ug ka sakit sa ulo. Ang bugtong opsyon mao ang operasyon. Apan bisan pa sa operasyon, nakasinati gihapon ako og kanunay nga kasakit.
Paglabay sa unom ka bulan, mibalik ko sa akong doktor alang sa dugang nga mga eksaminasyon aron lang madiskobrehan nga ang naalihan nga spinal fluid mas midako pa. Nahadlok ko nga magpaopera pa og laing masakit nga operasyon. Ang akong bana ug ako nagpangutana og pipila ka medikal nga mga opinyon ug dayon mipadayon uban sa usa ka doktor kinsa mibati nga masaligon nga ang pagkuha sa parte sa akong utok makatabang.
Ang pagpaayo gikan sa akong ikaduhang operasyon sa utok mao ang labing sakit nga akong nasinati sa akong kinabuhi. Desperado akong nangita sa Espiritu sa paghupay kanako. Naminaw ako sa mga pakigpulong ug mga himno, nag-ampo kanunay, ug nakadawat og daghang mga panalangin sa priesthood.
Pinaagi sa masakit nga pagpaayo, nasayud ko nga ang Langitnong Amahan nakadungog sa akong mga pag-ampo ug sa mga pag-ampo nga gihalad sa uban alang kanako. Gipadala Niya ang mga tawo kanako sa dihang nagkinahanglan ko nila. Usa ka nurse sa among ward mitabang nako nga makat-on unsaon sa pagdumala ang akong mga medikasyon. Ang akong iyaan ug uyoan, nakamatikod nga naughan [dehydration] na ko, midala nako ngadto sa ospital. Ug ang usa ka bata nga Primary, gusto nga motabang sa among pamilya, mibilin sa iyang mga dulaan sa among pultahan alang sa akong anak nga lalaki. Pinaagi niini nga kasinatian ug daghan pa, mabati nako nga ang Manluluwas nagsuporta nako ug ang akong pagpamatuod mas milig-on pa matag adlaw. Mao kini ang usa ka talagsaon ug sagrado nga kasinatian resulta gikan sa usa ka tinuod nga sakit.
Bisan og ang akong ikaduhang operasyon nagmalampuson, ang akong kabalaka nagpadayon, ug kinahanglan akong makat-on sa pagpahiuyon sa usa ka kinabuhi sa balik-balik nga sakit ug pagsalig nga ang Langitnong Amahan adunay katuyoan niini. Apan ako adunay paglaum sa Iyang saad nga Siya mopadayon sa pagpalig-on kanako sa akong mga hagit, sumala sa Iyang gisulti: “Ako molakaw diha sa inyong atubangan. Ako anaa sa inyong tuo nga kamot ug sa inyong walà, ug ang akong Espiritu mahimo nga anaa sa inyong mga kasingkasing, ug ang akong mga anghel anaa libut kaninyo, aron sa pagtabang kaninyo” (D&P 84:88).