Bulahan tungod sa Pagpahayag sa Akong Tinuohan
Kristin McElderry, Massachusetts, USA
Paghulagway ni Dilleen Marsh
Nabunyagan ko sa dihang nag-edad ko og 19. Daghan sa akong pamilya ug mga higala wala modawat sa akong desisyon sa pag-apil sa Simbahan, apan kana wala makapahunong nako. Paglabay sa duha ka semana, nagsugod ko sa akong ikaduhang tuig sa kolehiyo. Sa dihang mibalik ko ngadto sa campus, gikuyawan ko sa akong bag-ong tinuohan.
Nagsugod ko sa pagkabalaka nga dili ko makabaton og kaisug sa pagbarug sa akong relihiyon. Gibati nako nga nag-inusara. Wala gyud ko sukad makahimamat og miyembro sa Simbahan sa kolehiyo, ug wala ko masayud asa pangitaa ang meetinghouse, o kon aduna bay ward o branch sa duol. Nag-ampo ko sa Langitnong Amahan alang sa kaisug. Nag-ampo ko nga makabaton ko og pagsalig sa pagbarug alang sa akong bag-ong nakaplagan nga mga pagtuo.
Paglabay sa pipila ka adlaw, mitabang ko sa pipila ka tawo nga namalhin. Nahimamat nako ang batan-ong lalaki nga ginganlan og Brian ug nagkaamigo mi. Nanglakaw mi sulod sa campus usa ka adlaw sa dihang nangutana siya nako unsay akong mga plano sa Dominggo. Giingnan nako siya nga mosimba ko.
“O, unsa nga simbahan ang imong adtoan?” nangutana siya.
Bisan pa sa kakulba nga akong gibati, mibati ako og kaisug ug miingon, “Mosimba ko sa Ang Simbahan ni Jesukristo sa mga Santos sa Ulahing mga Adlaw.”
Mapasigarbuhon ko sa akong kaugalingon! Gikulbaan usab ako kon unsay ikasulti ni Brian. Dayon, nakita nako ang mga misyonaryo. Sa wala pa makasulti si Brian og bisan unsa, giingnan nako siya nga mobalik ra ko. Midagan ko paingon sa mga misyonaryo. Nalipay silang nakakita nako ug gihatagan ko sa tanang mga detalye nga akong gikinahanglan aron makaadto sa simbahan sa sunod adlaw.
Gibalik nako si Brian ug mipasabut unsay nahitabo. Mipakigbahin ko kaniya og gamay mahitungod sa Simbahan, ug nagpadayon mi sa paglakaw nga walay kalainan, gawas nga ako mibati og dugang nga kalagsik. Gibati usab nako ang kainit ug kalinaw nga ang Espiritu lamang ang makahatag. Nabalaka ko nga mag-inusara ug wala masayud asa mosimba. Apan nagtuo ko nga kadtong mga misyonaryo nga miabut sa saktong lugar nianang higayuna mao ang paagi sa Langitnong Amahan sa pagpanalangin nako sa pagpahayag sa akong tinuohan.
Sobra na sa 10 ka tuig ang milabay, ug sukad nianang adlawa wala na gayud ako mahadlok pa sa pag-ingon, “Ako usa ka miyembro sa Ang Simbahan ni Jesukristo sa mga Santos sa Ulahing mga Adlaw!”