Tufala Level blong Fet
Elda Wilford W. Andersen
Blong Olgeta Seventi
I kam long wan divosen toktok, “The Faith to Reap,” we hem i bin givim long Brigham Yang Yunivesiti–Aedaho long 17 Maj 2015.
Fet long Jisas Kraes mo Atonmen blong Hem, hem i fet ia blong mekem wanem God i wantem. Hem i fet long paoa blong Hem, i no long paoa blong yumi.
The Golden Harvest, i kam long David Merrill, Jos Histri Miusiom i glad blong serem
Kraes we I Stap Prea long Garen blong Getsemane, i kam long Hermann Clementz
Lihae mo famli blong hem oli bin stap long waelples blong sam dei nomo, nao Lod i talem long hem blong sendem ol boe blong hem i gobak long Jerusalem blong karem ol buk we oli wokem long bras, we i stap wetem Leban. Plante taem, yumi no talem plante gud samting abaot tufala boe blong Lihae we tufala i stap agens, Leman mo Lemyul, be tufala i bin glad blong go. Oli bin gat inaf fet blong traem.
Leman, mo afta Lemyul, wetem ol brata blong tufala, oli bin askem ol buk ia long Leban. Ol brata ia oli lusum bigfala mane blong famli, mo kolosap laef blong olgeta tu taem we oli bin traem. Long ples ia, fet blong Leman mo Lemyul i go slak, mo tufala i rere blong givap. Be Nifae, hem i girap i go ova long denja mo fasin blong givap:
“Olsem we i tru se Lod i stap laef, mo olsem we i tru se yumi stap laef, bae yumi no gobak long papa blong yumi long waelples kasem taem we yumi finisim samting ia we Lod i bin talem long yumi
Taswe, bae yumi fetful blong stap obei long ol komanmen blong Lod” (1 Nifae 3:15–16).
Nao Nifae i praktisim bigfala fet blong hem, i tekem ol buk aot long Leban, mo i gobak wetem ol brata blong hem long papa blong olgeta long waelples.
I luk se i gat tufala level blong fet we i seperet gud. Fas level, hem i fet blong traem, fet ia blong sakem huknaef i go. Seken level, hem i fet blong mekem. Hem i moa bitim fet ia blong sakem huknaef—hem i fet blong mekem samting we God i wantem.
Leman mo Lemyul, tufala i gat fet blong traem, be Nifae i gat fet blong go mekem samting. Leman mo Lemyul, tufala i gat inaf fet blong sakem huknaef blong tufala, be Nifae i gat inaf fet blong mekem samting we God i wantem.
Wanem i defren ia bitwin fet blong sakem huknaef mo fet blong mekem samting we God i wantem, bae i mekem evri samting i jenis long laef blong yu. Blong stap laef bakegen wetem Papa long Heven, mo laef long wan laef we i givim frut mo i gat glad long wol ia, yumi nidim blong developem fet blong mekem samting we God i wantem.
Yumi kasem ol bigfala promes we i kam long Lod—ol promes blong stap hapi mo gat glad long laef ia, mo blong kam olsem wan god long nekis laef. Be ol jalenj mo ol problem blong evri dei laef blong yumi, oli traem blong prapa spolem gud hop we yumi gat. Graon blong promes blong yumi, yumi luk se i stap longwe, i had blong kasem, mekem se yumi stat blong gat tu tingting.
Yumi tingting: “I no posibol blong mi kasem gol ia, o blong kasem blesing ia.” I tru, Lod i bin stap tingting long wan narawan taem Hem i bin mekem olgeta promes ia.”
No. Hem i bin stap tingting long yu mo mi. Yumi nidim inaf fet blong kasem ol blesing blong yumi—wan fet we i strong tumas we i save tanem ol fiuja promes oli kam ril. Yumi nidim fet blong mekem samting we God i askem.
?Fet, hem i wanem stret? ?Olsem wanem yumi save developem?
Gat fet long Jisas Kraes.
Faswan, fet blong sakem huknaef i no semmak long fet blong mekem samting we God i askem, mo fet ia i no stap insaed long yumiwan. Hem i no semmak long fasin blong gat tras long yuwan, o blong lukluk samting long gud saed. Hem i no fet long famli o fren blong yu—evriwan ia oli gud. Fet blong mekem samting we God i wantem, hem i fet long Jisas Kraes mo Atonmen blong Hem. Hem i fet long paoa blong Hem, i no long paoa blong yu.
Taem oli bin singaotem mi olsem stek presiden blong Mesa Arisona Marikopa Stek, Elda W. Mack Lawrence, long tetaem ia, hem i wan Jeneral Atoriti Seventi, i bin invaetem waef blong mi mo mi, blong go long ofis blong stek presiden mo i givim koling. Mi akseptem from mi tekem se i diuti blong mi. Afta, hem i invaetem mifala blong go insaed long hae kaonsel rum, mo wetem prea, tingting long sam nem blong sam man blong givim blong kam ol kaonsela blong mi. Taem mi go insaed long rum, mi luk ol pikja blong evri stek presiden we oli bin givim seves long stek stat long taem we hem i oganaes, mo hemia i tajem hat blong mi wantaem. Oli bin ol bigfala lida, insaed long Jos, mo tu, insaed long komuniti.
Mi lukluk i go long waef blong mi mo talem: “Kathleen, mi no ting se mi save mekem hemia. Mi no naf long sus blong olgeta.”
Waef i talem: “Be yu no talem long mi. I moa gud yu go toktok long Elda Lawrence.”
Mi sapraes tumas we, taem mi talem long hem se mi no ting se mi save mekem koling ia, Elda Lawrence i ansa: “Yes. Mi ting se yu raet.”
Be afta i talem: “Yu yu no save mekem Brata Andersen, be Lod i save mekem. Hem i gat paoa blong mekem wok blong Hem, mo sapos yu stap klin inaf mo wok had, bambae Hem nao i mekem. Bae yu luk.”
Mo Hem i mekem.
Fet ia blong sakem huknaef blong yu, hem i fet blong traem samting. Hem i fet long yuwan, mo fet ia i stap go lus taem ol samting oli kam had. Mo afta, yumi stat blong gat tu tingting. Be fet blong mekem samting we God i askem, hem i fet long Lod Jisas Kraes. Hem i neva tekem samting.
Stretem Tingting blong Yu Wetem Tingting blong God
Blong praktisim fet blong mekem samting we God i wantem, yumi mas sua se samting we yumi laekem, mo ol samting we yumi stap wok from, oli go stret wetem tingting blong God. Yumi no save praktisim fet ia blong mekem samting we God i wantem sapos God i no agri wetem hemia. Blong gat help blong Hem, yumi mas mekem tingting blong yumi i folem tingting blong Hem.
From se profet Nifae, insaed long buk blong Hileman, i bin wan stret mo gud man we i bin fetful, Lod i bin talem long hem: “Bae mi blesem yu blong oltaem; mo bae mi mekem yu strong long ol toktok mo long aksen, long fet mo long ol wok; yes, we i blong mekem se evri samting bae i hapen long yu folem toktok blong yu.” Hemia wan bigfala promes ia. Afta, Lod i ademap: “From bae yu no askem samting we i agensem tingting blong mi” (Hileman 10:5).
Mo Moronae i talem hemia: “Sapos bae yufala i gat fet long mi, bae yufala i gat paoa blong mekem eni samting we i nid blong mekem long plan blong mi” (Moronae 7:33).
Blong mekem wanem yumi wantem i folem tingting blong God, i wan samting we yumi mas gat bifo yumi gat fet blong mekem samting we God i askem.
Taem ol boe blong mi oli bin yangfala, oli stap plei long senia hae skul basketbol tim. Long tetaem ia, oli bin stap gat tim prea bifo long wanwan gem. Mi stap long stan, mo mi stap luk, nao mi stap askem miwan se oli stap prea from wanem. Sapos oli stap prea blong winim gem, nao prea blong olgeta i no gat fet ia blong mekem samting we God i askem. Hemia i kam klia folem namba blong ol gem we oli bin stap lusum. I luk olsem se Lod i no bin serem sem tingting ia, se bae oli mas winim evri gem.
Long nara toktok, God bae i helpem yumi blong kasem ol gol ia nomo we oli gud blong yumi. Hemia from se Hem i lavem yumi, mo Hem i save i moa gud bitim yumi wanem nao bae i gud blong yumi. Mo yumi mas talem tangkyu from hemia. Yumi mas prea evri dei se Papa long Heven bae i blesem yumi wetem ol tingting we oli stret mo gud, we oli stret wetem tingting blong Hem. Yumi mas lan blong prea olsem we Lod i bin prea insaed long garen blong Getsemane, se tingting blong God bae i kamtru, be i no tingting blong yumi (luk long Luk 22:42). Afta long hemia nomo bae yumi save praktisim fet ia blong mekem samting we God i askem yumi.
Go long Wok
Nambatri samting blong gat bifo yumi gat fet blong mekem samting we God i askem. Aposol Jemes i talem i klia se fet, sapos i no gat wok i go wetem, i ded nating nomo. Fet ia blong sakem huknaef blong yu, i nidim blong yumi gat bilif, be fet ia blong mekem samting we God i askem, i nidim moa bitim bilif. Devel tu, hem i stap biliv, Jemes i raetem, mo devel i stap seksek tu (luk long Jemes 2:17, 19).
Mi bin harem wan stori abaot wan papa we i bin luk se yang gel blong hem i nildaon long saed blong bed blong hem, i stap prea se Papa long Heven bae i protektem ol smol pijin blong oli no go insaed long trap blong pijin we brata blong hem i bin bildim, mo i putum long yad. Samtaem afta long dei ia, tingting blong papa i wok. Hem i bin save se trap ia, i wan gudfala trap. Hem i bin helpem boe blong hem blong bildim.
Hem i talem long gel blong hem: “Mi harem yu stap prea long moning, se Papa long Heven bae i protektem ol smol pijin blong no go long trap. “Be samtaem, ol nogud samting oli hapen iven taem yumi stap prea se bae i no hapen.”
Gel i ansa: “Mi save nomo se bae hem i no save kasem wan pijin, Papa.”
Papa i talem: “Mi laekem tumas fet blong yu switat. Be sapos hem i kasem sam pijin, mi hop se bae i no spolem fet blong yu.”
“Bae i no hapen Papa,” gel i talem. “Mi save se bae hem i no kasem.”
Papa i askem: “?Olsem wanem nao yu save gat bigfala fet olsem?”
“From se, afta we mi talem prea blong mi,” gel i ansa, “mi bin go aotsaed mo mi kikim trap blong pijin blong hem i brokbrok.”
Hem i gud tumas blong prea blong kasem ol blesing blong Papa long Heven. Be afta we yumi talem, amen, yumi mas go wok. Yumi no save wet se Lod bae i soem rod long yumi sapos yumi no wantem muvum leg blong yumi. Mo tu, yumi no sapos blong askem hem blong mekem wanem we yumi save, mo sapos blong mekem yumiwan.
Yumi mas wok blong kasem ol stret mo gud gol blong yumi, mo yumi mas wok had blong obei olgeta komanmen. Ril paoa long ol kavenan blong yumi, mo ril paoa long fet blong mekem samting we God i askem, i kamtru taem yumi talem wetem tras se God bae i kipim ol promes blong Hem, be, i kamtru taem yumi sua evriwan se bae yumi kipim ol promes blong yumi. Bigfala trutok i wanem i tanem ol fiuja promes oli kam ol ril samting we i hapen long taem tedei. Yumi mas wok.
No givap wetem ol samting we yu stap mestem, o mekem mistek long hem, be traehad oltaem, mo gat strong tingting. Fet blong mekem samting we God i wantem, hem i no nidim blong yu stap stret evriwan, be i askem se bae yu mekem oltaem mo oltaem.
Mi invaetem yufala blong developem fet ia blong mekem samting we God i askem yumi. Putum fet blong yu i hang strong long Sevya, Jisas Kraes, mo Atonmen blong Hem. Meksua se wanem yu wantem, i folem stret mo i go stret wetem tingting blong Hem. Afta, go long wok wetem ful hat, ful paoa long tingting, ful maen mo ful paoa wetem wan tingting blong wok we i no go slak mo i muv fored oltaem.I no gat jalenj, i no gat problem, i no gat fanis we bae i blokem fet blong mekem samting we God i wantem.