Obei Ol Komanmen blong Mi
?Yu yu bin tingting olsem finis: “Hao mi save soem long Papa long Heven se mi rili wantem Hem blong ansarem ol prea blong mi mo blesem mi?” Sevya Jisas Kraes i givim yumi wan ki taem Hem i bin talem: “Sapos yufala i lavem mi, bambae yufala i save obei long ol tok blong mi” (Jon 14:15).
Long nara toktok, yumi soem lav we yumi gat long Papa long Heven taem yumi stap obei long ol komanmen blong Hem.
Samtaem, ol ansa oli no kam long stret taem, o long wei we yumi ting long hem, mo maet yumi gat temtesen blong givap, o yumi stop blong stap obei. Be, sapos yumi save stap wet longtaem mo lisin, Lod bae i ansa long stret taem mo wei blong Hem. Oltaem Hem i stap ansa long ol prea we oli stret mo gud. Oltaem Hem i stap blesem fasin blong stap obei (luk long Mosaea 2:21–24).
Wol i tijim se, lav, i mekem man i no gat responsabiliti. Be hemia i no tru, nara wei nao i tru. Lav we yumi gat long God, yumi soem taem yumi wantem mo yumi wok wetem strong tingting blong stap obei long ol komanmen blong Hem.
Sevya i tijim, “Trutok ia bambae i mekem yufala i fri man” (Jon 8:32). Profet Alma i talem: “fasin nogud i neva bin fasin blong stap glad” (Alma 41:10). Mo tru long Profet Josef Smit, Lod i bin tijim: “I gat wan loa, we oli talem wetem atoriti long heven bifo ol stat blong wol ia we oli no save tekembak, mo evri blesing i folem loa ia—mo taem yumi kasem eni blesing we i kam long God, hem i from fasin blong yumi blong stap obei long loa ia we blesing ia i folem” (Doktrin mo Ol Kavenan 130:20–21).
Hapines, ol blesing, mo help blong lidim yumi, oli kam tru long fasin blong stap obei. Papa long Heven i wantem yu blong yu stap hapi mo fri from se Hem i lavem yu, mo from hemia nao Hem i givim olgeta komanmen. Blong faenem pis we oli no faenem long wol ia, yumi mas lanem se, blong putum tingting blong yumi i folem tingting blong Papa long Heven, i wan wei ia nomo we i go long hapines.
Papa long Heven i wantem yu blong faenem hapines we i no save finis. Ol profet blong Hem oli wantem yu blong faenem wan glad we i bitim mak. Mifala i wantem yu blong faenem pis ia we mifala i faenem taem mifala i stap folem Sevya. Wokbaot long rod Hem i soem (luk long “Lod Bae Mi Folem Yu,” Hymns, namba 220). Jusum blong stap obei. Fasin blong yu blong wantem blong stap obei bae i lidim yu i go long tru fridom mo hapines.