Gospel: Wan Help blong Taem we I No Save Finis

Pikja

life icons

Las manis, sam fren mo mi, i go tugeta blong storian abaot wik blong mifala. Wan fren i serem se hem i stap tekem long hem, trabol ia blong lukaot long mama blong hem we i stap traem blong kam oraet mo kamaot long fasin blong stap dring. Hem i yangfala smol bitim mi, mo hemia i saon olsem wan hadwok wantaem.

Samtaem afta long naet ia, storian i go kasem poen we mifala i stap tokbaot se blong smok tedei, i sas tumas, mo hao nao we, wan we mifala i save hem, i stap smokem wan paket sigaret long wan dei. (Kalkuletem: !I tumas mane!) Hem i stap traem blong lego sigaret, mo i stap gotru ol defren kaen samting long bodi mo maen blong hem. Boe blong hem i rili hapi se hem i stap traem blong lego. Papa blong hem i bin ded from i tekem tumas drag, mekem se eni drag i mekem boe ia i stap fraet bigwan.

Nao laswan, storian blong mifala i go long en wetem kofi—hamas pipol i dring kofi long moning (mo aftenun mo samtaem long naet), mo hamas nao oli misim dring ia naoia from se hem i sas blong pem evri dei.

Taem mi draev i gobak long haos, mi stap tingting long evri storian ia, mo mi tingting: “Tok blong Waes i bigfala help evriwan.” (Sapos yu no save, wan bigfala help i wan wei blong mekem laef i kam gud moa, blong laef moa gud, mo sam moa. Olsem wan i tokbaot, wan laef help i wanem we, bifo, oli singaotem wan gudfala tingting.”) I olsem we God i talem: “Hemia wan wei blong sevem mane, helpem yu stap helti, protektem pikinini blong yu, mo stap longwe long ol had problem long filing, hemia i tekem tu ol adiksen blong yu mo blong ol narawan.” I kolosap olsem se God i luksave finis evri problem ia we bae yumi fesem, mo i givim yumi wan rod blong stap longwe long haf blong olgeta. …

Wetem eniwan long ol komanmen blong God, yumi gat joes ia blong folem olgeta, o blong no wantem save long olgeta. Be taem mi stap tingting long Tok blong Waes olsem wan set blong ol gaedlaen we i kam long God, we i luksave mo protektem yumi long plante jalenj, mi tingting: “?Olsem wanem sapos evriwan long ol komanmen blong God oli wok long wei ia nomo?” ?Olsem wanem sapos wan Papa long Heven, we i bin eksperiensem laef ia mo ol jalenj blong hem, i bin givim yumi wan gaedbuk blong helpem yumi blong go raon long wol ia we yumi no harem i soa tumas? ?Mo olsem wanem sapos Hem i givim hemia long yumi from se Hem i lavem yumi mo i wantem protektem yumi?

?Yu yu wantem glad wetem wanem we yu gat, blong yu stap hapi mo stap talem tangkyu? “Yu yu no mas gat tingting blong wantem haos blong neiba blong yu” (Eksodas 20:17; Mosaea 13:24).

?Yu wantem stap longwe long fasin blong stap sem, go long kalabus, bigfala mane blong rilis long kalabus, mo ol fit blong kot? ?Yu wantem holemtaet tras mo respek blong ol pipol—mo wok blong yu? “Yu yu no mas stil” (Eksodas 20:15; Mosaea 13:22).

“Yu wantem stap kolosap long God blong mekem se Hem i save lidim mo daerektem yu, mo helpem yu blong tekem ol hevi problem blong yu? “Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu” (Matiu 22:37).

Mo lis i gohed mo i gohed. Evri singgel komanmen oli save protektem yumi blong hat i harem nogud, i mekem laef blong yumi i isi moa, mo i kipim yumi aotsaed long trabol, o i jes helpem yumi blong faenem pis. Mo evri samting ia, yumi no pem tumas mane from mo i stret long situesen blong yumi. (!I no gat fi we i haed i stap!)

Mi no wantem se yu ting se mi stap daonem ol komanmen blong God se oli olsem ol gaedlaen nomo, o ol gudfala help long laef. I moa bigwan bitim hemia. Be oli simpol tu. Papa long Heven i no save protektem yumi long evri samting. Be, olsem wan papa we i lavem yumi, Hem i wantem blong mekem yumi rere, mo i wantem protektem yumi long praes blong joes blong yumi—taem Hem i lidim yumi blong mekem ol joes we oli gud moa.

I tru. Yumi save obei long ol komanmen, be stil, bae ol nogud samting oli hapen yet. ?So. from wanem bae yumi wantem save o mekem?

From se yumi neva save wanem nao Hem i stap protektem yumi long hem tru long fasin blong yumi blong stap obei. From se hem i helpem yumi blong mekem yumi fri long wan laef we yumiwan, yumi stap givim kil long yumiwan bakegen. From se fasin blong stap obei i helpem yumi blong stap kolosap long God. From se hemia i stap putum yumi long wan ples we bae yumi sakem sin taem yumi jusum rong. From se yumi trastem God se Hem i save olsem wanem blong blesem mo protektem yumi.

Mo lis i gohed mo i gohed. Lis ia i moa longwan bitim lis blong ol risen blong no stap obei long ol komanmen.

Blong gud o nogud blong mi, God i letem mi mi jusum hamas mi wantem obei long hem. Mi gat janis blong jusum hamas nao mi wantem stap open long ol blesing we Hem i gat blong mi. So, ?from wanem bae mi obei long ol komanmen? From se mi wantem laef blong mi i open bigwan long help ia we God i stap traem blong givim long mi.