!Be Mi Mi Hanggri!
Isadora Marques Garcia
São Polo, Brasil
Pikja i kam long Allen Garns
Long wan dei we i bin ren, long misin blong mi long Kolombia, kompanion blong mi mo mi i gat wan aoa i stap yet bifo mifala i mas gohom. Mitufala i bin hanggri mo mitufala i taed from mitufala i wokbaot ful dei. Mitufala i no faenem wan man blong tij.
Mo tu, mitufala i no holem wan mane, mo mitufala i no bin pem kaekae long stoa. Mitufala i save se bae mitufala i gohom mo bae i no gat samting blong kakae. Mi traem sakemaot ol nogud tingting ia mo lukluk nomo i go long wok.
“!Luk wanem mi faenem!” Kompanion blong mi i singaot.
Hem i faenem sam mane i foldaon long graon. Taem mi luk fes blong hem, mi save talem se hem i gat sem tingting olsem we mi mi gat. !Bae mitufala i go pem wan kaekae!
Be afta smol taem, kompanion i talem: “No. !Mane ia i no blong yumitu!”
“!Be mi mi hanggri!” Mi tingting long miwan.
Mi talem long hem: “Huia mane blong hem, bae yumitu no save faenem naoia long taem ia long naet.”
Hem i talem se bae mitufala i prea. Mi save se hemia i raet, be wan smol pat long tingting blong mi i talem se hemia i wan krangke samting . Mitufala i bin wok had, ful dei. Mitufala i hanggri. Maet, blong faenem mane ia i wan blesing long seves blong mitufala.
Nao mi tingbaot mama blong mi. Taem mi yangfala, hem i tijim ol sista blong mi mo mi, blong mas stap ones oltaem. Hem i bin wan eksampol long mifala mo hem i bin prea se bae mifala i gat strong paoa long tingting blong save stap ones. Mi bin save se sapos hem i stap ia, bae hem i no harem gud sapos mi no tekem stret desisen.
Mekem se mitufala i bin prea. Mitufala i bin askem Papa long Heven blong helpem mitufala blong faenem huia mane blong hem. Sam minit afta, wan yang man i kam, i stap lukaotem wan samting. Wota blong ae blong hem i ron, mo i luk se hem i harem nogud tumas. Mi mo kompanion i go luk hem, mo faenemaot se mitufala i gat wanem we hem i stap lukaotem.
Mitufala i givimbak mane blong hem, mo hem i stap ripitim tangkyu long mitufala. Hem i talem se hem i nidim mane ia blong pem skulfi long yunivesiti. Sapos hem i no pem, bae hem i no save rejista. Ae blong mi i fulap long wota, mo mi bin sakem sin blong mi, from se mi bin wantem spendem mane ia. Mitufala i karem kontak blong hem, mo mitufala i bin save tijim hem mo faef nara pipol. Long naet ia, mi talem tangkyu long kompanion blong mi from gudfala eksampol blong hem.
Mi save se God i stap blesem yumi taem yumi ones. Mitufala i no bin gat wan samting blong kakae long naet ia, be mi tingbaot se mitufala i go slip mo no harem hanggri. Blong faenem mane ia i wan blesing long en.