Haos Oven I Wok Wetem Fet
Lois Mansius
Teksas, YSA
Pikja i kam long Kopp Illustration
Taem hasban blong mi, Mak, mo mi, i stap laef wetem ol fo smol pikinini blong mifala long Is saed blong Yunaeted Stet, mifala i stap long wan haos we i gat wan haos oven blong hotem haos, we i wok wetem oel. Blong jekem level blong oel, bae mifala i putum wan stik wetem mak i go insaed long tank. Taem oel i stap go daon, bae mifala i ringim oel kampani i kam fulumap tank.
Long wan taem long manis Jenuware, we ples i kolkol, mifala i gat problem blong mane. Mi iven tekem wan haf taem wok long ol naet, blong wok long wan restrong blong karem smol moa mane, be mifala i gat trabol yet blong stap gud kasem en blong manis. Naoia, mifala i mas jusum blong pem taeting, o pem oel blong mekem haos i hot. Mifala i makem oel, mo i gat 5 sentimeta nomo i stap. Hemia bae i inaf blong wan o tu dei nomo. Be mifala i disaed blong putum fet blong mifala i stap long Lod mo pem taeting blong mifala.
Long nekis dei, Mak i makem oel bakegen. I stap yet long 5 sentimeta. Mak i makem bakegen long nekis dei bakegen, mo i stap yet long 5 sentimeta. Haos i stap hot, be oel i no stap go daon. Afta 2 dei long hemia, oel ia i stap semmak nomo long 5 sentimeta. Mi tingbaot se, long naet, mi krae from se mi glad taem mi harem haos i hot bakegen. Oven blong haos i no stap ron wetem oel ia; i stap ron wetem fet.
Mi filim olsem wido ia we i bin fidim profet Elaeja mo faenem se kaekae blong hem i no sot, mo oel blong hem tu i no emti (luk long 1 King 17:16). Taem pei dei i kam, Mak i makem oel bakegen. Be long tetaem ia, hem i stap long 2.5 sentimeta. Naoia oel i stap go daon, be mifala i gat mane blong fulumap tank.
Famli blong mifala i testem promes blong Lod we i stap long Malakae 3:10 we i talem se bae yumi mas pruvum long Hem mo luk sapos bae Hem i no openem ol windo blong heven, mo kapsaetem wan blesing we i no gat rum we i bigwan inaf blong tekem blesing ia.
Long eniwan we i gat tu tingting long blesing ia blong pem taeting, mi leftemap tingting blong yu mo akseptem invitesen blong Lod blong pruvum Hem. Blong pem taeting i openem ol windo blong heven, mo tru long fasin blong stap obei, mo stap fetful long ol loa mo komanmen blong Lod, yumi gat blesing long plante wei.
Famli blong yumi bae i neva fogetem taem ia we oel oven blong haos i bin wok wetem fet nomo, be i no oel.