Ol Yang Adalt
Stap Lan blong Skinim Skank
Taem mi tingbaot fasin blong stap dipen long yuwan, wan toktok blong misin presiden i kam long maen blong mi: “Yu skinim skank blong yuwan.” (Skank i wan blak mo waet animol we i sting) Yes, i wan defren toktok smol, be i gat plante samting i tru insaed long aedia biaen long toktok ia se, i gat ol had samting insaed long laef blong yumi we yumi no save askem ol narawan blong fesem long bihaf blong yumi.
So, ?Olsem wanem nao yumi “skinim skank blong yumi bakegen” long saed blong fasin blong stap dipen long yumiwan long saed blong filing? ?Olsem wanem yumi fesem ol samting we i mekem tingting i trabol mo lan blong handelem evri filing blong yumi?
Tangkyu tumas, yumi no stap yumiwan long tudak—ol risos oli fulap i stap raon long yumi. Yumi save faenem sam long “14 Wei blong Karembak Helt blong Yu long saed blong Filing I Kambak long Stret Rod.” Moa impoten, yumi save mekem laef i kam simpol taem yumi stap folem ol komanmen (luk long pej 44).
Blong lanem blong gat ansa long evri samting we laef i sakem i kam long yumi, i wan longfala rod. Blong stap dipen long yuwan long saed blong filing, i no minim se, evri taem, bae yumi filim olsem we yumi wantem. Hem i minim se, tru long gladhat blong Jisas Kraes, mo tru long ol traehad blong yumiwan, bambae yumi save kontrolem ol filing blong yumi long ol wei we oli helti mo i givim gud risal. Presiden M. Russell Ballard i givim yumi sam gudfala advaes blong mekem, blong save balensem ol samting ia (luk long pej 48).
Taem yumi stap traehad blong stap dipen long yumiwan long saed blong filing, maet bae yumi filim olsem wan smol pijin we i no strong (luk long pej 46), be taem yumi wok mo kam wan wetem Papa long Heven, yumi save gat tras se, bae wan dei, bambae yumi “girap olsem we yumi gat wing olsem bigfala pijin ia, igel” (Aesea 40:31), we i wan flas wei blong talem se bambae yumi gat paoa blong skinim skank blong yumi bakegen.
Gud lak,
Heather J. Jonson