Stat long Fraet I Go Kasem Bigfala Lafet

Pikja

study desk

Pikja i kam long Greg Newbold

Mi bin aktiv long Jos long ful laef blong mi. Mi bin go long wan fultaem misin, mi mared insaed long tempol, mo mi bin help blong lukaotem ol fofala naes gel blong mifala. Be ol yia oli pas, mo mi luk se sam long ol fren blong mi oli nomo memba blong Jos. Sam memba blong famli oli stap yusum sosol media blong kwestinim mo tokbaot nogud ol Lida blong Jos. Mo naoia, mi tu bakegen, mi stat blong gat tu tingting abaot Jos blong fas taem long laef blong mi. Ol tu tingting blong mi ia, oli mekem se mi fraet long fiuja. Long sam taem, mi filim se mi nomo gat hop nating.

Long taem ia we i bin had, mi bin fosem miwan blong go long stek konfrens. Taem stek presiden i stap toktok, hem i talem: “Yumi stap ia blong yumi mas laef tru long ol taem we i had we oli stap long fored; yumi nid blong muvaot blong lafet wanwan taem, i go blong stap lafet long tok blong God evri dei. Yumi nidim blong mekem i kam faswan long laef blong yumi, blong gat skripja stadi evri taem. Sapos yumi mekem olsem, mi promesem se bambae yumi no save stap fraet.”

Toktok ia, “fraet,” i pulum tingting blong mi. Mi luksave se mi letem gospel stadi blong mi i foldaon. Risal blong hem: fraet i kavremap laef blong mi. Mi bin disaed blong traem advaes ia blong stek presiden blong mi.

Mi go hom, mo mi mekem wan ples blong mi stadi long gospel long hem. Long kona blong wan rum, mi setemap wan smol tebol wetem wan naes jea. Mi putum sam pikja blong Sevya i go long wol blong haos. Mi karem ol skripja blong mi, sam pensel, mo wan buk blong raet long hem. Mi statem stadi blong mi wetem wan prea.

Afta long wan o tu wik, mo developem wan evri dei fasin. Faswan, bae mi lisin long wan toktok blong jeneral konfrens, mo afta, mi stadi long wan topik blong gospel. Afta, bae mi ridim samfala japta long Buk blong Momon, mo finisim stadi blong mi wetem wan prea we i kam long hat blong mi i go long Papa long Heven.

I nomata long ol samting we i kam pulum tingting blong mi, mo no mestem wan dei blong stadi long gospel blong sikis manis. Mi kam blong andastanem moa plante long ol topik blong gospel, mo i mekem rilesensip blong mi wetem Papa blong mi long Heven i kam strong moa from mi stap prea evri taem mo wetem wan tru tingting.

Naoia, testemoni blong mi i kam wan samting we mi save dipen long hem. Ol tu tingting blong mi oli go lus from niufala witnes we mi bin kasem abaot gospel ia we i bin kambak. Mi luk se mi no stap wari tumas from se mi stap trastem God moa. Mi filim we fraet mo fasin blong nomo gat hop, oli aot long mi. Mo tu, mi lusum intres long ol aktiviti blong westem taem, mo mi luk se fasin blong mi i kam gud moa mo kaen moa wetem ol narawan.

Taem mi bin mekem folem advaes blong stek presiden blong mi, God i bin save jenisim mi. Mi kasem hiling, mo kam oraet tru long han blong Masta Hemwan, from se mi bin lafet long ol toktok blong Hem.