Sapos Yufala I Lavem Mi
2019 yia stamba toktok blong ol yut i wan singaot blong tekem aksen—wan invitesen we i kam stret long Sevya blong yumi. ?Yufala evriwan i folem? ?Yufala i lavem Hem? ?Yufala i wantem folem ol futstep blong Hem?
Sevya Jisas Kraes i bin mekem wan samting we, yumiwan, yumi no save mekem blong yumiwan. ?Mo Hem i askem wanem from hemia? Hem i stap askem se yumi stap obei ol komanmen blong Hem, blong yumi kasem blesing ia blong oltaem gat Spirit blong Hem i stap wetem yumi (luk long Moronae 4:3).
Ol komanmen oli wan presen blong lav. Sevya i taem long simpol wei nomo: “Sapos yufala i lavem mi, bambae yufala i save obei long ol tok blong mi,” be ?From Wanem? !From Hem i lavem YUFALA! Hem i wantem yu blong stap hapi. Hem i wantem laef blong yu blong i fulap long glad mo fulap long plante gudfala rod. Hem i wantem yu blong filim se yu sef mo yu gat proteksen long ol rabis samting blong wol. Hem i wantem kapsaetem, antap long yu ol blesing we oli bigwan tumas we “bae i no gat inaf rum blong tekem” (3 Nifae 24:10). Hem i wantem yu blong gobak mo laef wetem hem bakegen mo gat wan pat long evri blesing we Papa long Heven i bin promesem.
Oltaem tingbaot hamas Papa long Heven i lavem ol pikinini blong Hem. Hem i lavem yu wetem wan lav we i stret evriwan. Yu save soem lav we yu gat long Hem taem yu stap obei long ol komanmen blong Hem. Ol stret mo gud aksen blong yu, bae i tekem ol bigfala blesing i kam long yu mo olgeta we oli stap raon long yu.
Olsem we profet blong yumi, Presiden Russell M. Nelson i bin talem: “Mifala i nidim blong yu stap wetem mifala long yut ami ia blong Lod. !Bae i no semmak nating sapos yufala i no stap!” Hem i invaetem yufala blong “stanap yufalawan we yufala i defren long wol ia” taem yufala i laef folem ol standet we oli stap insaed long Blong Ol Yut Oli Kam Strong, mo taem yufala i stap obei long ol komanmen—blong yufala “i luk olsem, i saon olsem, mo mekem samting olsem wan tru disaepoel blong Jisas Kraes” (“Hope of Israel” [wol yut divosen, 3 Jun 2018], 8, HopeOfIsrael.lds.org).
Taem yu stap traehad blong obei long Lod mo ol profet blong Hem, paoa blong Tabu Spirit bae i fulumap yu wetem lav blong God, mo bae i testifae long yu se yu blong heven olsem wan boe o gel blong God. Olgeta blesing ia oli stap gro taem yu stap traehad blong laef long wan stret mo gud laef. Lod mo profet, tufala i trastem yu. Tufala i lavem yu. Mifala i promesem, se ful tras long yuwan, wan stret save, mo kamfot bae i kam taem yu stap obei mo kipim olgeta komanmen.