Ol Investigeta we Oli Foldaon long Ol Tri

Pikja

man sitting in tree

Pikja i kam long Robert Crawford

Long ol yang misinari we oli stap wokbaot folem ol strit blong Buenos Aeres, Ajentina, long 1995, promes ia we oli bin kasem long wan memba blong Eria Presidensi, i saon defren smol: “Sapos yufala i wok had mo stap obei fulwan, ol investigeta bae oli folfoldaon aot long ol tri i kam daon blong oli kasem baptaes.” Mifala i faenemaot promes ia wan sot taem afta.

Papa blong mi i stap katem klinim wan long ol tri long saed rod long fored blong haos blong mifala. Taem hem i stap antap long tri mo stap katem klinim tri, hem i luk tu yangfala man we tufala i stap wokbaot i kam long hem long rod. Taem tufala i pas andanit long tri, hem i singaotem tufala long Inglis.

Papa blong mi i no stap toktok Inglis, be hem i save sam toktok, mo hem i wantem save wanem ia tufala i stap mekem. ?Huia tufala yang man ia, mo tufala i stap mekem wanem long ples ia?

Tufala misinari i stop, tufala i stap lukaotem se voes i kam wea. Nao papa blong mi i kamdaon long tri, i toktok long tufala. Hem i sapraes long mesej we tufala i gat, mo fasin blong tufala, nao hem i invaetem tufala i kam long hom blong hem.

Eksperiens blong papa blong mi wetem relijin i no bin gud mo lego tingting blong hem i trabol smol, be mesej ia blong gospel we i kambak, i toktok i go long hat blong hem. Hem i bin gotru sam strong taem, mo hem i bin save se hem i nidim blong jenis. Hem i lisingud taem ol misinari oli tijim hem, mama blong mi, bubuwoman blong mi, mo mi.

Mi mi gat 11 yia nomo, be ol trutok we oli bin tijim i tajem mi—mo mama blong mi, mo bubuwoman blong mi. Long en, mifala evriwan i bin baptaes sam manis afta, long Septemba 1995.

Ol sid blong fet we ol misinari oli planem insaed long hat blong mifala, i no longtaem afta, felosip i fidim ol sid tru long ol fren long jos, sam moa tijing blong gospel, mo ol gudfala eksperiens wetem ol strong lida blong Jos. From naes welkam we mifala i kasem, ol sid blong fet blong mifala “i folfoldaon long gudfala graon, nao oli gro, mo oli gat frut we olgeta wanwan oli karem handred frut blong olgeta” (Luk 8:8).

Ol frut blong fet blong mifala, we mifala i stap glad long ol tedei—kolosap 25 yia afta—i gat wan strong komitmen long gospel we i kambak blong Jisas Kraes, ol blesing blong tempol, mo wan ful mo hapi laef wetem wan niu jeneresen blong ol memba blong famli we mifala i joen blong ful taem we i no save finis.

Oltaem bae mifala i talem tangkyu tumas from tufala fetful misinari we oli testem wan promes blong insperesen.