Foki ki he Temipalé Hili e Taʻu ʻe 20

Kuo teʻeki ke toe foki ʻa Sosiua Valoa, taʻu 85, ki he temipalé ʻi he taʻu ʻe 20 tupu. Naʻe ʻikai ke ne fai ha meʻa hala; naʻe ʻikai ke ne ifi tapaka, pe inu pea naʻá ne kei tui pē hono kāmení, ka naʻá ne saiʻia heʻene ngoué. Naʻá ne ngāue taʻe-tuku ʻi heʻene ngoué ʻi he ʻaho kotoa pē; naʻá ne ʻalu ki he lotú he taimi ʻe niʻihi pea liʻaki lotu pē ia he taimi ʻe niʻihi.

Naʻe hoko e foha ʻo Sosiuá ko e tokoni ʻuluaki ʻi he kau palesitenisī fakakoló pea kuó ne feinga mālohi ʻi ha kiʻi taimi ke foki mai ʻene tangataʻeikí ki he temipalé, ka naʻe ʻikai ke ola lelei.

ʻI he taimi ko ʻení, naʻe ngāue fakafaifekau ha ongomātuʻa mali ko ʻEletā mo Sisitā Vaʻenuku ʻi hono feituʻú, pea naʻá na mālohi mo ʻofa ʻi hona fatongia fakaetauhi kia Sosiuá. Naʻe ngāue ʻa ʻEletā Vaʻenuku mo ia ʻi he ngoué lolotonga iá naʻe feimeʻatokoni mo taʻo keke ʻa Sisitā Vaʻenuku maʻana he ʻaho kotoa pē. Naʻe ʻave ʻe Sosiua e meʻakai maʻá e fāmili Vaʻenukú mei heʻene ngoué pea naʻa nau hoko ko e kaungāmeʻa lelei ʻaupito.

ʻI he ʻaho ʻe taha naʻe kole ange ʻe he fāmili Vaʻenukú kia Sosiua ke fakakaukau muʻa ke foki ki he temipalé. Naʻe ʻikai ke tali ange leva ʻe Sosiua. Neongo ʻení, naʻe hokohoko atu pē ʻe he fāmili Vaʻenukú ke tokoniʻi ʻa Sosiua mo fakatupulaki hanau vā fetuʻutaki mālohi mo fetokangaʻiʻaki.

ʻI he Konifelenisi Lahi ʻo ʻEpeleli 2019 naʻe pehē ai ʻe ʻEletā Keliti W. Gong: ʻI he ʻaho ní,ʻoku fakaʻamu hotau Fakamoʻuí ʻe hanga ʻe he meʻa ʻoku tau faí mo e tuʻunga te tau ʻi aí ʻo fakaafeʻi e niʻihi kehé ke nau haʻu ʻo muimui kiate Ia.”

Naʻe ʻikai ngata pē hono fakaafeʻi ʻe ʻEletā mo Sisitā Vaʻenuku ʻa Sosiua ke foki ki he temipalé ʻaki ʻena fakalea ki aí ka naʻe kau ai foki ʻena tōʻonga moʻuí: ko e ongo faifekau ʻofa ʻokú na fakahoko e ngāue ʻa e ʻEikí, ngāue fakaetauhi taha taha ki he fānau ʻa e ʻOtuá. Naʻe ngāue ʻa e sīpinga ko ʻeni ʻo e ʻofá ʻi he loto ʻo Sosiuá pea fāifai ʻo ola lelei.

Naʻe toe pehē pē mo e foha ʻi he fono ʻo Sosiuá, ko Tāufa, kuo teʻeki ke ne ʻalu ki he temipalé ʻi he taʻu ʻeni ʻe 20 tupu. Ne ngāue fakaetauhi foki mo e fāmili Vaʻenukú kiate ia—pea ko e taimi ko ʻení, naʻá na fakaafeʻi ʻa Sosiua mo Tāufa ke na omi ki he temipalé. Naʻá naʻofa ʻia Tāufa pea naʻá na fuʻu fiefia ʻi he taimi naʻá ne pehē ai “ʻio”.

Ne palani ha folau ki he temipalé!

Naʻe teuteu ʻa Tāufa mo hono uaifí, kau atu ki ai mo e taha ʻo e makapuna ʻi he fono ʻo Sosiuá, ke nau folau hili hono maʻu ʻenau lekomeni temipalé. Naʻe fuʻu ʻohovale e fānau ʻa Tāufá ke sio ki he foki ʻenau tangataʻeikí ki he temipalé hili ia ha fuʻu taimi lōloa. Naʻa nau tanganeʻia ʻi he ongomātuʻa faifekau mali anga fakatōkilalo ko ʻení pea mo e liliu kuó na tokoni ke liliu ʻenau tangataʻeikí.

ʻI he toe e uike ʻe taha ki he folaú, naʻe toe lahi ange ʻenau fiefiá, ʻi he fakakaukau ʻa Sosiua ke ʻalu foki mo iá.

ʻI he ʻaho 19 ʻo Fēpueli 2019, naʻe tukufolau ai ʻa ʻEletā mo Sisitā Vaʻenuku, Sosiua, Tāufa mo hono ongo ʻofefiné mo hona ongo husepānití mei Haʻafeva ki Nukuʻalofa pea nau hū fakataha ʻi he temipalé ko ha fāmili.

Naʻe hoko ia ko ha aʻusia fakafiefia ki he tokotaha kotoa pē naʻe kau ki aí. Ko e fiefiá ko e konga lahi ne tuʻunga ia ʻi he ʻofa mo e tāsīpinga ʻa ha ongomātuʻa faifekau mali faimateaki ʻi heʻena fakaafeʻi ha tangata ʻe toko taha ki he temipalé . . . ʻo lahi ange ʻi he lea pē.