Naʻe Fakahaofi ʻe Heʻeku Fuofua Lotú ʻeku Moʻuí

Naʻe ʻikai ke u lavelave ʻiloa ʻa e fakapoʻuli ʻo ʻeku moʻuí kae tālunga ʻeku aʻusia ʻa e māmá. Ne u tupu hake ʻi ha ʻapi naʻe ʻi ai e faitoʻo kona tapú, ʻolokaholó, fetāʻakí mo e ngaohikovia mo e ngaohikovia taupotu tahá ʻi he ngaahi tūkunga kotoa ne ʻikai hāsino maí. Ne u toki ʻilo ʻi hoku taʻu hongofulu tupu lahí ʻi hono fakahā mai ʻe ha kaungāmeʻa naʻe ʻikai ko e angamahení ia pea ʻoku ʻikai ke lelei e meʻa ne u fouá.

Naʻe iku hono uesia kei siʻi aú ki heʻeku ngāue hala moʻoni ʻaki e faitoʻo kona tapú mo e ngaahi palopalema fakaeʻatamai pea faingataʻa ai kiate au ke u falala pe fetuʻutaki mo e niʻihi kehé, ʻo aʻu pē ʻou manavahē fau ke nofo toko tahá.

Naʻá ku ongoʻi ʻo hangē ha foʻi pomu ne mei pā ʻi he 2018.

Naʻe fuʻu lahi e faingataʻá ke lava ʻo makātakiʻi pea ne u fakakaukau naʻe ʻikai ke u loto ke toe moʻui. ʻI he ngaahi momeniti kimuʻa peá u fakakaukau ke fakangata hoku mamahí, ne fakafokifā ʻeku fanongo ki he leʻo ʻo ʻeku kui fefiné. . . .

“Ke ke lototoʻa ʻofaʻanga pea falala ki he ʻEikí. ʻOkú Ne ʻofa ʻiate koe.”

Ne ohi hake au ʻi ha fāmili Kalisitiane pē pea hangē, ne nau saiʻia he meʻa kotoa fekauʻaki mo e “Māmongá”. Ka naʻe fanauʻi ʻeku kui fefiné ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní pea naʻá ne mēmipa ai pē ʻo aʻu ki heʻene finemuí. Naʻe fakamālohiʻi ia ke ne ului ki ha siasi faka-Kalisitiane kehe hili ʻene mali mo ʻeku kui tangatá.

ʻI he kotoa ʻo ʻeku moʻuí naʻá ne talanoa fakapulipuli mai kiate au fekauʻaki mo ʻene ʻofa he Siasi naʻe ohi hake ai iá pea mo ʻene fakamoʻoni ki he ongoongoleleí. Naʻá ne vahevahe mai e ngaahi folofola mo e ngaahi lea ʻa e “Māmongá” ʻi he taimi naʻá ma talanoa aí. Naʻá ne faʻa lea ʻaki e meʻa ko ʻení, “Ke ke lototoʻa ʻofaʻanga pea falala ki he ʻEikí. ʻOkú Ne ʻofa ʻiate koe.”

Naʻe ʻikai ke u poupou ki he tui faka-Kalisitiané ʻi he taimi ko iá ka e hangē ne ʻi ai ha ʻuhinga, naʻe ongo ki hoku telingá ʻa e ngaahi lea ʻa ʻeku kui fefiné, ne u ʻilo ai ne fie maʻu ke u lotu. Ne u tūʻulutui ʻo fai ʻeku fuofua lotú. Ne u tangi he kotoa ʻo e taimi [ne u lotu aí]—ne fuʻu lahi peá u fifili pe ʻe mahino nai ki he ʻOtuá ʻeku ngaahi leá ʻi heʻeku halotulotú.

Ne u tautapa ki he Tamai Hēvaní ke fakamoʻui hoku laumālié, ke tokoniʻi au ke u ikunaʻi ʻa e faingataʻa kuo lōmekina ai au ʻi he kotoa ʻo ʻeku moʻuí. Ne u fai kiate Ia ha fakapapau: “Kapau te ke tokoniʻi au pea tokoni ke u moʻui, te u kamata ʻalu leva ki he lotú ʻi he taʻu foʻoú.”

Ne u fuʻu ongosia ʻi he lotú ke feinga ki hoku mohengá pē ke fakalaveaʻi au. Ne u makanumi pē ʻi he faliki ne u ʻi aí ʻo mohe ʻo aʻu ki he pongipongí.

ʻI heʻeku ʻā hake . . . ne u ongoʻi lelei ange.

ʻI he ʻosi atu e ngaahi ʻaho mo e ngaahi uike, ne hokohoko atu ai pē ʻeku ongoʻi lelei ange mo toe lelei angé. ʻI he hoko mai e fakaʻosinga ʻo e taʻú, ne ʻikai ke u toe fakafisingaʻi he naʻe mahino hono fakahoko ʻe he ʻEikí ʻa ʻEne konga ʻo e fakapapaú pea ne u fakapapau ke u fakahoko mo haʻakú.

Naʻe fakahaofi ʻeku moʻuí he ʻaho ko iá ʻe he ngaahi lea ʻa ʻeku kui fefiné. Naʻe tataki au ʻe he ngaahi lea tatau pē ko iá ke u taipeʻi ʻa e LDS.org ʻi heʻeku komipiutá ʻi he taimi ke u fekumi ai ki ha siasi. ʻI he kotoa ʻo e ngaahi siasi ne u mei fili mei aí, ko e meʻa fakanatula taha pē kiate aú ke u fekumi ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní koeʻuhí ne u ʻofa ʻi heʻeku kui fefiné pea naʻá ne ʻofa ʻi he “Kau Māmongá.”

ʻI heʻeku fakaʻuli atu ki he falelotu ʻi he Hala Luá ne u ongoʻi naʻe lōmekina au ʻe ha faingataʻa. Ne u ongoʻi hangē ne u fai ha meʻa naʻe halá. ʻI hoku ʻatamaí ne hangē ne ongo mai ha leʻo ʻo pehē, “meʻa ní ʻoku ʻikai te ke loto ke ke ʻi ʻapi, ʻoku ʻikai nai ke ke fie maʻu ha uaine, ʻoku ʻikai nai ke ke fie mālōlō.”

Naʻe fuʻu mālohi ʻa e ongó pea ʻi he taimi ne faifai peá u taʻofi ai ʻa e kaá ke tuʻú ne lahi ʻeku teteteté ke hū ki tuʻa mei he kaá. Ne meimei ikunaʻi au ʻe he veiveiuá mo e ilifiá ka ne taʻeʻoua ʻeku manatuʻi ha meʻá: “Ne u ʻi heni kimuʻa, ʻoku ou ʻilo ʻa e faingataʻa ko ʻení, ʻoku ou ʻilo te u lava ʻo lotu, pea ʻe tali mai ʻe he ʻOtuá.”

Ne u lotu leʻo lahi. Naʻā ku pehē, “ʻOmai kiate au ha fakaʻilonga ko e ʻuhinga ia ʻo ʻeku ʻi hení.” ʻI heʻeku leá, ne vave ʻeku ongoʻi nongá pea naʻá ne lōmekina au ʻo ne kapusi atu ʻa e faingataʻá.

Ne u hū ki tuʻa mei he kaá ʻo lue ʻo hū ʻi he matapā ʻo e falelotú. Ne vave ʻema fesiofaki fakamamaʻu mo ha tokotaha foʻou pea ne vave ʻeku ongoʻi naʻá ma fehokotaki peá u ongoʻi fiemālie ki ai. Lolotonga e fakatahá naʻá ne fanafana mai ke tokoniʻi au ke mahino ʻa e ngaahi pōpoakí. ʻI he tuku ʻa e fakatahá, naʻá ne ʻeke hoku hingoá mo hoku fiká. Naʻá ne ʻohovale ʻi heʻene fanongo ki hoku hingoa fakafāmilí.

Naʻá ne pehē mai, “Ko hoku hingoa fakaʻosí ia.”

Ne ma ʻiloʻi ai ko ʻema ongo kui tangatá ko e ongo tautehina pea ko hono moʻoní ne ma fāmili. ʻOku ou manatu ki heʻeku ongoʻi lomekina fakaeloto ʻi heʻeku ongoʻi e lea ʻofa ʻa e ʻEikí ki hoku lotó ʻo pehē, “Ko ʻena hoʻo fakaʻilongá.”

Mei heni ne hoko vave e meʻa kotoa pē. Ne u ako e ongoongoleleí mei he kau faifekaú, mali mo ha husepāniti fakaʻofoʻofa pea papitaiso au hili e ʻaho ʻe ua.

Kuo hokohoko atu hono fakafonu ʻeku moʻuí ʻaki e maama ʻo Kalaisí, ko ha maama naʻe ʻikai ke u tui naʻe ʻi ai ʻi heʻeku kei siʻí. ʻOku ou houngaʻia ʻaupito ʻi heʻeku kui fefiné ʻi heʻene tuí mo e lototoʻa pea mo ʻene fakapapau ke fakatafoki au ki he ongoongolelei ʻo Sīsū Kalaisi kuo toe fakafoki maí; ki hoku husepānití mo hono fāmilí ne nau ʻofa ʻiate au ʻi hoku ngaahi palopalemá; ki hoku tokoua ne toki ʻilo ní kuó ne ʻai ke u ongoʻi lata ʻi he ʻaho ko iá pea ki heʻeku Tamai Hēvaní ʻa ia ʻokú Ne tatali MAʻU PĒ ke lilingi mai ʻEne ngaahi tāpuakí kiate kitautolu.