Founga ʻOku Ou Teuteu Ai ki ha Temipale ʻi ʻInitiá

ʻI heʻeku tupu hake ʻi ʻInitiá, naʻá ku lotu Hinitū mo hoku fāmilí. Ne ʻākilotoa maʻu pē au ʻe he tui ko ia naʻe tokolahi ha ngaahi ʻotua ke lotu ki aí. ʻI heʻeku kei siʻí, naʻe ʻi ai haʻaku ngaahi kaungāmeʻa ko ha kau Kalisitiane. Naʻa nau fakamatala kiate au fekauʻaki mo ha ʻOtua pē ʻe taha naʻá Ne fakatupu ʻa e māmaní mo e kakai kotoa pē. Naʻe kamata ke u fifili pe ko e hā e ʻuhinga naʻá ku lotu ai ki ha ngaahi ʻotua tokolahí, lolotonga iá ʻoku tui e niʻihi kehé ki ha ʻotua pē ʻe tahá.

ʻI heʻeku kei ʻi he ako māʻolungá, naʻá ku fai ha ngaahi tōʻonga ʻoku kovi. Naʻe lahi ʻeku maʻu kava mālohí, naʻá ku taʻefakaʻapaʻapa, pea naʻe loto-mamahi hoku fāmilí ʻi hoku ʻulungāngá. Ko ia naʻá ku hiki leva ʻo kamata ha moʻui foʻou ʻi Haitelapata, ko ha kolo naʻe lahi ai e ngaahi faingamālie ngāué.

Naʻe kamata ke u ongoʻi loto-mafasia mo taʻelata koeʻuhi ko ʻeku tōʻonga moʻuí. Ka ʻi ha ʻaho ʻe taha, naʻá ku fetaulaki ai mo ha ongo tangata ʻe toko ua. Naʻá na fakamatala mai ko ha ongo faifekau kinaua mei he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní pea naʻá na vahevahe mai fekauʻaki mo e ongoongolelei ʻo Sīsū Kalaisí. Pea ne u toe ako ai kau ki ha ʻOtua pē ʻe taha, ʻa ia naʻá Ne faʻu ʻa e palani ʻo e fiefiá maʻá e kotoa ʻo ʻEne fānaú. Naʻe tuaiekemo ʻa hono fakafonu ʻe heʻena pōpoakí ʻa hoku lotó, ʻaki ʻa e fiefia mo e ʻamanaki lelei. Naʻá ku loto ke u ako lahi ange.

Kuó u hoko ʻeni ko ha mēmipa ʻo e Siasí ʻi ha taʻu ʻe fitu. Kuó u liliu, kuó u mātā ha ngaahi mana ʻi heʻeku moʻuí, pea kuó u ako ha meʻa lahi fekauʻaki mo e ongoongoleleí. ʻOku ou saiʻia ʻi he fiefia ʻokú ne ʻomi kiate aú. Ka ʻoku ʻi ai ha konga mahuʻinga ʻe taha ʻo e ongoongoleleí kuo teʻeki ai ke u aʻusia—ko e temipalé.

Talu mei he taimi naʻá ku fuofua ako ai kau ki he temipalé, naʻá ku loto ke u ʻalu ki ai ʻo ako mo ongoʻi ʻa e Laumālié, ke u sila mo hoku fāmilí ki he taʻengatá, mo fakahoko ha ngaahi fuakava mo e ʻEikí. Ka ʻoku ʻikai ke ʻi ai ha temipale ʻi ʻInitia, pea kuo teʻeki ke u maʻu ha faingamālie ke u fononga ki ha temipale. Kuo lotu taʻetūkua ha Kāingalotu tokolahi ʻi ʻInitia fakataha mo au, kuo mau ʻaukai, pea kuo mau pikitai ʻi he faʻa kātaki mo e tui ʻe ʻi ai ha ʻaho ʻe langa ai ha temipale ʻi ʻInitia.

Lolotonga e konifelenisi lahi ʻo ʻEpeleli 2018, naʻe tali ai ʻe he ʻOtuá ʻemau lotú ʻi he fanongonongo ʻe Palesiteni Lāsolo M. Nalesoni ʻe langa ha temipale ʻi Pengalulu, ʻInitiá. He ʻikai toe ngalo ʻiate au ʻa e ʻaho ko iá. Naʻe fakafonu ʻe he Laumālié hoku lotó ʻaki ʻa e fiefia pea naʻá ku loʻimataʻia ʻi he ngaahi lea ʻa e palōfitá. Naʻá ku fakafetaʻi ki he Tamai Hēvaní ʻi he taimi pē ko iá koeʻuhí ko hono tali ʻemau lotú. Pea ʻoku ou fiefia ʻe faifai peá u mamata mo hū ki he temipalé hili ha ngaahi taʻu siʻi mei heni.

ʻOku ou fiefia mo laukau ʻaki ʻeku hoko ko ha mēmipa ʻo e Siasi ʻo Sīsū Kalaisí. ʻOku ou ʻiloʻi naʻe fakafoki mai ʻe he ʻEikí ʻa e ongoongolelei moʻoní ki he māmaní ʻo fakafou ʻi he Palōfita ko Siosefa Sāmitá. ʻOku ou ʻiloʻi ko e temipalé ʻa e feituʻu te tau lava ai ke ʻunuʻunu ke ofi ange ki he ʻOtuá, silaʻi kitautolu ki hotau ngaahi fāmilí, mo ako lahi ange ki hotau taumuʻá. Pea lolotonga ʻeku tatali ke langa ʻa e temipalé ʻi ʻInitiá, ʻoku ou ngāue mālohi ke teuteuʻi au ke u hū.

• ʻOku ou lotua mo ako ʻa e lahi taha te u ala lavá fekauʻaki mo e temipalé, ngaahi fuakava te u fakahokó, pea mo e ngaahi ouau te u maʻu aí.

• ʻOku ou kumi faleʻi ki he kāingalotu kehe kuo nau ʻosi hū ʻi he temipalé, ki he founga ke u teuteu fakalaumālie aí.

• ʻOku ou ako ki he founga ke fakahoko ai ʻa e hisitōlia fakafāmilí koeʻuhi ke u lava ʻo ʻomi e ngaahi hingoa ʻo ʻeku ngaahi kuí ki he temipalé.

• ʻOku ou ʻalu ki ha kalasi teuteu hū ki he temipalé.

ʻOku ou loto ke mateuteu ki he ʻaho te u lava ai ʻo hū ki he temipalé pea fakamuʻomuʻa ia ʻi heʻeku moʻuí. Te u feinga ke u taau maʻu pē ke hū koeʻuhi ke u lava ʻo maʻu ʻa e ngaahi tāpuaki kuo talaʻofa maí, fakahinohino, mo e ngaahi tali ki heʻeku ngaahi lotú kuo fuoloa ʻeku tatali ki aí. ʻOku ʻikai ke u faʻa tatali ki he ʻaho ko iá.