ʻOfa Koe, Te Ne Fakahaofi ʻe Ia

ʻĪmisi

smiling family

Naʻá ku ohi hake mo hoku husepānití ʻema fānaú ʻi he ongoongoleleí. Naʻa mau ako folofola fakafāmili he pongipongi kotoa, lotu fakafāmili, mo e efiafi fakafāmili ʻi ʻapi fakauiké. Naʻa mau ʻalu ki he lotú, maʻu meʻatokoni efiafi fakataha, mo ʻeveʻeva mālōlō fakafāmili. Naʻe ō maʻu pē ʻema fānaú ki he temipalé ke fakahoko e papitaiso maʻá e pekiá, naʻa nau ʻosi mei he seminelí, pea naʻe ngāue fakafaifekau ha toko ua.

Pea ʻi heʻenau matuʻotuʻá, naʻe kamata ke nau fononga ʻi ha ngaahi hala mo e ngaahi fakakaukau naʻe kehe mei he meʻa naʻá ma akonekina kiate kinautolú. Naʻe nofo tahataha pē ʻema fānaú mei heʻenau kau ki he Siasí ʻo aʻu ki he toe pē ʻa e toko taha ʻi heʻema fānau ʻe toko nimá naʻe kei fili ke kaú. Naʻá ma tangi ʻa loʻimata koeʻuhi ko ʻema fānaú mo fifili pe kuó ma tōnounou ko e ongomātuʻa pe naʻe ʻi ai ha meʻa naʻe mei kehe ʻema fakahokó.

Naʻá ma tautapa ki he ʻEikí ʻi ha vahaʻataimi lōloa ke liliu honau lotó, pea ne faifai pea tali mai ʻe he ʻEikí ʻema ngaahi lotú. Kae ʻikai ʻi he founga naʻá ma ʻamanaki ki aí.

Naʻe ʻikai ke Ne liliu pē ʻa e loto ʻema fānaú, ka naʻá Ne fakahā mai naʻe fie maʻu ke ma kamata ʻaki hono liliu homa lotó. Neongo ʻoku ʻi ai ha fatongia mahuʻinga ʻa e mātuʻá ʻi hono akoʻi ʻenau fānaú, ka naʻá Ne fakamanatu mai ko Sīsū Kalaisi ʻa honau Fakamoʻuí mo e Fakamāú.

‘I heʻeku loto fakapapau ke fakahaofi ʻeku fānaú, naʻá ku fakaʻaongaʻi ha ngaahi houa lahi ʻi he lotú, lau ʻeku folofolá, mo e ʻalu ki he temipalé, ʻo fakakaukau kapau te u fai kotoa e ngaahi meʻa ʻoku totonú, te u feʻunga ke tokoni mai e ʻOtuá—ʻo hangē ʻatā pē ʻe iku ʻeku ngaahi angafaí ke puleʻi ʻe he ʻOtuá ʻenau tauʻatāina ke filí pea fakamālohiʻi kinautolu ke nau tui tatau mo aú.

Naʻá ku fuʻu fie maʻu mo hoku husepānití ke fakahaofi kinautolu, ka ko ʻema feinga ke fakahaofí ne lahi ange ia ki he akonakí, tafulú, pe fakahaaʻi e taʻefiemālie ki heʻenau ngaahi filí, ʻo iku ia ki he fakakikihí. Naʻá ma fakatokangaʻi ʻi heʻema loto-hohaʻa ke fakafoki mai ʻema fānaú, naʻá ma teke kinautolu ke nau toe mamaʻo ange. Ko e lahi ange ʻenau ongoʻi ʻema loto-fakamāú mo e loto-mamahí, ko e lahi ange ia ʻenau fakaʻehiʻehi meiate kimauá.

Naʻe liliu ʻeku ngaahi lotú ki ha tautapa ke liliu hoku lotó. Ne u fakatokangaʻi ne tupu mei he feituʻu hala ʻa ʻeku ngaahi ʻuhinga ki hono fie maʻu ke liliu ʻeku fānaú. Naʻá ku lotua ha ʻofa lahi ange. Naʻá ku lotua foki ke ikunaʻi ʻeku ongoʻi mā mo ngalivale ʻi he ʻikai ofi hoku fāmilí ki he ngaahi fāmili haohaoa ne fakaʻaliʻali ʻe hoku ngaahi kaungāmeʻá ʻi he mītia fakasōsialé, ʻi he ʻū tā mei he mali temipale ʻenau fānaú pe ko e papitaiso honau makapuná.

‘I heʻeku tafoki ki he Fakamoʻuí ke fakamoʻui aú, naʻe kamata ke fakavaivai hoku lotó ki heʻeku fānaú. Naʻá ku fakatokangaʻi naʻe ʻuhinga e ʻofa ʻiate kinautolu ʻo hangē ko ʻEne ʻofa ʻiate kinautolú ke fai ha ngaahi liliu. Ko e ʻofá kiate Iá, naʻe ʻikai ko ha founga—ko e meʻa ia naʻá ne fakaʻaiʻai e meʻa kotoa pē naʻá Ne faí. Naʻá Ne pehē naʻe ʻikai ke Ne fai “ha meʻa ʻo kapau ʻe ʻikai ʻaonga ia ki he kakai ʻo e māmaní; he ʻokú ne ʻofa ki he māmaní” (2 Nīfai 26:24).

Naʻe hanga ʻe he falala ki he malava ʻa e Fakamoʻuí ʻo fai ʻEne ngāué (vakai, 2 Nīfai 27:20) ʻo fakaʻatā ke u nofotaha ʻi hono ʻofaʻi ʻeku fānaú mo tuku e fakahaofí ki he ʻEikí. Naʻe ʻikai ʻuhinga ia ke tuku e feinga ke tokoniʻi kinautolú, ka ʻi he taimi ne hoko ai hono ʻofaʻi kinautolú ko e meʻa naʻá ne fakaʻaiʻai ʻeku fengāueʻaki mo kinautolú, naʻe liliu ai e founga ʻeku fengāueʻakí.

Naʻe kamata ke kehe ʻeku vakai kiate kinautolú. Naʻe kamata ke u nofotaha ʻi honau ngaahi mālohingá mo e ngaahi talēnití mo kamata ke vakai ko ha kakai ʻofa, angaʻofa, poto, mo lelei kinautolu.

Naʻe lahi ange ʻeku fakafanongo mo hoku husepānití pea siʻi ange ʻema leá. Naʻá ma fai ha ngaahi fehuʻi fekauʻaki mo ʻenau moʻuí mo e ngaahi meʻa ʻoku nau manako aí. Naʻá ma fakahā ʻokú ma fie ʻilo kae ʻikai ko e loto-fakamaau. Naʻá ma fetongi e fakaangá mo e loto-mamahí ʻaki hono fakahaaʻi e ʻofá, pea naʻe lava ʻema fānaú ʻo ongoʻi naʻe moʻoni ia.

Naʻe hoko homa ʻapí ko ha feituʻu ne nau lava ʻo ongoʻi ai e ʻofá mo e tali leleí. Naʻe tuku ʻenau fakafufū e ngaahi meʻa meiate kimauá pea kamata ke faitotonu mo lea moʻoni kau ki he meʻa ʻoku hoko ʻi heʻenau moʻuí. Naʻe fakaʻau ke mau toe vāofi ange.

ʻOku kei feifeingaʻi pē homau fāmilí, ka ʻoku fiefia ʻema fānaú ʻi he taimí ni he omi ki homa ʻapí mo feohi mo kimauá. ‘Oku nau ongoʻi malu ʻiate kimaua, pea ʻoku ou fakaʻamu te nau lava ʻo ongoʻi e ʻofa ʻa e ʻOtuá kiate kinautolú ʻo fakafou heʻema ʻofá. ‘Oku ʻikai ke u ʻiloʻi pe te nau foki ʻi he moʻuí ni ki he meʻa naʻe akonekina kiate kinautolu ʻi heʻenau kei īkí, ka ʻoku ou ʻiloʻi ʻoku nau ʻi he toʻukupu ʻo e Fakamoʻuí.