Haʻu, ʻo Muimui ʻIate Au: Tohi ʻa Molomoná
Ko e hā ʻOku Vahevahe ai ʻe ʻAlamā e Talanoa kia Mōsese mo e Ngata Palasá?
13–19 Siulai
Hili hono fakafehoanaki ʻe ʻAlamā e folofola ʻa e ʻOtuá ki ha tengaʻi ʻakau (vakai, ʻAlamā 32:28–43), naʻe fehuʻi ange ʻe he kakaí e founga ke tō ai e tengá. Naʻe fakaʻaongaʻi ʻe ʻAlamā e fakamatala kia Mōsese mo e ngata palasá mei he Nōmipa vahe 21 ko ha fakatātā ʻo e ngāue ʻi he tuí (vakai, ʻAlamā 33:19–23).
Ko ha Fakataipe ʻo Kalaisi
Ko e fakataipé ko ha meʻa ia ʻokú ne fakafofongaʻi pe hoko ko e fakamelomelo ‘o ha meʻa pe tokotaha. ‘I he taimi naʻe huhu ai e kau ʻIsilelí ʻe he fanga ngata huhu koná, naʻe hiki hake ʻe Mōsese e ngata palasá, ʻa ia naʻe hoko ko ha fakataipe ʻo Kalaisi. Naʻe fakamoʻui ʻa kinautolu kotoa pē naʻe ngāue ʻi he tuí ʻo sio ki aí, ʻo hangē pē ko e fakamoʻui fakalaumālie ʻa kinautolu ʻoku ngāueʻi ʻenau tui kia Sīsū Kalaisí.
Naʻe Fakafefeka ʻe ha Niʻihi Honau Lotó
Neongo ʻene ngali faingofua ke sió, ka naʻe fakafefeka ʻe ha kakai ʻe niʻihi honau lotó pea ʻikai ke nau fie sio, pea naʻa nau mate ʻi hono huhu kinautolú. Ko e hā naʻe ʻikai ke nau sio aí? (vakai, ʻAlamā 33:20). Ko e hā ʻe lava ke akoʻi mai ʻe he meʻá ni fekauʻaki mo e tuí mo e taʻetuí?
ʻE Fakamoʻui Nai Koe?
Kapau ʻe lava ʻo fakamoʻui koe ʻi hono fai ha meʻa faingofua ko e sio pē, te ke fai nai ia? Naʻe fai ʻe ʻAlamā e fehuʻí ni mo fakaafeʻi kitautolu ke sio ki he Fakamoʻuí ʻaki ʻetau tui kiate Iá (vakai, ʻAlamā 33:21–22).