Kakai Lalahi Kei Talavoú
Fehangahangai mo e Kahaʻu Taʻepaú ʻi he Tui
Ko ha tokotaha palani au. ‘Oku ou saiʻia ke ʻiloʻi e meʻa ke u ʻamanaki ki ai he ʻaho kotoa pē, kae lava ke u mateuteu ki ai. Ka te u teuteu fēfē ki he kahaʻú ʻi heʻene taumamaʻo mo taʻepaú?
ʻOku fuʻu lahi fau ʻa e moʻuí. ‘Oku lahi fau e meʻa ʻoku toka mei muʻá! ‘Oku lahi fau e meʻa ʻe lava ke hokó! ‘Oku lahi fau e meʻa te u lava ʻo faí! ʻOku lōmekina e ngaahi faingamālié he taimi ʻe niʻihi.
ʻOku lahi e ngaahi meʻa ʻoku ou fie maʻú: ha hoa mali, ha ngāue lelei, ke u nofo muli, ʻi ai haʻaku pusi, faʻu talanoa, ako lea faka-Lūsia … Ka ʻoku ou ʻilo foki ʻoku liliu e ngaahi fakaʻamú mo e ngaahi taumuʻá. ʻOku liliu e ngaahi meʻa ʻoku fakamuʻomuʻá.
Ko e meʻa fakamuʻomuʻa ʻe taha ʻoku ʻikai totonu ke teitei liliú ko ʻetau tukupā ki he ʻOtuá mo ʻEne palaní. ʻI Heʻene tokaimaʻanangá, te tau lava ʻo fononga ʻi ha kahaʻu ʻoku fonu ʻi he fehuʻí koeʻuhí te Ne tokoni ke tau maʻu tahataha e ngaahi talí. ʻOku fie maʻu pē ke tau fai e fili lelei taha te tau lavá ʻi he sitepu takitaha.
ʻOku vahevahe ʻe he kakai lalahi kei talavoú ʻi he kongá ni ʻa ʻenau ngaahi aʻusia fakataautaha ʻi he founga ʻenau palani honau kahaʻú ʻi he tokoni ʻa e Tamai Hēvaní mo e founga ʻenau laka ki muʻa ʻi he tuí ʻi heʻenau fehangahangai mo e lahi e ngaahi meʻa ʻoku taʻepaú.
ʻI heʻene fekauʻaki mo e kahaʻú, ʻoku lahi fau ha ngaahi fehuʻi, ka ʻoku ʻuhinga pē ia ʻoku lahi fau e meʻa ʻe malavá. ʻOku ʻi ai foki mo e meʻa te tau malava—ha tuʻunga malava fakalangi ke hoko ʻo hangē ko ʻetau Tamai Hēvaní mo Hono ʻAlo ko Sīsū Kalaisí.
Pea ko e meʻa ia ʻoku nāunauʻia ai hotau kahaʻú.
Meg Yost