Ngaahi Sīpinga Loto-Toʻá
Ko e Uiuiʻi Ngāue Fakafaifekau Ne Fakaʻohovalé
Naʻe malimali ʻa ʻEtuini Tamalasiu ʻi heʻene lue ki tuʻa mei he malaʻe vakapuná ki he laʻaá. Naʻá ne lava ʻo mamata ki he ʻulu paame ʻi he halá mo e ʻalaha mai e ngaahi meʻa fakanamu leleí mei ha māketi ofi mai. Naʻá ne foki mo hono uaifi ko ʻElisií ki ʻInitia! Naʻá na nofo ʻi Haʻamoa, ka kuó na toe foki he taimí ni ki ʻapi.
Ka naʻe ʻikai ko e ʻi heni ʻa ʻEtuini mo ʻElisií ko haʻana ʻaʻahi pē. Naʻe uiuiʻi kinaua ke hoko ko ha ongo faifekau ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻe kiʻi ongoʻi lotosiʻi ʻa ʻEtuini. Ka naʻá ne ʻiloʻi ʻe tokoniʻi kinaua ʻe he Tamai Hēvaní. Naʻe ʻosi faitokonia lahi kinaua ʻe he Tamai Hēvaní.
Naʻe fānauʻi ʻa ʻEtuini mo ʻElisī ʻi ʻInitia. Ka naʻe fuofua fanongo ʻa ʻEtuini ʻi he Siasí heʻene ʻalu ʻo ako ʻi he ʻIunaiteti Siteití. Naʻe tuʻo taha ʻene ʻalu ʻo lotu ai. Naʻá ne lau foki e Tohi ʻa Molomoná. Ka ʻi heʻene foki ki ʻInitiá, naʻe ngalo ʻiate ia e Siasí.
Hili ha ngaahi taʻu mei ai, naʻe ongoʻi ʻe ʻEtuini mo ʻElisī ʻoku totonu ke na hiki ki Haʻamoa. Ko ha tokotaha saienisi ʻa ʻEtuini, pea naʻá ne tali ha ngāue ʻi he motú ko e fai fakatotolo. Naʻe fetaulaki ai ʻa ʻEtuini mo ʻElisī mo e kau faifekaú. ʻI he taimi naʻe toe lau ai ʻe ʻEtuini e Tohi ʻa Molomoná, naʻá ne ongoʻi ha meʻa makehe. Naʻe lau foki ʻe ʻElisī e Tohi ʻa Molomoná. Naʻá na fili ke papitaiso, fakataha mo hona ngaahi fohá mo e ʻofefiné.
Hili ʻenau kau ki he Siasí, ko e meʻa naʻe fie maʻu lahi taha ʻe ʻEtuiní ke ʻilo ʻe hono fāmili ʻi ʻInitiá ki he ongoongoleleí. Ko e palopalemá he naʻe ʻikai ke ʻi ai ha kau faifekau ʻi ʻInitia ke akoʻi kinautolu! Naʻe faitohi ʻa ʻEtuini mo ʻElisī ki he hetikuota ʻo e Siasí ʻo kole ange ke nau ʻave ha kau faifekau ki ʻInitia.
Ne fakaʻohovale lahi e meʻa naʻe hoko maí. Naʻe uiuiʻi kinaua ʻe Palesiteni Sipenisā W. Kimipolo ke na ngāue fakafaifekau ʻi ʻInitia!
Pea ko kinaua ʻeni.
Ko e fuofua feituʻu naʻá na afe ai ʻi ʻInitiá ko e ʻapi e tokoua ʻo ʻEtuiní. Naʻe ʻi ai foki mo e ongomātuʻa mo e fanga tokoua/tuofefine ʻo ʻEtuiní. Naʻe kamata akoʻi leva kinautolu ʻe ʻEtuini mo ʻElisī. Naʻe fiefia hona fāmilí ke ʻilo ki he ongoongoleleí.
Hili ha ngaahi uike siʻi mei ai, naʻe fakatahataha mai ʻa ʻEtuini mo hono fāmilí ʻi he vai kaukau he konga ki mui ʻo e ʻapi hono tokouá. Naʻe ʻosi fufulu e vaí, vali, mo fakafonu ʻaki e vai foʻou. Naʻe teunga hinehina e tokotaha kotoa pē. Naʻe tui ʻe he kakai fefiné ha sikaafi naʻe tāupe hifo ʻi honau umá. Naʻe tui ʻe he kakai tangatá ha sāketi mo ha talausese faka-ʻInitia fāʻatā.
Naʻe tuʻu ʻa ʻEtuini mo ʻene tangataʻeikí ʻi he loto vai kaukaú. Naʻe pehē ʻe ʻEtuini, “ʻE Samuela Tēvita, kuo fakamafaiʻi au ʻe Sīsū Kalaisi, pea ʻoku ou papitaiso koe ʻi he huafa ʻo e Tamaí, pea mo e ʻAló, pea mo e Laumālie Māʻoniʻoní.”
Naʻe ongoʻi fiefia ʻa ʻEtuini ʻi heʻene papitaiso ʻene tangataʻeikí. Naʻá ne toe ongoʻi fiefia ange ʻi heʻene papitaiso ʻene fineʻeikí. ‘I he fakaʻosinga ʻo e ʻahó, naʻe papitaiso ʻe ʻEtuini ha kakai ʻe toko 18!
‘I he ʻaho hono hokó, naʻe heka lēlue ʻa ʻEtuini mo ʻElisī ʻi ha houa ʻe ono. Naʻá na ʻaʻahi ki ha kau mēmipa tokolahi ange ʻo e fāmilí mo akoʻi kiate kinautolu e ongoongoleleí. Naʻe toe papitaiso ʻe ʻEtuini ha toe toko fā hono kāingá ʻi ha vaitafe ofi mai.
Faifai pea heka lēlue ʻa ʻEtuini mo ʻElisī ʻi ha houa ʻe 16 ke ʻaʻahi ki he ongomātuʻa ʻa ʻElisií. Naʻe hoko e tamai ʻa ʻElisií ko ha taki ʻi ha siasi ʻe taha. Naʻe ʻikai ke ne papitaiso, ka naʻá ne fakakaukau ko ha tohi lelei e Tohi ʻa Molomoná. Naʻá ne tokoni ke liliu e Tohi ʻa Molomoná ki he lea faka-Teilukú, ko e taha ʻo e ngaahi lea fakafonua ʻoku fakaʻaongaʻi ʻi ʻInitiá.
ʻI he taimi ne ʻosi ai e ngāue fakafaifekau ʻa ʻEtuini mo ʻElisií, naʻe ʻi ai ha kau mēmipa foʻou feʻunga ke kamata ha taha ʻo e fuofua kolo ʻo e Siasí ʻi ʻInitiá! Naʻe fiefia ʻa ʻEtuini mo ʻElisī ʻi heʻena foki ki Haʻamoá. Naʻá na houngaʻia ʻi hono ʻave kinaua ʻe he Tamai Hēvaní ʻo ngāue fakafaifekaú!