Mga Apostoles Nagpaambit og mga Mensahe sa Paglaum

Si Elder Bruce R. McConkie (1915–85) sa makausa mipahisama sa Simbahan ngadto sa “usa ka dako nga caravan” nga magpadayon bisan pa sa oposisyon.⁴ Si Elder David A. Bednar mipasikad nga ang makanunayong kalig-on sa caravan tungod kini sa dinasig nga pagpangandam sa Simbahan ug sa kasaysayan sa kalisdanan niini.

“‘Walay dili balaan nga kamot ang makapugong niini nga buhat sa paglambo,’⁵ ug walay pandemya ang makapahunong niini nga buhat sa paglambo,” miingon siya. “Taliwala sa tanang mga hagit nga atong giatubang karon sa pagpakgang niini nga kagaw, ang buhat nagpadayon. … Kita wala masayud hangtud kanus-a pa kini, apan atong buntugon. Ug kita tingali dili na makabalik sa atong naandan nga mga pamaagi sa pagpakabuhi sama sa atong nahibaloan niini, apan daghan niadto nga mga pagpahaum ug mga kausaban mahimong positibo kaayo.”

Si Elder Quentin L. Cook miingon nga ang dinasig nga pagpangandam sa Simbahan naglakip sa tukma kaayo nga mga ehemplo sa paghatag og gibug-aton sa pagsunod sa adlaw nga Igpapahulay, paglig-on sa mga korum sa Melchizedek nga Pagkapari ug mga Relief Society, ang mga kausaban sa pagpangalagad, ug ang pasiuna sa Dali, Sunod Kanako, sa mga video sa Basahon ni Mormon, ug sa programa sa Kabataan ug Kabatan-onan.

“Kita molingi niini isip usa ka sukaranan nga panahon sa pagpangandam ug dili lang butang nga kinahanglan natong lahutayon,” miingon siya.

Si Presidente M. Russell Ballard, Akting nga Presidente sa Korum sa Napulog Duha ka mga Apostoles, miuyon. Bisan sa temporaryo nga pagsira sa mga templo ug sa mga meetinghouse, ang mga miyembro sa Simbahan adunay espirituhanong mga himan nga ilang gikinahanglan aron makapadayon.

Si Presidente Ballard nahinumdom unsay iyang gibati nga mipauli gikan sa simbahan niadtong Disyembre 7, 1941, nga nakahibalo nga ang Pearl Harbor giatake ug nga ang Estados Unidos hapit na maapil sa Ikaduhang Gubat sa Kalibutan. Sama sa daghang tawo karon, siya nabalaka sa umaabut ug naghunahuna kon mawala ba kaha ang iyang kaugalingong kaugmaon.

“Apan dili kana mao ang nahitabo,” miingon siya. Sa samang paagi nga ang mga gawasnong katawhan sa kalibutan midaog niadto nga gubat, ang kalibutan magmadaugon usab sa gubat batok sa coronavirus. “Mamaayo ra ang tanan kon itumong nato ang atong mga kasingkasing ngadto sa atong Amahan sa Langit ug sa pagtan-aw ngadto Kaniya ug sa Manluluwas isip ang Manunubos sa tanang katawhan,” miingon siya.

Laing paagi nga ang Simbahan magpadayon sa unahan mao ang pinaagi sa misyonaryo nga paningkamot niini, nga nagtubag sa nagkausab nga mga kondisyon sa kalibutan. Si Elder Dieter F. Uchtdorf miingon nga ang mga lider sa Simbahan nagtuon na og bag-ong mga paagi sa pagpakigbahin sa ebanghelyo bisan sa wala pa ang COVID-19 mosugod sa pagbalda sa misyonaryo nga buhat. Kini nga pagkabalda naglakip sa pagdala og liboan ka misyonaryo ngadto sa ilang mga nasud, nag-release sa uban og sayo-sayo, ug pag-assign pag-usab sa uban.

“Ang COVID-19 mipapaspas og hilabihan sa atong panghunahuna kabahin niini ug miabli sa atong mga mata,” miingon siya. Isip resulta, ang teknolohiya ug social media mipaabli na karon sa mga pultahan nga kaniadto sirado sa mga komunidad nga dunay mga ganghaan ug dili masudlan nga mga panimalay ug mga gambalay nga apartment.

“Ang misyonaryo nga buhat magpadayon bisan pa sa pandemya,” midugang si Elder Uchtdorf. “Kita nagpadayon sa pagkat-on unsaon sa pagpalambo sa misyonaryo nga buhat karon ug sa umaabut. Ang Ginoo misaad sa pagpadali sa Iyang buhat alang sa pagpanalangin sa tanang mga anak sa Dios (tan-awa sa Doktrina ug mga Pakigsaad 88:73). Gibati nako nga kita anaa sa tunga-tunga niini nga proseso samtang nagpakabuhi niining mahagitong panahon. Ang atong bililhon nga mga misyonaryo mao ang mga pioneer sa atong panahon, naghimo og bag-ong paagi sa pagpakigbahin sa mensahe sa ebanghelyo sa bag-ong mga paagi nga haum sa atong mga sirkumstansya aron nga ang Simbahan ni Jesukristo magpadayon nga ‘mokaylap, hangtud kini mopuno sa tibuok yuta’” (Doktrina ug mga Pakigsaad 65:2).

Bag-ong mga oportunidad sa pagpakigbahin sa ebanghelyo dili lamang ang bugtong butang nga miabli. Ang mga kasingkasing naabli usab tungod sa malisud nga mga panahon sa kasagaran nakapahimo sa mga tawo nga mapainubsanon ug moduol sila ngadto sa Dios, miingon si Elder D. Todd Christofferson.

“Sila medyo mas naghunahuna na, ‘Tingali ako nagkinahanglan og labaw pa sa akong pundo sa bangko. Tingali adunay mas labaw pa sa kinabuhi kay sa unsay ania kanako,’” miingon siya.

Si Elder Christofferson miawhag sa mga miyembro sa Simbahan sa pagpangita og mga oportunidad sa misyonaryo, sama sa pagpakigbahin sa mensahe nga may kalabutan sa ebanghelyo ug memes pinaagi sa social media, pagpakigsulti sa full-time nga mga misyonaryo kabahin sa pagtabang sa pagpakigdait sa katawhan nga ilang gitudloan sa online, ug sa pagkontak sa mga tawo nga dili nila kanunay makita.

Ang laing paagi nga ang Simbahan magpadayon sa unahan mao ang pinaagi sa espirituhanong pagtubag sa mga Santos sa Ulahing mga Adlaw sa temporal nga mga hagit sama sa COVID-19. Alang sa atong pisikal nga panalipod, atong mapalambo ang atong pisikal nga pagdistansya gikan sa uban, apan alang sa atong espirituhanong panalipod, kita mopaduol ngadto sa atong Amahan sa Langit ug sa Iyang Anak. Ang COVID-19 nga pandemya nakahatag ngadto sa daghang mga miyembro sa Simbahan og dugang nga mga oportunidad sa pagpalambo sa ilang espirituhanong panalipod pinaagi sa pagsunod sa tambag ni Presidente Russell M. Nelson sa pagpaminaw sa Ginoo.

“Ang atong Amahan nakahibalo nga kon kita gilibutan sa walay kasiguroan ug sa kahadlok, ang labing makatabang nato mao ang pagpaminaw sa Iyang Anak,” miingon si Presidente Nelson atol sa Abril 2020 nga kinatibuk-ang komperensya. Siya midugang, “Samtang kita maningkamot nga mahimong mga disipulo ni Jesukristo, ang atong mga paningkamot sa pagpaminaw Kaniya kinahanglan nga mas gitinguha nato. Kinahanglan og tininuod ug makanunayon nga paningkamot sa pagpuno sa atong inadlaw nga kinabuhi sa Iyang mga pulong, sa Iyang mga pagtulun-an, sa Iyang mga kamatuoran.”⁶

Samtang wala kita makauyon sa paghunong sa mga miting sa Simbahan, sa pagsira sa mga templo, o ang pagkawala sa mga trabaho, ang paggahin og mas daghang panahon diha sa panimalay nakahatag kanato “og kahigayunan sa paghunahuna mahitungod sa pagkahigmata ngadto sa Dios” (tan-awa sa Alma 5:7), miingon si Elder Cook. “Tingali ang bag-ohay nga mga panghitabo nakapahigmata nato sa pagtutok nato niadtong mga butang nga labing importante. Kon mao, usa ka dako nga panalangin niini nga panahon ang paghunahuna sa mga butang nga makapahingpit sa atong kinabuhi ug sa unsang paagi kita makapanalangin sa kinabuhi sa uban samtang kita nahigmata ngadto sa Dios ug molihok subay sa dalan sa pakigsaad.”

Si Elder Jeffrey R. Holland midugang, “Ang maong mga panahon nagdapit nato sa pagsusi sa atong kalag aron makit-an kon gusto ba nato ang unsay atong makita. Mao kanang higayon nga [kita] maghunahuna kinsa gayud [kita] ug unsa gayuy importante.”

Ang ingon nga mga panahon nagdapit usab nato sa pagpalambo sa atong hugot nga pagtuo, pagserbisyo, ug pagpasalamat, nag-aghat kanato sa “paghunahuna sa atong pagsalig sa Dios ug sa mga panalangin gikan Kaniya nga sa kasagaran atong gibaliwala,” miingon si Elder Holland. “Utang nato sa atong Amahan sa Langit nga mas mapasalamaton og gamay, ug mas hilig sa paghinumdom unsa ka daghan sa mga problema ang nasulbad tungod sa Dios, sa mga anghel, sa mga saad sa pagpakigsaad, ug sa pag-ampo.”

Ang sentro sa atong pasalamat mao ang panalangin sa paghinumdom “unsa ka maloloy-on ang Ginoo ngadto sa mga katawhan, gikan sa paglalang ni Adan bisan hangtud [niini] nga panahon” (Moroni 10:3). Ang mga sakop sa Korum sa Napulog Duha miingon nga kon gikinahanglan nga kita “magpabilin sa atong panimalay”, kita makasunod sa ehemplo ni Nephi ug ni Alma, ang paghinumdom nga Siya “kang kinsa [kita] mosalig,” ang Manluluwas nga si Jesukristo, “sa gihapon moluwas [kanato]” (2 Nephi 4:19; Alma 36:27). Ug kita makahinumdom, sama sa gitudlo ni Apostol Pablo, nga walay “makapahimulag kanato gikan sa gugma ni Cristo” (tan-awa sa Mga Taga-Roma 8:35).

Si Ginoong Jesukristo “mao ang atong hingpit nga dalangpanan” (tan-awa sa Salmo 61:1–4), miingon si Elder Holland. “Bisan unsa pay mahitabo, kita dili na gayud mahimulag pa gikan sa gugma sa Manluluwas ug sa Iyang pagpakig-uban, bisan kon kita wala makamatikod niini nianang higayona. Ang Espiritu dili mababagan sa usa ka kagaw o sa nasyonal nga mga utlanan o sa medikal nga mga banabana.”

Imahe

woman on a walk talking to women at window

Litrato gikan sa Getty Images

Bag-ohay lang, samtang nagbasa sa usa ka report nga gihimo sa usa ka komite sa Simbahan, si Elder Christofferson nabalaka sa mga epekto sa “gipatuman nga pag-inusara” nga mahimong modangat ngadto sa dili minyo nga mga miyembro sa Simbahan—tigulang ug batan-on.

“Ang gipatuman nga pag-inusara mosangpot ngadto sa kamingaw, ug ang kamingaw adunay negatibo nga mga sangputanan sa pisikal ug mental nga panglawas,” miingon siya. “Aron mabatukan kana, ang pipila ka mga dumadapig sa pampubliko nga panglawas mirekomendar nga kadtong nakasinati og pag-inusara mangita og paagi sa ‘pagbuhat og maayong mga butang’ alang sa usa ka tawo.”

Ang mga Santos sa Ulahing mga Adlaw makakita og mga paagi sa pagserbisyo, pagtabang, ug paghatag ngadto sa uban, ilabi na niadtong nag-inusara, miingon si Elder Christofferson, ug ang nag-inusara nga mga miyembro nga nagserbisyo sa uban makapaminos sa ilang mga pagbati nga gilain.

“Tutok sa pagpangalagad,” miingon siya. “Adunay daghan nga atong mabuhat alang sa usag usa aron mobati nga nahisakop ug panag-igsoonay. Kini mao ang panahon nga ang korum sa mga elder ug ang Relief Society magkahiusa ug mohatag sa unsay sila lang nga talagsaong na-organisar ang makabuhat.”

Ug imbis kanunay nga mo-text sa usa ka tawo, siya misugyot, “sa akong hunahuna mas maayo nga motawag sa usa ka tawo gamit kanang karaang teknolohiya nga gitawag og telepono. Manawag lang ug makig-istorya. Papaminawa sila og tingog.”

Ang gagmay nga mga paningkamot sa pagtabang sa uban makahimo og dakong kalainan, makapadasig sa uban sa mga paagi nga wala nato mahibaloi. “Ang atong pagpangalagad gikinahanglan kaayo sa mga tawo nga gilain [isolated],” miingon si Elder Cook.

Misugyot si Elder Holland, “Kita kinahanglan nga mohalad og piho nga bahin sa atong panahon sa pagpakig-istorya sa mga tawo nga nagkinahanglan og kalig-on. Siyempre, kita makakuha og kalig-on sa pagbuhat niana, aron ang tanan ‘matuboy’ (3 Nephi 27:14, 15), sama sa gisulti sa Manluluwas nga Siya gipadala sa yuta aron maoy buhaton.”

Laing paagi nga matuboy ang atong kaugalingon ug ang uban mao ang pagpangandam alang sa adlaw nga ablihan pag-usab ang mga templo. Ang pagsira sa templo—bisan kon alang sa mga pandemya, pag-ayo, o paglimpyo—“naghatag og talagsaong oportunidad sa pagkat-on og dugang mahitungod sa pagsiksik sa family history, pag-index, ug unsaon sa pag-andam og daghang mga ngalan alang sa adlaw nga ablihan na pag-usab ang mga pultahan sa templo,” miingon si Elder Bednar.

Abli man o sirado ang mga templo, dugang ni Elder Bednar, ang mga miyembro sa Simbahan sa gihapon makapaningkamot nga mahimong takus ug makaangkon og kasamtangan nga rekomend sa templo.

Sa gipasabut ni Elder Bednar, bisan walay usa nga mopili nga makasinati sa COVID-19 nga pandemya, usa ka sakit sa ulahing adlaw ania gihapon kanato.

“Uban sa mahangturong panglantaw nga gihatag sa gipahiuli nga ebanghelyo ug sa grasya nga moabut tungod sa Pag-ula sa Manluluwas, atong makat-unan ang mga leksyon gikan sa kalisdanan sa pagkamortal nga makaandam nato alang sa mga panalangin sa kahangturan,” miingon siya. “Kita kinahanglang mag-ampo. Kita kinahanglang mangita. Kita kinahanglang mangayo. Kita kinahanglang adunay mga mata nga makakita ug mga dunggan nga makadungog. Apan kita mapanalanginan sa talagsaong mga paagi sa pagkat-on sa mga leksyon nga mopanalangin kanato karon ug sa kahangturan.”

Uban sa makalaglag nga epekto niini sa mga pamilya sa tibuok kalibutan, ang COVID-19 nakatudlo sa mga tawo sa pagpakita og dugang nga pagpakabana alang sa uban, miingon si Presidente Ballard.

“Kita makaamgo kon unsa ka bililhon ang atong mga pamilya, unsa ka bililhon ang atong mga silingan, ug unsa ka bililhon ang atong isigka-miyembro sa Simbahan,” miingon siya. “Adunay mga leksyon nga atong nakat-unan karon nga maghimo natong mas maayong mga tawo.”

Ug kon ang mga unos moagi, nan unsay atong mapaabut? Dugang pa sa ingon, miingon si Elder Uchtdorf. Ang mga anak sa Dios sa sulod ug sa gawas sa Simbahan magpadayon sa pag-atubang og mga hagit.

“Kita nagpuyo sa panahon nga kita kinahanglan nga makat-on,” miingon siya. Ug ang labing importanteng leksyon nga atong makat-unan mao nga ang tubag sa mga hagit sa umaabut mao usab ang tubag sa kasamtangan nga hagit: ang ebanghelyo ni Jesukristo.

Tungod kay ang mga Santos sa Ulahing mga Adlaw aduna sa gipahiuli nga ebanghelyo ni Jesukristo, si Elder Holland miingon, sila makakat-on nga magpositibo ug malaumon, magbuhat sa pinakamaayo kutob sa ilang mahimo ug sa pagsalig sa Ginoo sa Iyang pulong dihang miingon Siya, “Kita magmalipayon sa pagbuhat sa tanan nga mga butang nga ubos sa atong gahum; ug unya kita magmalinawon, uban ang labing dako nga kasiguroan, nga makasaksi sa kaluwasan sa Dios, ug sa iyang mga bukton nga ipadayag” (Doktrina ug mga Pakigsaad 123:17).

“Adunay daghan nga angay ikalipay samtang atong lig-unon ang atong pagtuo, mas mosalig sa Ginoo, ug makakita sa milagro sa Iyang kalingkawasan,” miingon si Elder Holland.