Pagpugong sa Pang-abuso
Sa maayo nga mga relasyon, ang mga tawo mangayo og pasaylo alang sa ilang dili mabination nga mga pulong ug mga lihok ug mosalig sa maulaong kusog sa atong Manluluwas aron sa pagtabang kanila nga molambo ug maghinulsol. Apan sa dili maayo nga mga sitwasyon, ang mga tawo mopadayon sa pagtratar sa uban sa dili mabination nga paagi, ug kadto nga mga relasyon mahimong abusado.
“[Ang pag-abuso ug ang uban nga] maong [samang] sayop nga binuhatan walay luna sa gingharian sa Dios,” mitudlo si Presidente Russell M. Nelson (“Espirituhanon nga mga Bahandi,” Oktubre 2019 nga kinatibuk-ang komperensya). Pipila ka mga artikulo sa magasin sa Simbahan karon nga bulan makatabang kanato sa pag-ila ug pagtubag sa pang-abuso:
-
Sa akong artikulo sa pahina 18, naghisgot ko mahitungod sa mga kinaiya sa pang-abuso ug miila og pipila ka mga kapanguhaan sa pagtabang kaninyo o sa inyong mga kaila nga makaila ug mamaayo gikan sa abusado nga mga relasyon.
-
Sa pahina 58 usa ka tin-edyer nga babaye mipaambit sa iyang kasinatian nga giabuso sa sekswal nga paagi isip usa ka bata ug sa unsang paagi siya nakakaplag og kaisug ug kusog nga mosulti ug mangayo og tabang gikan sa kasaligan nga mga hamtong ug sa Manluluwas.
-
Sa Higala niini nga bulan diha sa pahina H12, makakita kamo og usa ka kalihokan sa pagsulat nga makatabang sa paghisgot sa “pagsulti og dili” uban sa inyong mga anak. Ikonsiderar ang paggamit niini nga kalihokan isip basehan alang sa usa ka leksyon sa home evening sa pagpugong sa pang-abuso.
-
Ang pag-abuso sa emosyonal mahimong makadaot usab sama sa uban pang mga klase sa pag-abuso. Basaha ang “Pag-ila sa Emosyonal nga Pag-abuso” sa digital nga edisyon niini nga isyu aron mahibal-an ang lima ka mga pasidaan nga pahimangno ug kon unsaon sa pagpangayo og tabang.
Kon kamo nasakitan, makapangayo kamo sa Dios og direksyon ug pagkaayo ug makatinguha usab og tabang gikan sa kasaligan nga mga indibidwal. Ang Ginoo nakasabut sa unsay atong gibati, ug Siya mogiya kanato ngadto sa kaluwasan ug kalipay samtang kita mosalig Kaniya.
Hinaut atong bation ang gugma sa Dios ug mangayo og tabang Kaniya matag adlaw,
Jason Whiting, PhD
Eskwelahan kabahin sa Kinabuhi sa Pamilya sa Brigham Young University