Unsaon nako nga mabuntog ang pagbati sa kamingaw?

Nalagpasan nako ang akong mga pagbati sa kamingaw pinaagi sa pagpalambo sa akong mga talento, mahimo kini pinaagi sa mga instrumento sa musika, usa ka kalingawan, ug uban pa. Kini makatabang nimo sa pagkalimot sa imong pagbati sa kamingaw, ug kasagaran hingpit kining mawala. Mosangpot usab kini sa pagkaplag og ubang tawo kinsa parehas nimo og mga hilig.

Akong gitinguha ang suporta, pagdasig, ug gugma sa Langitnong Amahan ug sa Espiritu Santo aron mohatag kanako og kalinaw, paglaum, ug kalig-on kon mamalandong, mag-ampo, ug magbasa sa mga kasulatan. Sama sa giingon sa 3 Nephi 11:11, si Jesukristo mao “ang kahayag ug kinabuhi sa kalibutan.” Siya miabut aron sa pag-iway sa tanang kangitngit.

Kon mobati ko nga nag-inusara, ganahan ko nga modalit og tabang sa akong mga higala ug pamilya, makapalipay gayud kini kaayo kanako. Motan-aw ko sa mga panalangin sa akong kinabuhi ug magpasalamat sa Langitnong Amahan kon unsa ka dako ang Iyang nahatag ngari kanako!

Hibaloi nga pinaagi sa plano sa Dios, dili gayud kita kinahanglan nga mobati og kamingaw. Ang Espiritu Santo kanunay nga nagauban kanato, ug ang Dios nasayud kon unsay atong gipanglimbasugan. Ang Ginoo nakasinati sa matag pagsulay ug pakigbisog nga inyong giatubang. Usa sa labing importanting butang nga atong mabati dinhi sa mortalidad mao ang kalipay, apan dili kita makaangkon og kalipay kon walay kasub-anan (tan-awa sa 2 Nephi 2:11). Pag-ampo sa Dios ug pangayo og tabang; Siya dili mopakyas ni bisan kinsa kanato.

Ang pagbiya sa panimalay aron moanhi sa Brazil alang sa akong misyon lisud. Naglisud gani ko sa pagsulti sa pinulongan! Apan akong nakat-unan nga kon ang Espiritu sa Ginoo maga-uban kaninyo, kamo dili gayud mobati og kamingaw. Siya nakaila kaninyo, ug kanunay nga motabang ninyo. Salig Kaniya!