Mga Hulagway sa Hugot nga Pagtuo
Sakiusa ug Salote Maiwiriwiri
Suva, Fiji
Dili ko hapit makatuo sa kalinaw ug kalipay nga akong nakita sa panimalay sa mga Maiwiriwiri. Bisan pa og duha sa ilang mga anak ang namatay, sila nagpuyo sa ilang kinabuhi uban sa hingpit nga kalipay ug katuyoan sa matag adlaw.
Leslie Nilsson, Litratista
Salote:
Duha ka tuig human namatay ang among anak nga lalaki nga si Esa sa kanser sa baga, ang among anak nga babaye nga si Esalynn namatay sa meningitis. Diha sa templo, mibati ko og kusog nga pag-aghat nga makig-istorya sa usa ka senior nga sister nga misyonaryo didto kinsa nawad-an usab og duha ka anak pipila ka tuig ang milabay. Siya miingon kanako, “Kon himoon nimo ang imong panimalay nga usa ka balaan nga dapit, imong mabati ang presensya sa imong mga anak didto.”
Nahimo kana nga among tumong. Ang tanan namong gibuhat mao ang paghimo sa among panimalay nga usa ka balaan nga dapit. Gusto namo nga mabati sila nga duol.
Wala kami masayud kon unsaon ang mahimong ginikanan sa mga bata sa pikas bahin sa tabil. Apan kon buhaton namo ang among labing maayo sa pagpuyo nga matarung, kami nagtuo nga sila mobati sa among mga paningkamot. Sa among mga debosyonal sa pamilya, gi-welcome namo si Esa ug si Esalynn pinaagi sa pagtawag mismo sa ilang ngalan.
Sa among panimalay, bisan kon kami adunay panaglalis, naningkamot kami sa pagsulbad dayon niini. Gusto namo nga ipabiling balaan nga dapit ang among panimalay kutob sa mahimo. Samtang nabuhat namo kini, kaming tanan nakabati og paglaum ug pagkaayo ug gugma.
Sakiusa:
Ang kasinatian sa pagkawala ni Esa ug ni Esalynn sa katapusan mas nakapasuod sa among pamilya. Nagtinambagay kami uban sa among ubang mga anak. Motambong kami sa templo isip usa ka pamilya. Nagpuyo kami nga yano kutob sa mahimo ug mipili sa pagpasalamat kada adlaw. Samtang kami naghisgot kon unsay gipasabut sa nabugkos isip usa ka pamilya diha sa templo, kana nga pagbugkos mahimong mas tinuod ug mahinungdanon kanamo. Ug latas niining tanan, kami gayud mibati sa presensya sa among mga anak.
Usa sa unang mga butang nga among gibuhat aron sa paghimo sa among panimalay nga mas balaan mao ang pagsugod sa pagbasa sa Basahon ni Mormon matag adlaw. Sa sinugdanan, kami mipaambit sa mga istorya sa Basahon ni Mormon uban sa mga hulagway alang sa among mas manghud nga mga anak. Dayon midugang kami og mga video. Karon kami nagbasa na og mas daghan gikan sa Basahon ni Mormon. Makapamatuod ko sa gahum sa Basahon ni Mormon.
Makapamatuod usab ko sa gahum sa plano sa kaluwasan. Sa dihang nagplano kami sa mga lubong ni Esa ug ni Esalynn, mihukom kami batok sa daghang makuti nga mga seremonyas sa lubong nga komon sa Fijian nga kultura. Sukwahi niana, ako ug ang akong asawa lamang ang mga mamulong, ug kami namulong mahitungod sa plano sa kaluwasan. Sukad niadto daghan sa among mga paryente ang mipasakop sa Simbahan human makadungog niini nga mga kamatuoran gikan sa mga tulumanon sa lubong.
Si Sakiusa nagtudlo sa iyang pamilya nga dili na mahimong mobalik sa nangagi sa kinabuhi, ang pagpadayon na lamang sa umaabut. “Matag adlaw kami nahimong mas lunsay,” miingon siya. Sila nagpuyo sa ilang kinabuhi sa yano nga paagi kutob sa mahimo ug nagpokus sa pagpasalamat.
Si Salote nakakaplag og dakong kalipay sa paggahin og panahon uban sa iyang mga anak ug sa pagtudlo kanila sa ebanghelyo.
Ang pamilya Maiwiriwiri adunay lig-on nga pagpamatuod mahitungod sa pagkabugkos diha sa templo. Gihuptan nila kini nga mga kamatuoran duol sa ilang kasingkasing samtang sila naghinumdom ni Esa ug ni Esalynn.
Samtang sila nagpokus sa pagpuyo sa yano nga paagi ug sa pagpadayon sa umaabut, ang pamilya Maiwiriwiri nakakaplag og pagpasalamat alang sa ilang mga panalangin matag adlaw. “Mapasalamaton kami sa unsay anaa namo,” miingon si Sakiusa.