Mga Meetinghouse—Mga Dapit sa Balaan nga Pagtahud ug Pagsimba

Usa ka mapahinunguron nga kauban sa trabaho mipaambit kanako og usa niya ka kasinatian sa dihang nagtuman sa usa ka buluhaton sa paghipos sa mga lingkuranan ug pagpanghan-ay sa stake center human sa usa ka komperensya sa stake. Human sa 30 minutos nga pagpatuman niini nga mga katungdanan, nakaamgo siya nga siya nalang ang katapusan nga tawo nga nahabilin sa gambalay. Imbis mobati nga nag-inusara nga magdali sa pagbiya, hinuon, nakamatngon siya nga ang samang pagbati sa matam-is nga kalinaw nga iyang gibati atol sa komperensya mipabilin kaniya ug gani nagkadako pa.

Sa iyang paghuman sa buluhaton ug paggawas sa meetinghouse, nakahinagbo niya ang laing miyembro kinsa ingon og nagbantay og maayo niya. Nakaamgo sa unsay gibuhat sa akong higala, migunit siya sa kamot niya ug miingon, “Igsoon, ang Ginoo nakakita niining gagmay nga mga butang nga imong gibuhat alang Kaniya, ug Siya mipahiyum niini.”

Pipila ka tuig ang milabay isip usa ka bishop, kining samang higala nakamatikud nag-inusara na usab siya diha sa meetinghouse sa iyang ward. Human sa pagpamalong sa mga suga sa chapel, mipabilin siya og kadiyot samtang ang hayag sa bulan milapos sa mga bintana ngadto sa pulpito.

Ang pamilyar nga pagbati sa kalinaw mibalik na usab kaniya, ug siya milingkod duol sa atubangan sa chapel ug namalandong sa dili maihap nga mga sagradong higayon nga iyang nasinati niana nga kahimtang—sa daghang higayon nga siya nag-obserbar sa mga priest nga mipikas sa pan diha sa lamesa sa sakramento, sa mga okasyon sa dihang siya mibati sa Espiritu Santo nga nagauban kaniya samtang siya mihatag og pakigpulong alang sa komperensya sa ward, sa mga serbisyo sa bunyag nga iyang gipahigayon, sa matahom nga pagkanta sa choir nga iyang nadunggan, ug sa daghang mga pagpamatuod gikan sa mga miyembro sa ward nga nakatandog kaayo kaniya. Naglingkod nga nag-inusara niana nga ngitngit nga chapel, gibati niya nga sobrang nalipay sa hiniusa nga epekto niini nga mga kasinatian sa iyang kinabuhi ug sa mga kinabuhi sa mga miyembro sa iyang ward, ug iyang giduko ang iyang ulo diha sa dakong pasalamat.

Ang akong higala dugay nang gitudloan sa maalamon ug eksakto nga paagi nga ang labing sagrado nga mga dapit sa kalibutan mao ang templo ug ang panimalay, apan pinaagi sa duha ka mga kasinatian nga gihisgutan, nasabtan usab niya ang sagradong kinaiyahan sa atong mga meetinghouse. Tungod kay kini gipahinungod pinaagi sa awtoridad sa pagkapari, kini nga mga pasilidad nahimong mga dapit diin ang Ginoo mobu-bu sa mga pagpadayag diha sa iyang katawhan ug diin ang “gahum sa pagka-diosnon gipakita” pinaagi sa mga ordinansa nga nahitabo diha niini (tan-awa sa Doktrina ug mga Pakigsaad 84: 20).

Ang meetinghouse lakip sa mga panimalay makahatag sa gisaad nga kalipay nga masinati sa mga matinud-anong mga Santos sa adlaw nga Igpapahulay. Kini mahimong usa ka dapit diin ang tiningub nga pagsimba sa mga miyembro makapahimo sa ilang kasingkasing nga “[ma]bugkos diha sa pagkahiusa ug diha sa gugma sa usag-usa” (Mosiah 18:21) ug ngadto sa Manluluwas. Aron kita makahatag og tukma nga pagpasalamat ug pagtahud sa pagbu-bu sa espirituhanong mga panalangin nga moabut kanato pinaagi sa atong mga meetinghouse, kita kinahanglan nga mosulod niini nga mga dapit sa pagsimba uban sa lawom ug sinsero nga kinaiya sa balaan nga pagtahud.

Imahe

taking the sacrament

Sa atong modernong kultura sa Simbahan, ang pulong nga balaan nga pagtahud nahimong susama og kahulugan sa pulong nga hilum. Samtang ang mga malumo nga tono tukma gayud alang sa atong mga chapel, kining limitado nga pagsabut sa balaang pagtahud wala makatugkad sa hingpit nga kahulugan sa pulong. Ang Balaang Pagtahud mahimong masubay gikan sa Latin nga verbo nga revereri, nga nagpasabut nga “mobarug nga magdayeg.”¹ Posible kaha nga makakita kita og termino nga mas klaro nga makahulagway sa mga pagbati sa atong kalag kon kita tinud-anay nga mamalandong sa unsay nabuhat sa Manluluwas alang sa matag usa kanato?

Nahinumdom ko sa maanindot nga mga pulong sa himno nga atong giawit diha sa atong mga chapel: “Ako nahingangha sa gugma nga gitanyag ni Jesus kanako.”² Kanang dakong pagbati sa pagpasalamat, pagdayeg, ug katingala mao ang diwa sa balaan nga pagtahud, ug kini ang mag-iway kanato aron makalikay sa bisan unsa nga matang sa pinulongan o kinaiya nga mahimong mopakunhod nianang mga pagbati diha sa atong mga kaugalingon o sa uban.

Imahe

woman at pulpit

Litrato sa babaye diha sa pulpito pinaagi ni Tiffany Myloan Tong

Gikan sa pagpadayag sa bag-ong panahon, kita nasayud nga usa ka sentro nga bahin sa atong pagsimba sa Igpapahulay mao ang “moadto sa balay alampoanan ug mohalad sa [atong] mga sakramento diha sa balaan nga adlaw sa Ginoo” (Doktrina ug mga Pakigsaad 59: 9). Ang “[mga] balay alampoanan” diin kita magpundok sa Igpapahulay mao ang atong sagrado nga mga meetinghouse.

Si Presidente Russell M. Nelson nakatabang kanato nga mas makasabut sa suod nga koneksyon tali sa atong balaang pagtahud alang sa Manluluwas ug sa atong mga pagbati ngadto sa adlaw nga Igpapahulay. Sa pagpaambit sa iyang kaugalingon nga kasinatian aron sa pagbalaan sa Igpapahulay, si Presidente Nelson misaysay, “akong nakat-unan gikan sa mga kasulatan nga ang akong binuhatan ug kinaiya sa Igpapahulay maoy usa ka timailhan tali kanako ug sa akong Amahan.”³

Sama nga ang atong gawi ug kinaiya panahon sa Igpapahulay mao ang usa ka timailhan sa atong debosyon ngadto sa Ginoo, ang atong pamatasan, ang atong kinaiya, ug gani ang atong panapot samtang anaa sa Iyang balay alampoanan magpakita usab sa kadak-on sa pagtahud nga atong gibati ngadto sa Manluluwas.

Imahe

people sitting in sacrament meeting

Si Elder Jeffrey R. Holland sa Korum sa Napulog Duha mipadako sa atong pagsabut niining konsepto, sa pagpamahayag:

“Agig dugang sa paggahin og panahon alang sa mas nakasentro sa panimalay nga pagtudlo sa ebanghelyo, ang atong giusab nga serbisyo sa Domingo … naghatag og gibug-aton sa sakramento sa Panihapon sa Ginoo isip ang sagrado, giila nga maoy sentro sa atong sinemana nga kasinatian sa pagsimba. Kita kinahanglan mohinumdom sa personal nga paagi kutob sa atong mahimo nga si Kristo namatay gikan sa usa ka kasingkasing nga masulob-on tungod sa pagpas-an nga nag-inusara sa mga sala ug mga kasubo sa tibuok tawhanong pamilya.

“Sa ingon nga kita nakatampo niadtong makamatay nga palas-anon, ang samang higayon nagkinahanglan sa atong pagtahud.”⁴

Importante nga hinumduman nga ang gipili nga dapit alang niining labing taas nga gutlo sa pagtahud sa Manluluwas mao ang meetinghouse [balay tigumanan] sa chapel. Agig dugang sa balaang pagtahud nga atong mabati atol sa sinemana nga ordinansa sa sakramento, ang atong mga pagbati sa balaan nga pagtahud ug pagrespeto mapalambo kon atong hunahunaon ang ubang mga ordinansa sa pagkapari ug mga panalangin nga gihimo sulod sa mga meetinghouse, lakip sa paghatag og ngalan ug panalangin sa mga bata, mga bunyag ug mga kumpirmasyon, mga ordinasyon sa pagkapari, ug mga pag-set apart sa calling. Ang matag usa niini nga mga ordinansa ug mga panalangin moresulta sa pagbu-bu sa Espiritu Santo kon kadtong moapil ug kadtong motambong mohimo niini sa kinaiya nga magpakita og balaang pagtahud.

Imahe

missionaries in chapel

Litrato pinaagi ni James Iliff Jeffery

Ang adlaw nga Igpapahulay makahatag nato og oportunidad sa pagsimba sa Ginoo atol sa atong pagtuon sa panimalay ug isip usa ka kongregasyon atol sa atong sakramento ug ubang mga panagtigum. Sukad sa kinaunahan nga mga panahon sa Simbahan, ang mga Santos nakatagamtam sa pagpundok aron makigdait ug magkasuod sa pag-inigsuonay. Ang atong mga meetinghouse gani gidesinyo nga dunay mga lugar sa paghimo sa ingon nga mga kalihokan atol sa semana. Kita kinahanglan dili gayud mobaliwala sa nag-unang katuyoan niining mga pasilidad, hinoon, nga mao ang paghatag og dapit sa pagsimba.

Ang pagsimba ug ang balaang pagtahud suod kaayo og kahulugan. “Kon kita magsimba sa Dios, moduol kita Kaniya inubanan sa matinahurong gugma, kamapainubsanon, ug pagdayeg. Kita moila ug modawat Kaniya isip atong pinakahalangdon nga Hari, ang Tiglalang sa uniberso, ang atong pinalangga ug walay kinutuban ang kamahigugmaon nga Amahan.”⁵

Kining pinakasentro nga katuyoan sa pagsimba kinahanglang moimpluwensya sa atong gawi diha sa mga meetinghouse bisan kon kita moapil diha sa sosyal o makalingaw nga mga kalihokan. Ang dakong pag-amping kinahanglan himoon aron maminusan ang kasamok, tipaka, o guba sa bisan unsang bahin sa pasilidad agig resulta sa mga kalihokan sa Simbahan, ug kinahanglan lihokon dayon ang paglimpyo ug pag-ayo kon mahitabo kana.

Ang kabataan ug kabatan-onan mahimong matudloan nga ang balaang pagtahud ug pag-atiman sa meetinghouse malugwayan pa lapas sa mga panagtigum sa Dominggo. Ang pag-apil sa mga miyembro sa pagpanglimpyo sa meetinghouse—ilabi na sa hiniusa nga pag-apil sa mga ginikanan ug mga anak—usa ka talagsaong paagi sa pagpalambo og usa ka pagbati sa balaan nga pagtahud alang sa atong sagrado nga mga pasilidad. Sumala sa nakita gikan sa kasinatian sa akong higala sa paghapsay sa iyang stake center human sa komperensya sa stake, ang mismong pag-atiman sa meetinghouse maoy usa ka paagi sa pagsimba ug makadapit sa Espiritu sa Ginoo.

Imahe

woman cleaning door to the chapel

Litrato sa mga miyembro nga nagbarug sa gawas pinaagi ni Massimo Criscione

Ubos sa propetikanhong direksyon ni Presidente Nelson, dinagko nga mga paningkamot ang gihimo aron masiguro nga ang ngalan ni Jesukristo dili gayud mapadaplin kon kita maghisgut sa Iyang Simbahan. Sa samang paagi, dili gayud nato itugot nga ang Manluluwas mapulihan gikan sa sentro sa atong pagsimba—lakip sa atong mga dapit sa pagsimba.

Ato nang naandan ang paghisgut sa templo isip ang balay sa Ginoo, nga mao ang tukma ug importante nga ngalan. Kita tingali mas may kalagmitan nga makalimot, hinuon, nga ang matag usa sa atong mga meetinghouse gipahinungod pinaagi sa awtoridad sa pagkapari isip usa ka dapit diin ang Espiritu sa Ginoo mahimong mopuyo ug diin ang anak sa Dios—maanaa man sa sulod ug gawas sa Simbahan—mahimong makaangkon “sa kahibalo sa ilang Manunubos” (Mosiah 18:30).

Ang bag-uhay lang gipahibalo nga inisyatibo sa pag-adorno sa atong mga meetinghouse sa mga artwork [buhat sa arte sama sa drowing ug diboho] nga sa matinahurong paagi naghulagway sa Manluluwas ug sa balaan nga mga panghitabo sa Iyang mortal nga kinabuhi ug sa kinabuhi nga human dinhi gituyo aron sa pagdani sa atong mga mata, mga hunahuna, ug mga kasingkasing nga mas maduol ngadto Kaniya. Sa inyong pagsulod niining mga balay alampoanan alang sa mga panagtigum ug mga kalihokan, kami mahigugmaong modapit kaninyo sa paghunong, pag-obserbar, ug pagpamalandong niining sagrado nga mga painting, lantawon kini uban sa inyong mga anak, ug aron matugutan kini nga makapadugang sa inyong pagbati sa pagsimba ug balaang pagtahud ngadto sa Dios.

Ang propeta sa Daang Tugon nga si Habacuc namahayag, “Ang Ginoo ania sa iyang balaan nga templo: pahiluma sa atubangan niya ang tibook nga kalibutan” (Habacuc 2:20). Hinaut nga kita mahinumdom usab nga ang Espiritu sa Ginoo anaa sa atong mga meetinghouse ug motuhop sa atong matag kasingkasing ngadto sa punto nga kita modala sa atong mga kaugalingon diha sa balaan nga pagtahud sa Iyang atubangan.