Mga Young Adult
Ang Pagkaadik Sama Ba sa Pagrebelde?
Ang tagsulat nagpuyo sa Texas, USA.
Ang usa ka mas maayong pagsabut sa pagkaadik makatabang kanato sa pagsalig nga, sa umaabut nga adlaw, ang Ginoo moluwas kanato gikan sa pagkaulipon.
Sa atong napukan nga kalibutan, ang pagkaadik usa ka reyalidad nga makapasagmuyo ug makapausab sa kinabuhi alang sa pipila. Kon kita mogamit og sobra nga butang aron makalingkawas sa kinabuhi, sama sa pagkaon, giresita nga mga tambal, social media, pagpanglibak, pornograpiya, pagpamakak, pagsugal, o gani pag-ehersisyo, dali ra natong mabitik ang atong kaugalingon sa usa ka pabalik-balik nga pagkaadik.
Samtang ako nagtan-aw sa talagsaon, mahigugmaong mga tawo sa akong palibut nga nakigbisog sa pagkaadik—dili lang pagnunot sa sayop nga pagpili—ako nagtuon sa mga kasulatan ug sa bag-ong kaplag nga kahibalo mahitungod sa pagkaadik aron mas makasabut niining neurological nga mga pag-aghat [impulse] ug mga pwersa [compulsion].
Ang mga Sagbut sa Pagkaadik
Ang pagsugakod sa pagkaadik mahimong sama sa pag-atiman sa usa ka tanaman. Dili kita mangibut sa mga sagbut og kausa ug magdahum nga human na. Nasayud kita nga aduna pay motubo nga mga sagbut, busa mainampingon ug kanunay natong ibtun ang mga sagbut aron mapanalipdan ang mga tanom.
Kon kita nakigbisog sa pagkaadik, kita mahimong mawad-an og kadasig kon kita mosugmat pag-usab bisan human sa paghinulsol ug sa pagpangayo og tabang. Tingali kita masurprisa ug masagmuyo nga kini nga mga tintasyon hilabihan ka kusog human sa malipayon kaayo o subo kaayo nga mga panahon sa atong kinabuhi. (Sama nga mas daghang sagbut ang lagmit motubo human sa usa ka makapapiskay nga ulan o grabe nga unos.)
Ang Pagkaadik batok sa Tinuyo nga Pagrebelde
Akong nakaplagan nga si Satanas mogamit sa pagkaadik isip “ebidensya” nga kita kinaiyanhong magtinguha og dautan, nga kita nalaglag gikan pa sa sinugdanan, o nga ang Ginoo wala na nagpakabana kanato. Ang yawa mogamit sa kaulaw sa pagpasagmuyo kanato, nagtudlo nga bisan kapila pa kita maghinulsol, ang mga tintasyon magpadayon sa pag-abut.
Adunay daghang mga rason nganong ang mga tawo dali ra maadik, apan ang pagkaadik sa kasagaran magsugod sa usa ka pagsulay sa pagtagbaw sa “lawom ug wala matuman nga mga panginahanglan.”1 Busa samtang ang pagrebelde mahimong mosangput sa pagkaadik ug ang mga pagkaadik mahimong hinungdan sa sala, kini kasagaran magsugod o mapadako diha sa kahuyang kay sa tinuyo nga pagrebelde.2
Salamat na lang, kita nasayud nga ang kahuyang makahatag kanato og oportunidad sa pagkat-on mahitungod sa grasya ug sa pagpalambo og hugot nga pagtuo sa makaayo nga gahum ni Jesukristo.3
Hangtud sa Kaluwasan gikan sa Pagkaulipon
Kita makakaplag og mga panabut sa pagsugakod ug paglingkawas sa lit-ag sa pagkaadik gikan sa duha ka grupo sa mga tawo diha sa Basahon ni Mormon: ang mga katawhan ni Limhi ug ang mga katawhan ni Alma.
Ang duha ka grupo naulipon sulod sa taas nga panahon. Ang duha nakaamgo nga “walay paagi nga sila maluwas sa ilang mga kaugalingon gikan” sa pagkabihag (Mosiah 21:5). Ang duha, sa paglabay sa panahon, midangup sa Ginoo alang sa tabang.
Ang mga katawhan ni Limhi naulipon tungod sa kalapasan. Wala nagtinguha sa panabang sa Ginoo, sila nakiggubat sa ilang mga tigdaug-daug “diha sa kasuko” sa tulo ka higayon. Napildi sila sa matag gubat. Sa dihang sila nagsugod sa pagpaubos sa ilang kaugalingon, “ang Ginoo dugay mitubag sa ilang pangamuyo … [apan Siya] mitubag sa ilang mga pangamuyo, ug misugod sa pagpahumok sa kasingkasing sa mga Lamanite nga sila misugod sa pagpagaan sa ilang mga alantuson” (Mosiah 21:15). Sila napanalanginan sa ilang nagkadako nga pagkamapainubsanon, apan “ang Ginoo wala makakita nga angay ang pagluwas kanila gikan sa pagkaulipon” hangtud sa ulahi na.
Ang mga katawhan ni Alma anaa sa pagkaulipon bisan pa sa ilang pagkamatarung, apan sila “mibu-bu sa ilang mga kasingkasing ngadto [sa Dios].” Bisan sa pagkasayud sa ilang matarung nga mga tinguha, ang Dios mitugot og panahon tali sa ilang pagkabihag ug sa ilang kaluwasan. Samtang nagpadayon sila sa pagsalig Kaniya, Siya misaad nga Siya “mopagaan sa mga alantuson diin anaa gitungtong diha sa inyong mga abaga, gani kamo dili makabati kanila diha sa inyong mga buko-buko, bisan anaa [pa] kamo sa pagkaulipon.” Sa ingon, sila “mitugyan sa maayo nga buot ug uban sa pailub ngadto sa tanan nga kabubut-on sa Ginoo” (Mosiah 24:12, 14, 15).
Ang duha ka grupo sa katapusan naluwas. Ug kita usab gisaaran nga kon kita modangup sa Ginoo sa atong pagkaulipon, kita “mobarug ingon nga mga saksi alang [Kaniya] human niini” ug “masayud sa pagkatinuod nga, ang Ginoong Dios, moduaw [gayud] sa [Iyang] mga katawhan diha sa ilang kasakit” (Mosiah 24:14)—ug diha sa ilang pagkaadik!
Pagmadasigon
Kon kamo nakigbisog sa pagkaadik, hinumdumi nga uban sa tabang sa Ginoo, kini nga higayon pwede nga mahimong tambok nga yuta alang sa pag-ugmad og Kristohanong mga hiyas. Samtang kamo maglambo sa pagkamapainubsanon, makakat-on kamo og pailub, kalooy, pagkamainantuson, ug kaaghup.
Pakigkita sa inyong mga lider sa pagkapari ug kadtong makatanyag og suporta, ug gamita ang daghan nga mga himan nga gihatag sa Langitnong Amahan aron sa pagtabang kaninyo nga makakaplag og kagawasan. Salig sa Ginoo; samtang kamo makugihong mosunod Kaniya, Siya makausab niining makapawala og kadasig ug makapasagmuyo nga hagit ngadto sa usa ka gamhanan nga oportunidad alang sa espirituhanong pagpalunsay.4
Usa ka nag-unang Santos sa Ulahing Adlaw sa Australia, sa dihang nagtandi sa iyang nangagi sa iyang pagka-karon, miingon: “Ang akong kinabuhi kaniadto [mao ang] usa ka kamingawan sa mga sagbut, nga hapit walay usa ka bulak nga Miturok taliwala niini. [Apan] karon ang mga sagbut nahanaw na, ug mga bulak ang Mitumaw puli sa ilang dapit.”5
Samtang kamo ug ako kanunayng mangguna sa atong tanaman ug modangup sa Ginoo sa atong mga pagsulay, kita makadawat sa saad nga gihatag ngadto sa mga katawhan ni Alma: “Pagmadasigon, kay pagkaugma Ako moluwas kaninyo gikan sa pagkaulipon” (Mosiah 24:16).
Padayon sa pagpangibut og sagbut—bililhon kaayo ang ani niini!