Levu mai na Dua na Sala me Vulici Kina na iVolanikalou

Mai Vei Marissa Widdison

Mekasini ni Lotu

Kevaka sara mada ga o sega ni taleitaka na wilivola, era vuqa tu na sala me da vulica kina na ivolanikalou.

Au taleitaka na noqu ilesilesi ena gauna oqo vakadautaba piano ena Lalai. Ena vica na macawa sa oti era a vakatovotovotaka tiko na gone e dua na sere. Au a vakila na Yalotabu ni ra lagata:

Vakasaqara, tugana, ka masu
Sa ka eso meu na cakava. 
Ena veituberi na Yalotabu, ka, titobu eloma,
Au na kila ni sa dina na ivolanikalou.1

Ia a votu talega e dua na taro ki na noqu vakasama. Vakacava ke o sega ni—me vaka e tukuna tiko na matai ni qaqa ni sere—“taleitaka na wili ivolanikalou”? Au vakabauta ni sa qai votu wale tikoga qo e lomaqu na ulutaga ni wilivola baleta ni sa wasea e vica na itokani no nodra sotavi dredre ena vakaleqai ni wilivola. Ka vuqa na tamata au kila era sega sara ga ni taleitaka na wilivola! E tiko li e dua na sala e rawa ni se vakaibalebale tikoga kina vei ira na ivolanikalou ka vakatorocaketaka “e dua na ivakadinadina ni ra sa dina”?

E vaka mera vuli vakavinaka sara na tamata ni vakaraitaki tu na itukutuku ena levu na sala duidui, me vaka na kena e laurai ka vakavosa, ka ra dau tokaruataki na lesoni ena loma ni dua na gauna. Ena vakasama o ya, au a saga ni vakasamataka na sala duidui e vuqa ni kena vulici ni ivolanikalou me vaka au rawata. Oqo, ni sa soli, ena tawawili na veika kece e tiko ena lisi oqo me vaka na vuli ivolanikalou maqusa ka titobu sara era dau vakatavulica na parofita ni sa ka bibi ki na noda ivakadinadina—eso vei ira oqo e sa vakasama totolo, ka lasa—ia au vakila ni sa rawa ni vakauqeta eso na nomu vakasama vou ga vakai iko. Me da sa guta vakalevu sara na vulici ni kosipeli me rawa ni da, vaka e kaya na sere, “yaco ni kila vakamatata” vakatautauvata!

Vakasama Eso me baleta na Vulici ni iVolanikalou

Vakatakila na vosa eso e tokaruataki ena nomu veivakalougatataki vakapeteriaki ka vakaraica na veivosa vata ga oqori ena ivolanikalou.
Ni o vuli, droinitaka na yaloyalo eso ni nomu vakasama ena dua na ivolaniveisiga ni vuli se ena tutu ni ivolavakarau ni nomu Lako Mai, Mo Muri Au .
Tara e dua na ivakatakarakara lailai ni dua na italanoa ni ivolanikalou.
Qirita e dua na wekamu tu vakayawa ka drau wilika vata ena talevoni.
Vola e dua na lisi ni taro e tiko vei iko kivua na Kalou ka qai vaqara na kena isau ni ko wilivola.
Sarava e dua na vidio mai na BookofMormonVideos.org se BibleVideos.org.
Dolava na ivolanikalou ki na dua ga na wase ka tekivu wiliwili.
Lagata e dua na serenilotu ka qai vakaraica na ivolanikalou e koto ena mua ni sere.
Sikova na topics.ChurchofJesusChrist.org ka vulica e dua na ka o taleitaka.
Vakaraica na cakacaka ni liga ena initaneti e matataka na italanoa ni ivolanikalou o vulica tiko.
Wilika ga na wase kei na ikau ni wase eso ni dua na ivola.
Vakatagitaka na ivakatagi malumu ni o wiliwili tiko e cake.
Vakaraica na sala eso e sema kina na wase yadua ni ivolanikalou ki na valetabu.
Kevaka o dau vulica na ivolanikalou livaliva, tovolea mo wilika na veilavelave tabaki, se na kena veibasai.
Boroya se droinitaka e dua na irairai se italanoa ni ivolanikalou.
Vakalasutaka ga vaka ni ko a lesi mo vosa ena dua na ulutaga e valenilotu, ka vulica sara.
Ni wiliki oti e dua na wase taleitaki ni ivolanikalou, vola tale ena nomu vosa vakai iko.
Muria na vakamacala e ra ena dua na tikina taleitaki, qai muri na vakamacala e ra ena veitikina o sa muataki kina, qai muria na veivakamacala e ra oqori, ka vakuria.
Veivukevuke ni wilika e cake kei ira na itokani na tikina eso ka veivosakitaka na ka o ni sa wilika.
Vakayagataka na Topical Guide mo vulica e dua na vosa se ulutaga.
Vakaraica na ivolanikalou kece ena idusidusi ena mua ni dua na vosa ni koniferedi raraba.
Vakabira e dua na ivolanikalou ena vanua laurai rawarawa e veisiga ka tovolea mo cavuqaqataka ena macawa oqo.
Vola eso na ivolanikalou veivakacegui ena loma ni kadi veisoliyaki vei ira na tamata.
Vakayagataka na Gospel Library mo vakarorogo tu ki na ivolanikalou ni ra wiliki tiko mai e cake.
Vola na ituvatuva vagauna ni veika a yaco ni o wilika tiko na iVola i Momani.
Raica e dua na “itokani vakaivolanikalou” ka textaka vakai kemudrau e dua na tikina ena veimataka.
Tekivu mai na iotioti ni wase ni iVola i Momani ka wilika ki na kena ivakatekivu.
Wilika na ivolanikalou eso e okati kina na ivakadinadina, ka qai vola na nomu ivakadinadina.
Kevaka o vakatagitaka e dua na yaya ni vakatagi, tovolea mo vola e dua na sere e vesuka na vakanananu ni dua na tikina.
Tarogi ira na lewe ni matavuvale se itokani me baleta na nodra tikina taleitaki ni ivolanikalou.
Ni o wilika, droinitaka na veika e vakamacalataki tu kina, vaka na kamusu ni dakai titi i Nifai.
Wilika ka cavuqaqataka na tikina eso e dau vakayagataki me vakavulici kina na lesoni ni kaulotu, kune ena wase e tolu ni Vunautaka na Noqu Kosipeli.
Wilika e dua na ivola mai na iVolatabu o se bera vakadua ni se wilika e liu.
Vakadikeva na bula ni dua na tamata qaqa ni ivolanikalou ka vola e dua na ripote ni ivolatukutuku ni bula.
Matanataka e dua na italanoa ni ivolanikalou me tiki ni lotu vakamatavuvale se dua tale na itaviqaravi ni Lotu.
Raica e dua na vosacavuti mai na dua na iliuliu ni Lotu me sala vata kei na wase yadua o sa otiva.
Wilika na veivuke ni vuli ivolanikalou, me vaka na iVakamacala Taumada ki na iVola i Momani se na Bible Dictionary.
Vakayagataki gauna ena veika ni bula vakayago ka vakasamataka na sala e sema kina ki na kosipeli na veika o raica, qai vakaraica e dua na tikina me baleta na ka o sa vulica.

Tiko beka eso nomu vakasama vakataki iko? Wasea yani kivei ira nomu itokani!