E 7 na Sala me Valuti Rawa Kina na iYaloyalo Vakasisila

Kevaka o sa cakacaka tiko mo valuta rawa na vakayagataki veivagarogaroi ni iyaloyalo vakasisila, o na rairai vakila ni ko sa dreti tani tiko mai vua na Tamada Vakalomalagi baleta ni ko nanuma tiko ni ko sega ni kilikili kaya mo lomani se vukei me yacova ni ko sa walia rawa. Oqori sara ga na veika e vinakata o Setani—mo vakuwai iko mai vei ira kece e lomani iko ena vakasama ni sa rawa ni o uabaleta na iyaloyalo vakasisila vakai iko ga sa qai rawa ga kina me kilikili mo na lomani.

Ena vuku ni kemu ituvaki vakalou, o sa kilikili tu ga mo ciqoma na inuinui, veivakauqeti, kei na ivakatakila yadua mai vua na Tamada Vakalomalagi kei na kaukauwa veivakabulai i Jisu Karisito me valuti rawa kina na iyaloyalo vakasisila.¹ Kakua ni lako tani maivei Rau se maivei ira na tamata era lomani iko.

Au sa vulica ni kau laivi na madua e ka bibi sara ena kena valuti rawa na iyaloyalo vakasisila. Na madua sa vaka ni ko vakila ni ko sa kavoro, vakacacani, se ko tamata ca. Ni ko vakabauta na veivakasama veivakacacani oqo me baleti iko ena rawa sara ga me kauti iko mo tao tu ena dua na cowiri ni vakatotogani. Ni ko loma rarawataka e dua na ka o a cakava sa tiki tiko ni cakacaka ni veivutuni ka rawa ni vukei iko mo veisautaka na nomu itovo. Ia na madua e vakavuna mo vakila ni nomu itovo ni bula kece e ca ka o sa sega ni vukei rawa mai vua na iVakabula.²

E vinakata na Tamada Vakalomalagi mo sa sinai tu ena inuinui vei Jisu Karisito kei na veivakalougatataki ni Nona Veisorovaki. Na madua e dau railesu ka biuti iko toka ga ena waitavikoviko ni lasu kei na veivorati vakaiiko. Yalovinaka lako tani mai na sala ni madua.

E vuqa na tamata era sa vakatakilakilataki ira mera sa “vakatotogani” tu ena iyaloyalo vakasisila. Au sa vakasalataki kemuni mo ni kakua ni taura cala na ivakatakilakila o ya. E vuqa na tamata gone era vakaleqai tiko ena iyaloyalo vakasisila era sega ni vakatotogani.³ Kei na kena vakayagataki cala na ivakatakilakila oqo ena rawa me na dredre cake kina me tagutuvi na vakayagataki ni iyaloyalo vakasisila baleta na kena maduataki tiko, inuinui sa luluqa, kei na loma rarawa e lako vata kaya tiko.

Na nomu ituvatuva ni itatarovi sa dua na itukutuku wase tolu ena rawa me vukei iko mo valuta rawa na iyaloyalo vakasisila.

Wase 1: Vola na nomu ivakasaribariba. Ni ko cariba sa imatai tiko ni kalawa ki na cowiri e veimuataki ki na kena saravi na iyaloyalo vakasisila.

E tiko e vica na mataqali ivakasaribariba:

• iTuvaki: na ituvaki e tauyavutaka kina e dua na ivakasaribariba baleta ni veivakanananu makawa se itovo (me vaka na tiko vata ena rumu se dua na gauna ni dua na siga)

• Na nuiqawaqawa/galili/vakaloloma ni veika a yaco: dredre ni lomada se na ituvaki ka ra dau ivakasaribariba mo gole ki na iyaloyalo vakasisila me vaka e dua na sala ni dro yani ka cakacakataka na veiyalo oqo.

• Vakaiyaloyalo: sarava vakadodonu e dua na ka sega ni iyaloyalo vakasisila ia e vakasaribaribataka na veitukutuku raraba, iyaloyalo, itaba, kei na kena tale eso.

Tikina 2: Tuvanaka na sala me vakalailaitaki kina na ivakasaribariba.

Me kena ivakaraitaki, kevaka e tiko e dua na ivakasaribariba ni ituvaki me vaka na yalo malumalumu ena bogi levu, bokoca na nomu talevoni ni vo e 30 na miniti ni gauna ni moce se moce ka sega na nomu talevoni ena nomu rumu ena veivuke sara. Kevaka o vakayagataka tiko na iyaloyalo vakasisila me idrodro ni veika dredre, mo vakasaqara na sala mo vakatudonutaka kina na yalo vakaoqo. E rawa beka ki na vakaukauwa yago se wainimate ena vukea me vakalailaitaka na nomu itagede ni lomaocaoca se nuiqawaqawa? E rawa beka ni ko gade vata kei ira nomu itokani se kere curu ki na kalasi ni inisitute ena vakalailaitaka na nomu galili? Vakasamataka na veika o sa sotava dredre tiko kei na digidigi cava eso ena rawa ni ra veivuke vei iko.

Vakatalega kina, kakua ni raica sobu na iyaya ni cakacaka vakayalo. Na masu, na vulici ni ivolanikalou, veiqaravi, kei na tiko e na lotu kei na valetabu era sa iyaragi kaukauwa bibi sara ena kena vakalailaitaki na ivakasaribariba ka na vukea mo kaukauwa tikoga.

Wase 3: Tuvanaka na veika mo na cakava ni ko sa vakasaribaribataki. Ena vakasaribariba yadua, vola na nomu ituvatuva vakaikalawa veitaravi.

Me kena ivakaraitaki, ni ko sa vakasaribaribataki sa rawa mo bokoca vakatotolo na nomu talevoni, teks se qirita e dua, taubale se vakaukauwa yago, wilika na iVola i Momani, se cakava eso tale na ka ena vukei iko me vagolei donu na nomu vakasama.

Vola na nomu ituvatuva ena cakacaka ena vukumu! Ena so na gauna era na lako na ivakasaribariba ka sega mada ni lako curuma na nomu itatarovi ituvatuva ni veikalawa kece. Ia na nomu ituvatuva e rawa ni vukea me dreti iko mai na gauna o ya. Ni sa gole na ivakasaribariba, vakavoutaka na nomu ituvatuva ni itatarovi ena veika sa cakacaka rawa kei na sala mena veisautaki kina me mana sara ena gauna e tarava. Maroroi ena dua na vanua o rawa ni raica ena veisiga.

iVakatakilakila

flow chart part 2

Na luluqa sai koya na vanua o caka cala kina, ia o bula totolo tale mai kina ka vakayagataka mo vuli mai kina me tarai cake kina na nomu ituvatuva ni itatarovi. Na luluqa tale e vanua o sa soro kina, cakava tale vakalevu, ka sega ni ko kauwaitaka.

Mo kila tiko ni luluqa sa tiki ni nomu tara cake nomu ituvatuva ni itatarovi. Kakua ni tinia ni ko sa vakayalia na taucoko ni nomu tubu se na cakacaka taucoko o sa cakava e sega ni wili—baleta ni sa vakakina. Rai ki liu vata kei na dua na vakasama ni ko na rawata ka kila ni dua na siga sa na voleka sara mo na vakabulai.

Ni o sa luluqa, tarogi iko mada:

• Na cava e sa yaco?

• Na cava na vuna e duatani kina na ivakasaribariba oqo?

• O a lomaocaoca beka wale tikoga oqo? A vakacava beka na lomamu?

• A vakamalumalumutaki iko beka na nomu a sega tu ni wilika na ivolanikalou?

• O a sega beka ni vakaukauwa yago vakalevu wale tikoga oqo?

• E dua beka na ka ena nomu ituvatuva ni tatarovi e sega tiko ni veivuke?

• Na duidui cava beka o na cakava ena gauna e tarava?

Vola na veika o sa vulica tiko ka toso tiko ga!

Sa rawa me vukei iko o Jisu Karisito ena kena cakacakataki na tubu tiko ni veivutuni, ka sa tu Vua na kaukauwa me rawa kina vei iko ena nomu segata mo valuta rawa kina na iyaloyalo vakasisila. Sa kila vinaka tu o Koya na nomu vakanananu ka sa waraka tiko me taura mai vei iko na icolacola o ya. Kakua ni nanuma ni ko gole Vua ena kuria na Nona icolacola. A sa sauma oti o Koya na kemu isau. Ia, mo cakava ga na nomu vinaka duadua, gole voleka vua na iVakabula, ka kerei Koya me vukei iko mo vakabulai, me veisau na nomu gagadre, ka solia vakalevu vei iko na kaukauwa mo toso ki liu.

Me vaka e vakavulica o Elder Ulisses Soares ena Kuoramu ni iApositolo Le Tinikarua: “Ni da segata tikoga meda vorata rawa na noda ibolebole, na Kalou ena vakalougatataki keda ena isolisoli ni vakabauta meda vakabulai kei na caka mana. Ena vakayacora vei keda o Koya na ka eda sega ni rawa ni cakava vakataki keda.”⁴

Na isema kei na veitokani ena rawa talega me solia vei iko na kaukauwa kei na veivuke mo rawa-ka. E dodonu me tiko e dua e rawa ni vukei iko mo vakatulewa vakataki iko ka raica mo qaqa tiko ena nomu veisiga vinaka kei na siga ca sara. E dodonu mera tokoni iko ka sega ni vakalewai iko tiko. Sa rawa talega mo vakarautaka na veitokoni vata ga me baleti ira. Vakasaqara na ivakasala mai vei ira na nomuni iliuliu ni Lotu se na lewe ni matavuvale. Ka kevaka e gadrevi, e dua na dauveiqaravi se daunivakasala vakacakacaka ni qaravi ni vakasama ena rawa talega ni vukei iko mo raica talega na vuna o rairai sotava tiko kina na vakaleqai ena iyaloyalo vakasisila.

Ko ni sa na imatai ni tabatamata manidia ena 24/7 na curu ki na iyaloyalo vakasisila. Au vakabauta ni sa levu cake tiko na ibolebole oqo kivei ira na nomu tabatamata baleta ni na vinaka cake na iyaya kei na vuku me kauti ira tani eso mai na dai oqo ni ko ni sa itubutubu ka iliuliu ena dua na siga. “E sega ni biuti keda mai ki na vuravura oqo na Tamada Vakalomalagi meda mai vakadrukai ia me lagilagi na noda qaqa.”⁵

E dina ga ni rawa ni ra veivuke na ivakasala oqo ena nomu sasaga mo valuta rawa kina na iyaloyalo vakasisila, kakua ni rerevaka mo raica na ivurevure tale eso. Ena duidui na ilakolako ni tamata yadua me na vakabulai kina. Raica na cava ena vukei iko. Kakua ni guce! Taura na ka oqo vakayadudua ena veisiga. E rawa mo na cakava oqo. O na rawata vakaidina (raica na Filipai 4:13). Ia ena yaco mo vakataka na tamata o sa navuci tu kina.