Na iNaki ni Noqu Papitaiso

iVakatakilakila

man sitting in chapel foyer

Droini mai vei Julia Yellow

Me vaka niu dua na gone e tiko ena taudaku ni koro levu o Taipei, Taiwan, au a sega tu ni kila e dua na ka baleti rau na daukaulotu. Ena imatai ni gauna au a sotavi rau kina, au a lomatarotaka na nodrau itukutuku. A sega ni taura e dua na gauna balavu niu sa maqusa meu muria na nodrau ivakavuvuli ka biuta na kosipeli meu sa bulataka ena noqu bula. Au vakila ni oqo e dua na sala me‘u kila kina ke tiko dina e dua na Kalou.

Ena loma ni dua na vula, au sa vakavulici ena kosipeli kei na ivakaro era na vakavulici ni bera na papitaiso. A yaco vei au na vakacegu niu masu, kau a ciqoma e dua na ivakatakila mai na noqu vulica na ivolanikalou, kau sega vakadua ni calata na soqoni ni Lotu. Au sa qai lewa meu sa papitaiso.

Na bolebole levu duadua au a sotava ena gauna ko ya o ya na leqa ka sa basika tu ena noqu veimaliwai vata kei na so na noqu itokani baleta ni ra saqata na noqu sa curu ena Lotu. Au a dau masu vakalevu me baleta na leqa oqo, ia na neimami veimaliwai sa vaka me ca vakalevu cake ga.

Au a sureti ira na noqu itokani ki na noqu papitaiso, ia era a vakawalena sara ga na noqu veisureti. Au sa sega ni kila dina sara na ka meu cakava. Ni bera na noqu papitaiso, au a dabe duadua tiko ena idabedabe ena icurucuru e valenilotu, ka masulaka me ratou basika mai vakamana na noqu itokani meu na tukuna vei iratou na veisau dodonu au sa mai cakava ena noqu bula ka vakadinadinataka vei iratou niu sa cakava e dua na vakatulewa dodonu niu sa mai papitaiso oqo.

E ratou a sega ni gole mai na noqu itokani, ia niu sa sovaraka na yaloqu vua na Kalou, au a qai vakila e dua na veivakauqeti. Ena gauna o ya, au vakila na loloma levu mai vua na Tamaqu Vakalomalagi. Au kila ni a tu e kea o Koya ka sa rogoca vakaidina na noqu masu.

A lomaqu dina sara mai liu meu na papitaiso ena vuku ni veika totoka sa yaco tiko ena noqu bula, ia ena gauna o ya, au sa mai kila kina na inaki ni noqu papitaiso.

Na veivakauqeti au a ciqoma sa vaka na domo ni Turaga sa vosa tiko vakamalua ka vakadodonu sara ga vei au, ka kaya, “Ena sega ni gadrevi mo vakadinadinataka e dua na ka vua e dua. Ena gadrevi mo vakadinadinataka vei au ni o sa tu vakarau mo lako mai vei au ka toka dei tiko ki na noqu kosipeli ena vo ni nomu bula.”