“E Tiko Beka Vei Iko e Dua na iVola Karakarawa e Vakamatanivola Koula?”

iVakatakilakila

seaag with Book of Mormon inside

Droini mai vei Greg Newbold

Ena vica na yabaki sa oti, au a ciqoma e dua na ivola karakarawa e vakamatanivola koula maivei rau na daukaulotu a veiqaravi tiko ena itikotiko vakamataivalu au a vuli tiko kina ena noqu cakacaka ena Mataivalu e Wai ni Amerika.

Niu sa tekivu wilika na ivola, e dua e tukuna vei au ni sa vakailasu baleta e a lavetaki mai na iVola Tabu. Oqo a vakavuna me‘u vakatitiqataka kina na dina ni ivola oqo, ia au a taura tikoga. Au a wilika vakalailai, biuta ena boto ni noqu kato ni lakoiwai, ka qai guilecava sara.

Ni oti e dua na yabaki, au a samaka sara na noqu beqi ni lakoiwai. Au sa kunea sara kina na ivola ia sa sega tale niu qai taleitaka, au sa mani kolotaka laivi. Ia e muri, au sa tekivu lomatarotaka tiko na cava e tiko ena loma ni ivola karakarawa o ya e vakamatanivola koula. Au sa vakabauta ni yalo oqo sa mai vua na Yalotabu, “ka na veiliutaki ki na caka dodonu” (Vunau kei na Veiyalayalati 11:12).

Ena 2005, a sureti au e dua na itokani vou me‘u rogoci ira na daukaulotu. Taumada, au a lomatarotaro ka vakatitiqa me baleta na veika era sa vakavulica tiko, ia rau a nuidei na daukaulotu ka solia mai na isaunitaro e vakaibalebale cake vei au.

Ena gauna au sa qai kila kina ni o ira na daukaulotu oqo sa vakataki rau au a sotava ena eso na yabaki sa oti e liu, kau a maqusa na tarogi rau, “E tiko beka vei kemudrau e dua na ivola karakarawa e vakamatanivola koula?”

“Io, e tiko qo!” a sauma mai e dua vei rau. “E vakatokai na iVola i Momani!”

Sa dua na ka na noqu marau niu sa taura tale na iVola i Momani. Na ka dina, au a maqusa kau a wilika vakarua ena loma ni rua na macawa! Ni‘u sa wilika ka masu, au sa kila kina ni sa vosa ni Kalou.

E dua na ka a kaya o Elder Rubén V. Alliaud ena Vitusagavulu ena koniferedi raraba e sema tiko ki na veika au sotava vata kei na iVola i Momani: “Vei koya sa dau wiliwili sa yalodina me vulica [na iVola i Momani], ena yalo ni masumasu, ena sega walega ni vulica na veika e baleti Karisito ia ena vuli mai vei Karisito—vakabibi ke ra sa vakatulewataka mera ‘tovolea na savasava ni vosa’ [Alama 32: 5] ka sega ni besetaka vakatotolo ena vuku ni tawavakabauta taumada mai na veika era kaya eso baleta na veika era se bera ni wilika mada.”¹

Ena noqu wilika na iVola i Momani, masu, kei na vakanuinui vua na Yalotabu, au sa raica e levu na veika sa yaco ena noqu bula.