Qiriti Tamaqu
Kevaka meu na butu vakatotolo, a vakasamataka o Yu, au na yaco i vale ni bera ni luvu mai na gaunisala.
“Dou marau ga, niu na liutaki kemudou tiko” (Vunau kei na Veiyalayalati 78:18).
A kalawa mai o Yu mai na koronivuli veidrigidrigi ki na gaunisala osooso. A vakasinaiti tu na nona vakasama ena veika ni fika ni oti mai na kalasi. Era vakusakusa yani na tamata era vakaiviu. Sa taubi sara mai na uca, ka sa sinai na gaunisala ena wai.
A kabi sara mai e yasana na nona itokani o Lin. “Mo na qiriti tamamu me mai kauti iko,” a kaya o Lin. “E kaya o Mr. Zhang ni sa waluvu tu eso na vanua ena siti.”
“Au na rawa ga ni yaco i vale vakai au.”
“Ia raica mada na levu ni wai!” E kaya o Lin, ni dusia tiko na kui ni wai ena kena idrodro.
E vakalailai ga, nona yamasamasa o Yu. E dina beka o Lin? E rairai dodonu beka me qiriti Tamana me draivataki koya i vale ni bera ni waluvu na gaunisala. Ia o koya kei Tamana rau a veiba ena bogi, ka se cudru tikoga o Yu. A sega ni vinakata me kerei Tamana me vukei koya.
A sereka na nona basikeli o Yu ka vakamoce vei Lin. Kevaka meu na butu vakatotolo, a vakasamataka, au na rawa ni yaco i vale ni bera ni luvu na gaunisala.
A butu sara vakaukauwa, ia sa tekivu me batabata na ligana, sa suasua na nona isulu, ka sa oca. Vakadua tale, sa vakasamataka me sa qiriti Tamana. Sa mai vua beka na Yalo Tabu na yalo o ya? A kaya o rau na daukaulotu a papitaisotaki koya ni na dusimaki koya tiko na Yalo Tabu. A rai i lomalagi o Yu. A vakaturu buto sara ka sega ni raica rawa na veidela ni vale. Ia e se cudruvi Tamana tikoga.
A vakawalena na yalo o ya ka butu tikoga yani. Sa cere sara na wai ka ra sa sogota na nodra sitoa na kedra itaukei. Era sa tokitaka na tamata na nodra iyaya ki na tabavale e cecere cake. A raica o Yu e dua na tinani gone ni biligi rau tiko na luvena ena dua na waqa palasitika lailai ena waluvu.
Sa yacova qo na duruna na wai, ka sa sega tale ni rawa vei Yu me butuka yani na nona basikeli. E a sobu mai ka biliga. Sa na rairai bera me na kacivi Tamana, ka se tau tikoga mai na uca. Sa vadugu mai na kurukuru ka tibi mai na liva e cake vua. Sa vaka me rere o Yu. Ka sa oca sara! A rai yani ki liu. E se yawa tikoga na vale. A sega ni dodonu me a vakawalena na Yalo Tabu baleta walega e dua na veiba sabalia.
A tu vakadua o Yu me cabora e dua na masu lekaleka. A sega ni rogoca na domona ena dela ni uca kei na kurukuru, ia e kila ni Tamada Vakalomalagi ena rawa ni rogoci koya.
“Tamaqu Vakalomalagi,” a masu o Yu. “Yalovinaka ni vukei au meu yaco bula rawa i vale.” Ni sa oti, a vakila na veirauti ni kaukauwa me toso tale kina.
Me kena itinitini, a raica rawa sara o Yu na nodratou vale e delana. Ena batabata, wawale, ka sa yali e dua na nona ivava, a gu yani ena oca o Yu ki na delana. A raici Tamana ni waraki koya tu e tautuba. A cici sobu yani o Tamana me sotavi koya, ka tasika na wai ni sa cici yani.
Ni sa yacovi koya yani o Tamana, a mokoti Yu. “Au sa taqaya sara ga!” A kaya o Tamana. “Mo a qiriti au mai!”
“Au nanuma ni daru se veicudruvi tikoga,” a kaya o Yu.
“Au sega ni lialia sara meu kua ni vukei iko,” a kaya o Tamana. A taura na basikeli nei Yu ka biliga cake yani ena delana.
Dina ga ni vadugu tiko na kurukuru ena tadrua ni veivale cecere ka taubi tiko mai na uca, a yaco vei Yu e dua na yalo katakata vinaka. A vakila na vakacegu kei na veitaqomaki ni muri Tamana yani i vale.