Vakasigalevu Galili

iVakatakilakila

Lonely Lunchtime

A gole yani o Kali ki na rumu ni vakasigalevu ka rai wavoki. Era cici kece na gone vei ira na nodra dui itokani ka soqoni vata yani ena veiteveli. A kosakosa sara na rumu ena veivosaki malaude kei na dredre ni mamarau. E a se qai ikarua walega ni siga e koronivuli, ia sa vaka mera dabe vata o ira kece kei na dua tale vakavo ga o Kali.

A boboka na itautauri ni nona koniteina ni vakasigalevu ka gole ki na dua na teveli. “E rawa ni‘u dabe e yasamu?” A taroga o Kali.

A rai cake mai e dua na goneyalewa, ulubalavu tali damudravu. A vagugu ka kurea na uluna. “Sega. Sa tauri oti tu,” a kaya mai.

“DONU.” A toso tale o Kali ki na dua tale na idabedabe lala ka biuta sobu na nona koniteina ni vakasigalevu.

“E sega ni rawa mo dabe eke! Au dau maroroya tiko na idabedabe qori” a kaya mai e dua na gonetagane e vakasiqeleti oriori drokadroka. A biliga e ra ena fuloa na koniteina ni vakasigalevu nei Kali. A dredre kece na nona itokani.

A cuva sobu o Kali ka tomika cake na nona koniteina ni vakasigalevu. A taubale kosova na rumu ni vakasigalevu ka laki dabe ena dua na teveli lala. A raica kina e dua mai na nona itikotiko, ka tovolea me yaloyalo vua, ia a rai tani o koya. A vakabe mata sara o Kali. Na cava na vuna a sega ni vinakata kina e dua me nona itokani?

A raica sobu o Kali na kena kakana. Sa sega tale ni via kana o koya. A qusia na wainimatana, sogota na nona koniteina ni vakasigalevu, ka curu yani i tuba.

Na tamata yadua era sa qito vata tiko kei ira na nodra itokani. Sa laki dabe duadua ga o Kali ena dua na idabedabe ka saravi ira na vo ni gone era marau tiko ka sega kina o koya. A qai raica o Kali e dua na cauravou e rau taba vata toka e dabe duadua toka ena co. A dara tiko e dua na sote dromodromo sikavi maka ka duri cake toka na uluna e muri.

A rai tani o Kali. A raica eso na ilawalawa ni goneyalewa mai na nona kalasi era qito sukuwea-va tiko. A diva tu me ra na sureti koya me na qito vata kei ira.

A rai tale yani o Kali vei gonetagane o ya. Sa rubeca sobu tu e ra na uluna, ka sa tomika tiko na co e ruku ni yavana. E nanuma sara o Kali na ka a kaya o Nana ena so na gauna: Vakaraici ira na gone era galili.

A vakabe mata sara o Kali. E a tiko duadua talega okoya. A sega ni dua a tovolea tiko me nona itokani!

Ia sa qai vakasamataka o Kali ena gauna a papitaiso kina ena yabaki sa oti. A yalataka ni na vakarorogo vua na Yalo Tabu. E rairai a vukei koya tiko na Yalo Tabu me nanuma tiko na veika e tukuna o Nana. E rairai saga tiko na Yalo Tabu me kaya vua me laki qito vata kei koya na cauravou e vakasote dromodromo tiko.

Sa cegulevu o Kali ka sa tucake yani. Sa yaco e lomana e dua na yalo vinaka. A lako sara yani ka dabe vata kei koya na gonetagane ena co.

“Bula,” a kaya o Kali.

“Bula,” a vosa totolo mai o cauravou.

“Na cava na nomu roka talei?”

“Um … drokadroka.”

“Totoka qori. Au taleitaka na piqi,” a kaya o Kali. “E tiko na nomu manumanu talei?”

A duri cake vakalailai o gonetagane ka rai yani vei koya. “Io Au taleitaka dina na dainaso.”

“Oi, au talega. Au dau taleitaka na triceratops.”

A matadredredre o cauravou.

A taqiri sara na lali. Sa tucake sara o Kali ka vakamoce yani vei cauravou. A matadredredre ni sa taubale duadua lesu ki na nona rumunikalasi. A rairai sega beka na nona itokani vinaka sara, ia a vakila na marau ni sa kila ni sa cakava na nona vakacagicagi e dua tale me vinaka cake tale vakalailai.