A Vakataucokotaki Au Vata Tale o Koya

iVakatakilakila

puzzle of a name

iTaba mai vei Joshua Dennis

Au dau nanuma tu ga niu dua na tamata bulabula vinaka. Au a kurabui niu yadra ena dua na mataka ni sa vaka me muloni vakaukauwa sara na serequ ka sa voleka me kacabote. Au a cicivaki yani ki valenibula, ia ni oti e vica na auwa noqu vakadikevi, era a sega ni raica rawa na vuniwai e dua na leqa. Era a vakasukai au lesu ki vale, e dina ga niu se sotava tiko e dua na mosi rarawa. Sa tekivu oqo e dua na vula vitu ni rarawa balavu ni qaravi vakavuniwai, tiko e valenibula, kei na mosi kaukauwa sara au se qai bau vakila ena noqu bula.

Au sa tekivu yalolailai. Au sa sega ni lako ena noqu kalasi ena koliji ka toki lesu vei rau na noqu itubutubu. Au sega ni rawa ni gade vata kei ira na itokani. Au sa mosi sara vakalevu meu cakava e dua na ka au taleitaka. Au a vakila ni veika kece sara au kauwaitaka—na noqu rai, noqu veimaliwai, noqu taledi—sa voroki, ka sa dredre kina meu biuta vata taucoko tale na veitiki ni noqu bula taumada. Au sa qai tekivu lomatarotaka: E rawa vakacava vei Tamada Vakalomalagi me vakatara me yaco oqo vei au? A sega beka ni lomani au o Koya?

Ni se baci oti tale e dua na veiqaravi vakavuniwai luluqa ka mosi, au sa vinakata ga meu ovici vaka na polo ka tagi. Ia niu yaco yani ki vale, au raica e dua na ka matalia ena varada: e dua na kateni ni vava makawa ituvaki ca e tepitaki wavoki tu ka volai tu kina na yacaqu.

E dua na ivola e toka ena kateni e vakatakila ni kateni a vakauta mai e dua na noqu itokani. A rogoca o koya niu a tauvimate ka vinakata me vakayaloqaqataki au. Niu sa dolava na kateni ni vava, au raica ni sinai tu ena veitiki lalai ni Styrofoam. Oqo e dua na iba caka ga e vale me baleti au sara ga.

Niu sa vakasotara vata na iba oqo, au sa tekivu tagi. Na iba o ya a tuvai kina na yacaqu, era vakavolivolita na veitukutuku kamica ni loloma kei na veivakayaloqaqataki. Au raica ni veitiki kavoro lalai baleti au sa mai biu vata tale oqo ena noqu sa tuva tiko na iloloma maivei noqu itokani.

Ni oti toka o ya, au sa tekivu tauri wainimate me na vakalailaitaka na vakatakilakila ni mate ka vukei ira na vuniwai mera vakadidike kina. Na kequ ituvaki a duatani sara ia e rawa ni wali, vata kei na wainimate dodonu, sa na rawa meu na bula vinaka tale me vaka e liu.

Me vaka na vakabulai ni yagoqu, au kila niu na sega vakadua ni guilecava na veika au sa vulica. Ena vuku ni iloloma kamica ni noqu itokani, au kila niu sa lomani ka a sega ni guilecavi au na Tamada Vakalomalagi. Ni oti e vica na vula ni kavoro ni yalo, au sa vakavinavinaka ki na yalololoma nei itokani kei na loloma nei Tamaqu Vakalomalagi, au sa mai taucoko tale kina.