Faneva na Daukaulotu
A rai yani ena katubaleka o Faneva ki na gaunisala osooso ena tautuba ni nona vale. A raici ira na tamata ni ra dre qiqi tiko ni kakana draudrau, raisi, isulu, kei na kakana tale eso mera volitaka. A rogoca rawa na motoka ni ra vakatagi sici ka ra kodro tiko na koli. A mani rogoca e dua tale na rorogo.
“Mama, e dua e tukituki tiko!” A kaci yani o Faneva. A dolava sara na katuba o Mama. Rau sa duri tu ena katuba e rua na cauravou e rau dara tu na sutu ka vakaneketai. Se bera mada vakadua vei Faneva me raica e dua ni vakaisulu tu vakaoya ena nona itikotiko raraba e Madagascar.
“Keirau daukaulotu ni Lotu i Jisu Karisito ni Yalododonu Edaidai,” a kaya e dua vei rau. “Keimami dau vakavulici ira na tamata me baleti Jisu. E rawa beka me keirau wasea vei kemudou e dua na itukutuku?”
Sa marau sara o Faneva ni sa sureti rau mai loma o Mama. Era a soqoni kece sara mai na vuvale taucoko mera rogoca na veika baleti Jisu Karisito kei na kena sa mai tu tale e vuravura na Nona Lotu.
Ni oti na siga ko ya, era sa sikova tiko mai na daukaulotu na vuvale nei Faneva ena vuqa na gauna. Era kauta mai e dua na ivola e vakatokai na iTalanoa ena iVola i Momani. A taleitaka sara o Faneva me wilika vata kei na nona matavuvale!
Ena dua na siga au na daukaulotu ka wasea na iVola i Momani vei ira na tani, a kaya e lomana o Faneva.
Dua tale na gauna ni rau gole mai na daukaulotu, rau a vakavulica na vuvale nei Faneva ena ivakarau ni masu. A vulica o Faneva ni sa rawa vua me vosa vei Tamada Vakalomalagi ena gauna cava ga, kei na vanua cava ga.
Ena dua na siga au na daukaulotu ka vakavulici ira na tamata me baleta na masu, a vakasamataka o Faneva.
Ena dua na siga rau a taroga na daukaulotu e dua na taro bibi.
“Ena rawa beka mo dou muria na ivakaraitaki i Jisu Karisito ka papitaisotaki?” a taroga e dua vei rau.
A vakila o Faneva na marau ni yalona. “Io” au a kaya.
“Io!” a kaya o tacina vata kei Mama.
A kaya o Papa ni se bera tiko ni vakarau me papitaiso. Ia sa DONU vua ke ratou sa papitaiso na vo ni vuvale. Io a yaco vakakina vei iratou! A papitaiso o Faneva mai na dua vei rau na daukaulotu a vakavulici koya baleti Jisu.
Ena dua na siga au na daukaulotu ka vukei ira na tamata mera papitaiso, a vakasamataka o Faneva.
E dua vei ira na tiki vinaka duadua ni lewena na Lotu o ya na lako ki na Lalai. A taleitaka sara o Faneva na itaviqaravi kei na sotava na itokani vou. Ia na nona ka taleitaki duadua o ya na lagata na nodra sere na Lalai. Ena dua na Sigatabu ena Lalai, era a lagata tiko na sere me baleta na kena wasei na kosipeli.
“Au vinakata meu daukaulotu ena gauna oqo,” a lagata o Faneva. “Au sega ni vinakata meu waraka na gauna meu qai tubu cake kina.”
Au sa rawa ni tekivu cakava oqo na cakacaka ni kaulotu, a kila oqo o Faneva. Au sega ni via waraka ena dua tale na siga!
Tekivu mai kea, sa vakasaqara o Faneva na sala eso me wasea kina na kosipeli. A tovolea me dua na ivakaraitaki vinaka. A sureti ira na tamata ki na Lotu. A vukei ira na wekana. Ni oti e vica na yabaki, sa yalomatua sara me vukei rau na daukaulotu me vakavulici ira na tamata ena nona siti. Ni oti e vica tale na yabaki, sa laki kaulotu sara vakai koya—sotavi ira na tamata vou ka wasea na kosipeli, me vaka ga rau a wasea vua na daukaulotu.