Berita ni Burabeti

Imwiin te Maungatabu ni Kabuta ae Tamaroa n Eberi 2020, I a tia n iangoa te taeka ae, Berita ni Burabeti.

Ko a tia n ongo taekana? Ko a tia ni karekei?

Man uoua kiibu n Reirei ao Berita aika Tabu ti karekei nonoori aika kakawaki ibukin Berita ni Burabeti.

Te moan, mwakoro 1:38 e reirei bwa ngkana a taetae ana toro te Uea, ake ana burabeti, kanga ai aron ae boni Ngaia ae taetae; “. . . e ngae man bon oin bwanaau ke bwanaaia au tia mwakuri, bon titebo.”

Te kauoua, mwakoro 82:10 e kaota te berita aei; “Ngai, te Uea, I bae ngkana kam karaoa ae I taku, ma ngkana kam aki karaoa ae I taku, akea te berita nakoimi.”

E ngae ngke kiibu aika uoua aikai a karekeaki ao a koreaki bwa kaotioti aika kakaokoro, ngkana a uaia ni warekaki, aia rongorongo e uota te oota, te kantaninga, ao te korakora ae boou.

Noran taian reirei ni kibu aika uoua aikai, a kamatoaa nakoira, bwa n aron are a taekinna Burabeti aika maiu, Taan mamata, ao Taan kaotioti, “I berita” bwa e bae te Uea nakon te berita anne, ngkana ti karaoi baike a kainnanoaki ibukin karekean kakabwaia ake a kaman taekinaki.¹

Iai teniua mwaneka ibukin karekean, Berita ni Burabeti.

1. Boni karaoan te ukeuke ibukiia.

2. Taraan baike a kainnanoaki bwa ko tau ibukiia.

3. Maiuakinan tuua ibukin karekeaia.

Ruaiwa Berita ni Burabeti kanakoaki i nanon te Maungatabu ni Kabuta n Eberi 2020.

Beretitenti Russel M Nelson; “Mai mwaina, I berita bwa ngkana ti karaoa ara kabanea ni kona ni kaeta aran te Ekaretia, E na kabwaroa Mwaakana ao Ana kakabwaia i aoia Aomata aika Itiaki, n aron ae tuai nonoraki mai mwaina, I kaboua n te bong aio.”²

“I berita bwa ngkana kam kabatiaa riki ami tai ni karaoa te mwakuri n te tembora ao kakaeaia ami riki, e na rikirake ao n tamaroa ami konabwai n ongo bwanaana.”³

N ana marooro naba anne e taku te burabeti; “Tera ae e na riki ngkana ko rineia n ongo, are e a tia n taekinna te Tia Kamaiu ao are E taekinna ngkai rinanoia Ana burabeti? I berita bwa ko na kakabwaiaaki ma te korakora ni kaitarai kariiri, kangaanga, ao mamaaram. I berita bwa a na nakoraoi tekatekami n taanga, reitakimi n te utu, ao n ami mwakuri n te bong koraki. Ao I berita bwa e na rikirake aron namakinan te kimwaireirei ni maium e ngae ngke e korakora te angibuaka ni maium.”⁴

N ana marooro ni kainiin Beretitenti Nelson ao e katuka te berita aei; “Ara tataro bwa kam na kaboua nanomi ni manga ongo bwanaan te Tia Kamaiu. I berita bwa e na kerikaki te maaku ao e na keerake te onimaki.”⁵

Unimwaane Neil L Andersen; “I berita nakoim bwa ngkana ko rineia ni kakoauai ao n kawakin raoi baika a tabu i nanon maium, e bati riki ae na roko nakoim.”⁶

Unimwaane Ulisses Soares e taku n ana marooro iaon ana Boki Moomon; “I berita nakoimi bwa ngkai kam kamatebwaia ma te tataromwaaka ao te kakaonimaki, ko kona ni karekei berita ao kakabwaia ake a taekinaki. I a manga kamatoai riki berita ake a koreaki i nanona: bwa ngkana kam “butiia te Atua, te Tama ae Akea Tokina, n aran Kristo, ngkana arona bwa a koaua bwaai aikai; ao ngkana arona bwa kam bubuti ma te nano ae koaua, ma nanomi raoi, ao te onimaki iroun Kristo,” Ma te nanoanga e na “kaota te koaua nakoimi, ni mwaakan te Tamnei ae Raoiroi.”⁷

Unimwaane Ronald A Rasband; “I berita bwa ngkana kam ira ana reirei ara burabeti ae tangiraki, Beretitenti Russell M. Nelson, ana kauntira, Abotoro, ao taan kairiiri n te Ekaretia, ao ngkai kam kakauongo nakoia burabeti ake a taetae ni burabetiia ara bong, kam na kaonaki, i nanomi ao n tamneimi, ma te tamnei ao waakin Kaokakin Bwaai. I berita bwa kam na nora bain te Atua i nanon maiumi, kam na ongo ana wirikiriki, ao n namakina Ana tangira.”⁸

I kaota au kakaitau ae abwabwaki ibukin aia kairiiri Burabeti aika maiu, Taan Mamata ao Taan Kaotioti. Ai tamaroara aron noran aia kairiiri ae kairaki ao bannaia ni kakaonimaki nakon te Uea Iesu Kristo.

I kaota au koaua bwa Tamara are i Karawa e ongo ao e kaekai ara tataro, Ngkana Burabeti, Taan Mamata, ao Taan Kaotioti a anga berita nakoira, a na koro nanon berita akanne ngkana ti maiuakina te maiu ae eti ibukin karekeaia. I kaota riki au koaua bwa Iesu bon Te Kristo, are bon, te Mesia are e a kaman kariariaaaki ao te Tia Kamaiua te aonaba. E maiu!