Bitaki nakon Tein Kunnikaia Mitinare aika Mwaane

I nanon Tuun n te ririki aei, Ana Ekaretia Iesu Kristo ibukiia Aika Itiaki ni Boong aika Kaitira e katanoatai bitaki nakon tein kunnikaia ataenimwane ake a mwakuri ni mitinare.

Bitaki aikai, are a tia ni kabwaataki iroun te Moan Beretitentii ao te Kooram n Abotoro n te Tengaun ma Uoman, e na angan te Beretitentii n te Aono te kona ni kangaraoi kunnikai ni mitinare nakon taabo aika onoti ni katamaroaa ao ni kateimatooa kakawakin te mitinare, maurina, ao kanakoraoan ana mwakuri, te aki maakinaki ao aron te katei n te tabo n teimatoa n riki bwa ana tia tei te Uea ao Ana Ekaretia.

“Te kunnikai ni mitinare e a tia ni bibitaki i nanon te tai ni kaeineti ma te tabo, aron tein kunnikai, ao te katei,” e taku Unimwaane Dieter F. Uchtdorf, kaain te Kooram n Abotoro n te Tengaun ma Uoman ao te tia babaire n te Missionary Executive Council. “Bitaki aikai bon reitan te waaki anne. Ni baike ti tarai, ti moanibwaia nakoan te mitinare bwa te tia tei ibukin Iesu Kristo, marurungina ao maurina, ao aron te katei n te tabo are e beku iai.”

Iaan kainibaire aika boou, aron tein ana kunnikai te mitinare e a manga kabouaaki, kanoan aei bon te kabaraaki te mainaina ma te neketai ao, n taabo tabeua, te kooti. N reita anne, n taabo tabeua ake a kariaiakaki, ataeinimwaane (ake a kinaki n araia ae elders) a kona ni bwaina te kabaraaki ae mainaina ke ae buruu ae ti tematana ma te neketai ke akea te neketai. Bitaki aikai a na baireaki iroun te Beretitentii n te Aono, ao a na kaongoaki mitinare iroun aia beretitenti n te mition ngkana a kona ni karaoaki baikai n aono ake a beku iai.

Ni kabane elders a na teimatoa ni bwaina te kunnikai ae mainaina ao te neketai ao, n taabo tabeua, te kooti ngkana a nakon te tembora, botaki n taromau n te Tabati, aia maungatabu taan kairiiri, aia tabo ni kataneiai mitinare, botaki ni bwabetito ao botakin te ekaretia ake tabeua.

“Kunnikai ni mitinare a riai n taainako n tararaoi, ni karinerine ao n aki maakinaki n aia tai mitinare ni beku n aia mwakauri n reireiniia aomata taekan ana euangkerio Iesu Kristo,” e taku Unimwaane Uchtdorf.

Te katanoata aei e ira bitakin katei ni kunnikai i nanon Ritembwa 2018 ibukiia kairake n ataeinaine ake a beku bwa mitinare.