Te mwaane ae tei Fiji e buokiia Ianena ake a tei i rarikin te Kawai ibukin maten aia Kaa

Api Tuitubou e mwananga bwa e na kawariia ana karo i rarikin Suva, Fiji ngke a nora naba te kaa, are titebo ma katein ana kaa, are e uruaki ao n tei i rarikin te kawai. Api, are bon kaain Ana Ekaretia Iesu Kristo ibukiia Aika Itiaki ni Boong aika Kaitira, e tei ao n titirakiniia kaain te kaa bwa tera ae riki.

Ibukina bwa iai ana tibeea ibukin bwain te kaa ni mwengaia ana karo n te tabo ae uakaan, e waaki ni karaoa uruakin aia kaa, ma n te tai ae waekoa e kunea bwa e korakora riki te uruaki nakon are e kataningaia. E na bon kainnanoa ana ibuobuoki te mwakaeneke ae mwaatai.

Tuitubou e a ataia bwa ngaia raoraona aika boou aikai a bon tangoa te kaa aei mai iroun aia koraki ao a tia ni mwananga n te raroa ae abwabwaki man aia kaawa i Ra bwa a na kabonakoi aia bwai n te mwaakete i Suva. Ibukina ngke iai irouna ana tibeea ibukin bwain te kaa, e motikia bwa e na anganiia ao e kakaea temanna are mwaatai bwa e na ibuobuoki ni karaoa te kaa.

“Imwin iangoan aron te raroa are a tia ni mwananga iai ao korakoraia n uota aia bwai bwa a na mwaaketeni,” e taku Tuitubou, “E roko irou are N na angania bwain onobwaian te kaa (ngkai iai irou). Bon tii man taraakin moamoaia . . . ngaia ae e roota nanou.”

Tabeua te wiiki imwina, Tuitubou e roko kawarana iroun teuare te tia bwaibwai n te kaa are e a tia ni karaoaki. “A roko ma uotaia te baeki ni katiawa ao uoua te tatin te ben,” e taku. “Te kakaitau are a uotia e karekea te kukurei ae bati.”

Teuare te tia bwaibwai n te kaa e “tuangai bwa uotana ake tao e uotii e bon aki kona ni boo iai boon onobwaian bwain te kaa, ao ngaia ao ana utu a kakaitau ao a tia n tataro ibukiu ao au utu,” e taku Tuitubou.

E reitia n taku, “E a tia ni tibwauaia nakoia ana utu ao raoraona aron temanna te Ianena ni buoka ai natina n te kawai, ao aron te Atua ni kamaneia n te tabo ae eti ao n te tai ae eti are N na kona iai n roko ao ni buokiia.”

E taekinna Tuitubou bwa e kakaitau ngkai e kona n ibuobuoki. “I kakoaua bwa ngkana ti kona ni buoka temanna, a anga am ibuobuoki, ‘bukina bwa am ibuobuoki nakon te aomata anne e na rang buokia ao e na bon buokiko naba.’”

“Ao i nanon naba taai aika kangaanga are ti rinanona, te karaki ae uarereke aei e karika te moangare ni moamoau ao e a tia ni buokai n anga au ibuobuoki ngkana I kona ni karaoa au ibuobuoki.”

N Okitobwa 2019 n te Maungatabu ni Kabuta n Ana Ekaretia Iesu Kristo ibukiia Aika Itiaki ni Boong aika Kaitira, e taku Beretitenti Russell M. Nelson: “Aomata aika Itiaki ni Boong aikai, n reitaki ma taan iriira Iesu Kristo ake tekorakina, a ukoukori kawai n ibuobuoki, ni kaungaa, ao n tangiriia tabeman. Naake a tauraoi n aranaki bwa ana aomata te Uea a ‘tauraoi n uota rawawatan temanna, . . . n tang ma naake a tang; . . . ao [n] karau nanoia naake a tangira karauan nanoia.’ A ukoukora maiuakinan te moan ao te kauoua n rietaata n tua. Ngkana ti tangira te Atua ma nanora ni kabane, E raira nanora nakon te kan buokiia tabeman n te kawai ae tamaroa, ao n itiaki” (Russell M. Nelson, “Te Kauoua n Tua ae Korakora,” Riaona, Nobembwa 2019, 96).