Savali Faaleautaitai i le Eria
Ia Faia Lava Lona Finagalo
O lo tatou Faaola o le faata’ita’iga maoa’e lelei lea o le faia muamua o le finagalo o le Atua. I le togala’au i Ketesemane, a’o tatalo atu Keriso i Lona Tama, a’o ia tauaveina i Ona luga agasala, fatiatama’i ma leaga o le lalolagi, e le mafai ona ou malamalama atoa i le o’oo’oga o tigā ma le mafatia o Lona agaga na ia o’o i ai na ala ai ona Ia faapea, “Lo’u Tama e, afai e mafai, ia ave’ese lenei ipu ma a’u,” ae ona o le telē o Lona alofa ma Lona usiusita’i na ia faaalia ai i Lona toe faapea mai i Lana manavaga lava lea e tasi, “ae ui i lea e lē faia lo’u loto a’o Lou finagalo.”1
I le tele o mau ua tatou faitauina e uiga i isi so’o faatuatua o e na latou faasoa lenei lava lagona e tasi e pei ona faia e le Faaola ma faatagaina le finagalo o le Atua e faamuamua. Ae le’i faamauina e le perofeta o Apinati lana molimau i lona ola, sa ia faasoa atu ma le toa le savali o le talalelei ma folafola atu, “. . . Peitai ou te faauma atu laʼu savali; ma ona lē afaina ai lea po o fea ou te alu i ai, pe afai e faapea e faaolaina a’u.”2
E faapena fo’i, o Sataraka, Mesako ma Apeteniko na ta’utino atu i le tupu o Nepukanesa, “afai o lea, ua mafai e lō matou Atua matou te auauna iai ona lavea’i mai ia te i matou mai le ogaumu e mu ai le afi, e na te laveaiina mai lava i matou ai lau pule le tupu.
“A e peita’i, a lē o lea, e silafia e oe le tupu e, matou te lē auauna i ou atua, o le tupua auro fo’i ua e faatuina, matou te lē ifo iai.”3
Ma Amona, le atali’i o le tupu o Mosaea, ma se lagona loloto e “ona sa latou ave e talai atu le afioga a le Atua i ni tagata aivao, ma lotoma’a’a ma feai,”4 o lona faanaunauta’iga musaesae na tu’ufa’atasia i lana tali na tuuina atu i le tupu o Lamonae: “Ioe, ou te manao ou te nofo i totonu o lenei nuu mo se taimi; ioe, ma atonu foi seia oo i le aso ou te oti ai”.5
O nei so’o totoa o le Ali’i e le’i faaluafesasi i ā latou molimau ma sa faapei o le Faaola, o i latou uma ta’ito’atasi na latou faatagaina le finagalo o le Tamā ina ia faamuamua nai lo o latou olaga lelei.
Ou te manatua a’o o’u laitiiti, ma ou faalogologo i tala o le liliu mai o lo’u tamā. Ina ua o’o atu le talalelei a Iesu Keriso i Samoa, e le’i talileleia e tagata. E to’atele ē na faafefeina e lenei lotu fou ma faasagatau i ai ma sauaina i latou o e na filifili e auai. E to’atele e na liliu mai na faate’aina ese mai o latou nu’u ma aiga ma e to’atele e na sosola ese atu i nisi nofoaga mo le saogalemu. Ona o lo’u tama o se ali’i talavou ma se tagata e fiailoa se mea, na ia tonu ai e na te fia iloa po’o a mea e a’oa’o e le lotu fou lenei. Na o’o ina papatisoina o ia i Le Ekalesia a Iesu Keriso o le Au Paia o Aso e Gata Ai.
Na salalau le tala i lo matou nu’u ua auai lo’u tama i le Ekalesia, na lapata’ia o ia e se uo mai le nu’u na popole ona o ni tala ua faalogo i ai o le ‘a susunuina o ia i se umu, o le mea lea na sola ese ai lo’u tama ma maua sona lafitaga ia Malietoa Talavou Pe’a Fitisemanu ma Alisa Fitisemanu. E ui lava ina lamatia lona ola ae sa tu’u atu atoa lona loto i lana ekalesia fou. E pei ona a’oa’o mai le Faaola “. . . e tatou te iloa i latou i o latou fua.”6 O faamanuiaga o le Talalelei Toefuataiina a Iesu Keriso i lo’u olaga, ma lo’u to’alua ma le ma fanau ma olaga o aiga o ma fanau, o nisi na o fua o le faatuatua o lo’u tama.
Na a’oa’o mai Peresitene Russell M. Nelson, “O le fesili mo i tatou taitoatasi, tusa lava po o le a le lanu, e tutusa lava. O e loto e faamuamua le Atua i lou olaga? O e loto e avea le Atua ma faatosinaga sili ona taua i lou olaga? Pe o le a e faatagaina Ana afioga, Ana poloaiga, ma Ana feagaiga e faatosinaina mea e te faia i aso taitasi? Pe o le a e faatagaina Lona siufofoga ia faamuamua i lo se isi lava leo? O e loto e faataga soo se mea o finagalo o Ia e te faia ia faamuamua i lo isi faamoemoega uma? O e loto e tofatumoanaina lou loto i Lona finagalo?”7
E matua’i o’u faafetai tele i faata’ita’iga a lo’u tama, o nei auauna faatuatua ua faamauina a le Alii ma isi uma so’o faatuatua ma e mulimuli ia Keriso. E lē muta la’u faafetai mo faata’ita’iga atoatoa a le Faaola, o lē na tu’uina atu Lona loto i Lona Tamā.
A’o tatou talisapaia le valaaulia mai ia Peresitene Nelson ina ia “filifili e faamuamua le Atua i o tatou olaga”,8 o le a tatou maua le a’afiaga mo i tatou lava e faapea o lo tatou Atua “o le Atua o vavega.”9 Ou te talitonu o le a mafai ona tatou faapea atu ma le loto i ai ma le lotomaualalo, le Atua e, e le o lo’u loto ae o lou finagalo, ia faia.”10