O Se Talavou Tahiti Na To’aga E A’oa’o, Auauna ma Ola Tuputupu A’e

I le mae’a ai o vaiaso o le tapunia ona o le faama’i o le koviti, na tonu ai i se ali’i talavou e 14 tausaga le matua o Kuhio Maraetefau, mai Tahiti, e na te tu’ufaatasia se tolauapiga mo ana uo, mo gaoioiga muamua a’o saunia atu mo le faanofoesea.

“Na ou filifilia lenei gaoioiga o le tolauapiga ona o se avanoa lea mo tagata talavou ina ia o ese mai o latou tagata fa’afifilemu, ma o ese mai le aai ma faalatalata atu i le natura,” o lana tala lea.

“Sa ou vaaia uma le fuafuaga o lenei faamoemoe, faatulaga gaoioiga ma meaai, ma tu’u atu matafaioi ma galuega ina ia faaa’afia uma ai tagata talavou e auai.”

Na tele ni lu’itau na feagai ma Kuhio a’o ia fuafuaina lenei tolauapiga. Ae peita’i, na ia faapea mai, sa tele mea sa ia a’oa’oina i le taimi na fuafua ai nei mea.

Na fai mai o ia, “O le mea moni, o le tele ia o mea e fuafua ma mafaufau i ai pe a fatulagaina se tolauapiga faapenei,”

“Sa lē mafai ona ou taulimaina mea uma i le faatulagaina o lenei tolauapiga. Ae o le mea na lelei ai, i le fesoasoani mai a o’u matua, na matou faatulagaina ai mea taua uma e tatau ona faatino. Ma na i ai fo’i la’u Epikopo, o Louis Sandford, e fesoasoani ia te a’u ina ia faataunu’uina lenei tolauapiga.”

O le a’oa’oga na ia fuafuaina na fesoasoani tele i tagata sa tolauapi e a’oa’oina auala e tolauapi ai e pei o le kukaina o meaai i luga o fafie, faia o nonoa, ma le fauina o laulau mo tolauapiga.

Ae e ui ina fuafuaina mea uma i lona lelei atoa, sa i ai lava faigata e le’i fuafuaina e o’o mai i taimi e pei o le timu . . . na sau, i le amataga o le po muamua.

“O le mea sili sa u’unaia ai a’u, e ui lava ina ou laitiiti, e mafai lava ona ou ausia mea tetele e ala i le tatalo,” o le toe tepa lena i tua a Kuhio.

“Sa tu’ufa’atasia i matou i le tatalo i taeao ma afiafi e faaali atu le agaga faafetai i lo matou Tama Faalelagi. Na ou a’oa’o e talisapaia lelei le foafoaga a le Atua ma ou fiafia i le faamasani i le tupulaga talavou ma tagata matutua sa auai.”

Ae o Kuhio ua lē na o se tagata e tuufa’atasia se tolauapiga.

Ina ua mae’a ona su’esu’e i punaoa o le faalagolago o le tagata ia te ia lava a le Ekalesia, ma tau saili auala e maua ai se tupe, sa tonu ia te ia o le a ia tiliva ma faatau atu meaai faigofie e mana’omia e pei o falaoamata ma suka i tagata o le nu’u e leai ni auala e feoa’i ai. Sa mafai e ia ona sefe se tupe mo tafaoga o le tau mafanafana.

A’o tulimatai nisi avanoa se tele e a’oa’o ai ma ola tuputupu a’e, sa ia talanoa i lona tinā.

Sa ia ripoti mai e faapea na fai atu lona tinā ia te ia—ma sa faatatau i le faamanatuina o tagata paionia o aso e gata ai na ulufale atu i Sate Leki ia Iulai o le 1847—“o le vaiaso lenei tatou te faamamalu ai tagata paionia.”

Na faapea mai Kuhio, “sa ou filifilia se isi galuega e fai faava’a o ata ma isi a’u uo, ina ia faamamaluina ai tagata matutua o le uarota.”

Na faapea mai lona tina, “Sa matua fiafia lava o ia e faatinoina lenei gaoioiga, ma isi aiga e toalua o le uarota. Sa ia taoina ma avatu keke i tagata matutua uma lava na ia asia.”

Na faaiuina e Kuhio e faapea, “na ou a’oa’oina e faapea o le auauna atu i isi, o la tatou auaunaga lava lena i le Atua. Ina ua ou filifili ou te alu ese mai le fale ma ou alu atu i le tolauapiga, ma alu ese atu mai lo’u olaga e pulea e le faatekinolosi, ua ou faafeagai ma se olaga moni, ma o i fo’i ua a’oa’oina ai a’u ma ou aga’i atu atili i luma.”

O sini a Kuhio ma galuega o ni vaega o polokolama fou o atina’e faaletagata mo talavou a Le Ekalesia a Iesu Keriso o le Au Paia o Aso e Gata Ai, ua ta’ua o le “Tamaiti ma le Autalavou.” Na faasilasila i le vaiaso a’o lumana’i le Konafesi Aoao a le Ekalesia ia Oketopa 2019, ma amatalia aloa’ia loa ia Ianuari 1, 2020.

O le Peresitene o le Ekalesia o, Russell M. Nelson, na saunoa e uiga i le polokalama: “O fetu’unaiga . . . ua faatatauina e fesoasoani i ali’i talavou ma tamaita’i talavou ina ia atina’eina o latou agava’a pa’ia faale-tagata.”

I lenei polokalama fou, o le faamamafa ua tu’uina atu i le faa-auai o talavou ta’itasi i o latou lava atina’ega i vaega e fa—faaleagaga, faaletino, faaleagafesootai, ma le faaleatamai. E ia i latou le avanoa e filifili ai sini mo i latou lava ma polokalama e mafai ona galue ai le tagata lava ia, ma o latou aiga, po’o a latou uo.