O Le Mana o Tusitusiga Paia

Na aoaoina lo ma afafine matua ina ua fitu ona tausaga ina ia anapogi i le Aso Sa muamua o le masina. I le taeao o se tasi o Aso Sa anapogi, sa sauniuni ai lo matou aiga e o i le sauniga faamanatuga, na ou faalogo atu ai mai le potu malolo o ōiōi mai lo’u afafine laitiiti mo se mea e ‘ai. Sa faitio o ia i lona tina fai mai ua fia ‘ai ma ua manaomia se mea e ‘ai. Sa ou matua lagonaina le alofa i lo’u afafine ma sa ou malamalama i le tulaga o i ai o ia, ae sa ou le manao foi i lea lava taimi e toilalo o ia.

Sa vave ona ou liliu atu e faitau mai le tusi a Mataio 4:1–11. O loo ta’u mai ai e uiga i le tofotofoina o Iesu faatolu e Satani a o anapogi o Ia mo aso e 40.

Sa amata e Satani ona faaosooso le Faaola i lona fai atu, “Afai o oe o le Alo o le Atua, ina fetalai atu ia ia liu areto nei maa.” Na tali atu Iesu ia te ia, “Ua tusia, e le na o mea e ‘ai e ola ai le tagata, a o afioga uma e tulei mai i le fofoga o le Atua.”

Lona lua, sa faaosooso e Satani, “. . . oso ia oe i lalo; aua ua tusia, e poloai o Ia i Ana agelu ia te oe; latou te ave ia te oe i o latou lima, ne’i tu’ia lou vae i se maa. . . . Na fetalai atu Iesu ia te ia, ua tusia foi, Aua e te tofotofo i le Alii lou Atua.”

O le mea mulimuli, na faaosooso e Satani e ala i lona faaali atu ia Iesu o malo uma o le lalolagi ma lo latou matagofie. Ona ia fai atu lea ia Iesu, “Ou te avatua nei mea uma ia te oe, pe afai e te faapa’ū ma ifo mai ia te a’u”. Na tali atu lea o Iesu ia te ia, “Ina alu ese ia oe Satani; aua ua tusia, E te ifo atu i le Alii lou Atua, ua na o Ia lava e te auauna i ai.” O le fu’a taualuga o le tala o loo aotele mai i le fuaiupu e 11. “Ona tuua ai lea o Ia e le tiapolo, faauta foi, ua o mai agelu ma auauna mai ia te ia.”

Faatasi ai ma le alofa ma se tatalo i lo’u loto e fesoasoani i lo’u afafine fia ‘ai, sa ou valaau atu ai ia te ia e sau e nofo i o’u autafa. Sa tagi o ia ma sa taumafai e soloiese ona loimata. Sa ou fai atu ia te ia e i ai se tala matagofie e fia faamatala atu ia te ia mai le Feagaiga Fou. Ona ou faitauina lea ia te ia le poloka mau lenei, o lea fuaiupu ma lea fuaiupu, ma faamatala atu i ai mea e tutusa lelei ai le mea sa oo ia te ia ma mea foi na feagai ma Iesu. Sa anapopogi uma i la’ua ma sa faaosoosoina i la’ua e Satani e aai ae faagalogalo le anapogi. Ona ou faamalamalama atu lea e faapea, ina ua oo ina tuliesea e Iesu ia Satani e ala i le le amana’iaina o ana faaosoosoga, sa tuua o Ia e Satani ae o mai agelu ma auauna atu ia te Ia.

Sa loimatā pea lo’u afafine ma sa ou le mautinoa pe ona o la lava sa fia ‘ai pe ona ua tuia lona loto i le faataitaiga mama a le Faaola. Sa ou fesili ia te ia pe mana’o e tuliese Satani ae ona mauaina le auauanaga mai agelu. Sa luelue mai lona ulu ioe. Ona ou tuuina atu lea o le molimau ia te ia e faapea, o faamanuiaga o le faatoilaloina o tosinaga a Satani ma le mauaina o le auaunaga a agelu, e moni lava. Sa ou opo maia o ia ma fai atu i ai, o le anapogi o se mea lea i le va o ia ma lona Tama Faalelagi ae le o ia ma i ma’ua o ona matua. O le faaiuga e faamuta le anapogi i soo se taimi a o lei atoa le 24-itula, o lana lava lea ma o loo saoloto o ia e faia lena faaiuga e aunoa ma le fesili mai ia i ma’ua. I le avea ai ma ona matua, ma te le puleaina, ae e tatau ona ia ta’u atu i lona Tama Faalelagi e ala i le tatalo pe a tonu ia te ia e faamuta lana anapogi.

Sa ia tuua a’u ma le maligi o loimata e aunoa ma se upu ona oo mai ai lea o se vavega. Na te le’i toe faaleoina mai lona fia’ai, ae alu ma sauni gūgū mo le lotu. Sa fiafia o ia ma sa mafai e ia ona faauma atoa le anapogi a lo matou aiga i lena aso. O le aso mulimuli foi lea na ia faitio ai i se Aso Sa anapogi. Na te le’i toe misia lava se anapogi a le aiga talu mai lena aso. Ua 17 nei tausaga o lo ma afafine. Ua ola a’e o ia ma ua talitonu i le mana o le tatalo ma le anapogi ma ua oo foi ina ou talitonu i le mana faamautinoa o tusitusiga paia, lea e mafai ona faamalamalamaina ai lo tatou ala i taimi o le pogisa.

Ou te iloa e mafai ona tatou faatoilaloina le taufaasese o Satani ma ua ou iloa e mafai ona asiasi mai ma auauna mai agelu ia i tatou i taimi tatou te lagonaina ai le tuuatoatasi pe i taimi foi tatou te lagona ai ua le mafai ona tatou faaauau i luga o le ala o feagaiga. I le 1 Nifae 8:33, sa fai mai ai Liae e uiga i lana miti i le laau o le ola e faapea “. . . sa toatele le motu o tagata sa ulufale atu i totonu o lena fale uiga ese. Ma ina ua uma ona latou ulufale atu i totonu o lena fale sa latou tusitusi mai le tamatamailima o le faatauemu ia i latou o e na aai i le fua o le laau; peitai sa latou le amanaiaina i latou.” E faapei o nei faataitaiga mai lo tatou Faaola alofa ma mai lo tatou Tama o Liae, e mafai ai ona tatou faatoilaloina le faatosinaga a Satani e ala i le lē amanaiaina o ia.

E moni le mana o tusitusiga paia. Ua i ai iinei e fesoasoani ia i tatou i la tatou taua e faasaga i faatosinaga faatiapolo i o tatou taimi. Ou te tatalo o le a tatou suesueina ma le faaeteete ia tusitusiga paia, aemaise lava o le Tusi a Mamona, e pei ona fautuaina mai e o tatou perofeta o aso nei, ma faaaoga le mana sili o i ai e faamanuiaina ai o tatou olaga i aso uma a o tatou faimalaga ai i lenei olaga faitino.