Pe O Le Mea Lenei Ou Te Manao ia I Ai?

Ina ua 17 o’u tausaga, sa matou o ai ma nisi o lo matou aiga i se taavale mai Oakland, Kalefonia i Portland Oregon e sue ma laveai mai se taavale na gaoia . . . ma so’u tei pepe na leiloa. Sa taufaafefe ma faigata le malaga, ae sa i ai lo matou faamoemoe ma sa tumu i le agaga tatalo.

Na ala i le alofa mutimutivale o se Tama Faalelagi, sa mafai ai ona matou laveai mai le veni ma si o’u tei pepe, ia na saogalemu ma e lei afaina ona o se vavega.

Sa ola le veni, ae sa gasu. Sa sili atu lo’u fiafia e faamama, e tapena mo lo matou toe foi, ae o mafaufauga i na tagata o e sa faia faatautala le matou taavale—ma le ituaiga olaga sa latou ola ai—na aumaia ai ia te au ni loimata o le le fiafia. Sa faigata ia te au ona malamalama pe mafai faapefea e se tasi ona faia ni mea valea i o latou olaga ma meatotino a isi tagata. Na ou matua faanoanoa ai lava. Ua le mafai lo’u toe fia oo atu i Kalefonia. Na ou iloa e umi se malaga o loo i o matou luma.

E oo atu i le taimi ua matou saunia ai mo lena ti’eti’ega, sa tuai tele . . . ma ua pogisa. A o matou toe foi i luga o le auala, sa faatumulia lo’u mafaufau i manatu e mamao tele le matou malaga. Sa ou mafaufau i ala uma sa fesoasoani mai ai le Tama Faalelagi ia i matou. Sa ou mafaufau i aioiga uma ia te Ia i luga o le ala agai i Portland ma faailoaga uma o le lotofaafetai mo la matou malaga toe foi.

A o ou tomanatu i nei mea, sa ou vaaia se malamalama pupula, o tu maualuga i luga a’e o laau uumi, i si mamao teisi atu mai le alatanu sa ou i ai. Sa amata ona malena a’e lo’u loto i le sagisagi fiafia a o ou mafaufau pe mata o le a lenei malamalama. Ina ua mavae ni nai minute, a o matou latalata atu i ai, sa mafai ai ona ou vaaia ai faapea e leai lava se isi mea e ono mafai ona i ai, ae o le Malumalu o Portland Oregon!

O lo’u matua fiafia tele na ou fai atu ai i lo’u aiga o le a matou tuua le alatanu-ae o matou o e su’e le malumalu. E tatau lava ona ou vaai i ai! Sa naunau lo’u agaga ia i ai i na laufanua o le malumalu, ia ou faofaleina i lo’u loto lona matagofie ma ia faasoa atu lena aafiaga i lo’u aiga

A o ou aga atu i le va o laau, sa mafai ona ou vaaia le malamalama e faapei o la e i le si’ui o se ana umi o le pogisa. Sa malena a’e lo’u fatu i le olioli ma le naunautaiga.

O le latalata atili atu i le malumalu, na matou matauina ai se auala e leai se ulufafo i luma o faitotoa o le malumalu, lea sa paka ai ni taavale. Sa ou autilo solo ma le sagisagi fiafia, mo se auala e o ai i totonu, i laufanua o le malumalu.

Sa faafuasei, ona ou lagonaina le lotonutimomoia ina ua ou iloaina sa le na ona tapunia o faitotoa o le malumalu . . . ae sa loka.

Sa vave ona ou maua se avanoa e paka ai faatasi ma isi taavale, ma i nei minute na sosoo ai, sa ou tu i faitotoa u’amea-ma pipii i ai ma tagi—a o ou sioa atu i le matagofie o lena maota mamalu ma le paia.

O le manatu o le loka i fafo mai o faitotoa o le Lagi, sa oo ina avea ma mea moni lava ia te au i lena taimi.

O fesili na lofia ai lo’u mafaufau a o o’u tūtū ai iina i lena po:

• Pe o le mea lea ou te manao ai pe a ou oo atu i le lagi?

• Pe ou te manao e loka a’u i fafo? Tagi ona ua le mafai ona ou alu i totonu?

• Pe o le a vaai mai ea se tasi ia te au o tagi ona misi alofa lea mo au ma faataga atu au i totonu?

• le a se mea o le a ou faia ina ia mautinoa ai o le a le tupu lenei mea ia te au i le faitotoa o le lagi?

Sa ou tagi ai lava seia oo i le taimi na matou toe foi ai i le auala, ma sa atili ai ona ou tagi.

Sa matua ogaoga le aafiaga o lena po. A o ou aveina pea le taavale, sa ou saga manatunatu pea i le lologa o lagona ootia sa ou lagonaina i lena po. Sa faamalosia ai lo’u naunau ia atili lelei ona ou faia—ia lelei atili—ia ofoina atu lo’u loto ia te Ia ma galue malosi e mulimuli i le faataitaiga a lo’u Faaola, o Iesu Keriso.

Sa amata ona ou pese a o ou aveina le taavale. A o ou pese, sa amata ona faatumulia lo’u loto i le filemu ma le mafanafana. Sa ou iloaina o lo’u aafiaga o le a aumaia ai ia te au se pese fou...se pese sa ou faamae’aina i le taimi o lena tietiega. O se pese o le a siitia ma musuia ai. O se pese e uiga i se malumalu. O la’u pese o le malumalu.

O le pese lea: